‘E iloa lelei foi e Lealailepule auā o loo tatala foi le pisinisi a ona mātua faaletulafono i le Aso Sa, lea foi e faigaluega ai nai Saina i le faleoloa lea i Vaitele’ … Tuilaepa
O le fono faalevaiaso a le Tautua Samoa ma tusitala o le atunuu na lāgā ai e le sui o lea Vaega Faaupufai, o Lealailepule Rimoni Aiafi le lē mālie i le vaaia o tagatānuu o Saina o faatino lava galuega i le nofoaga i Sogi o loo faatino ai le fausia o ofisa fou o le Malo.
Faaalia e Lealailepule na tu lelei lana taavale ae agai i ni alii Saina na pasi ane i luma o lea nofoaga o loo punouai lava i se palu o loo faia mo galuega i totonu o le lotoā lea i Sogi. Na faaalia e Lealailepule, na ia fesiligia alii Saina nei pe aisea ua galulue ai i le Aso Sa … “ma ou fai i ai pe o iloa o le Aso Sa a Samoa e sā ona galulue ai.”
Na faamalie ane le Saina ma taofi loa le galuega ma na ta‘ua e le sui lenei o le Tautua Samoa e lagona le faanoanoa ona e foliga mai ua solo atoa le faatinoga o nei galuega tetele a le Malo ua leai ai ma se faamamafa o toe avea i talitonuga faa-Kerisiano o tagata o le atunuu lea e galulue ai.
O le fautuaga a Lealailepule na fai i le Malo, e aua ne‘i galo le Aso Sa o le aso e lē o faatagaina ai le galulue. Faaalia e le Alii Palemia o loo iai galuega e lē mafai ona toe tolopo le faatinoga mai i le Aso Toonai seia aulia le Aso Gafua ma ua mae‘a foi ona faamalamalama i tagatānuu o Saina o loo aumai e faatino nei galuega, le faamamaluga o le Aso Sa i Samoa nei.
“E iai la isi galuega faapitoa na e lē mafai ai ona faatalia seia oo i le Aso Sa,” o se tali lea a le Alii Palemia.
“E silafia foi o loo tele isi galuega o loo faatino i le Aso Sa ona o le auaunaga o loo moomia pea le faatino.
E iloa lelei foi lava e Lealailepule auā o loo tatala foi le pisinisi a ona mātua faaletulafono i le Aso Sa, lea foi e faigaluega ai nai Saina i le faleoloa lea e i Vaitele,” o se faamatalaga lea a le Alii Palemia.
“E tele galuega o loo faatino i le Aso Sa e pei o Leoleo, o le Falemai ma isi auaunaga o loo tāpā e le atunuu i le Aso Sa, ma e tatau lava ona faatino ona e lē mafai ona toloa, ae o le tulaga ia i le Aso Sa ua iloa lava e tagatānuu o Saina e ave foi le tatou faatāua i le Aso Sa”.
O le popolega o le sui o le Tautua Samoa, o le a tatala le avanoa e faatino ai atina‘e a le atunuu aemaise i le oo mai ai o tagata mai fafo e lē o iai ni tapuaiga Kerisiano ma amata ai loa ona lē amanaia le aso tapuai o Samoa.
Faaalia e le Susuga Tuilaepa Lupesoliai Sailele Malielegaoi, o le lagalaga e le sui o le Tautua Samoa o tagatānuu nei e ese a latou tapuaiga o se tulaga lea e lē tatau ona lagalaga ona o loo manino i le Tulafono le aiā tatau o tagata ma a latou tapuaiga.
E lē tatau foi ona faasinosinolima le alii faipule i tagata mai i fafo auā o le a ese ai loa le mataupu.