Tali le Minisita Soifua Maloloina

Ua tali mai le afioga i le Minisita o le Soifua Maloloina i se faaseā na oo atu i lona ofisa ona o ni taotoga na faia i le toalua o se tamā mai i Gagaifo i Lefaga.

Faaalia e Vaofusi Agiga o le amataga o le masina na tea nei na ola ai lona toalua i le la pepe fou. O le fanauga o lona toalua na moomia ai se taotoga ma o se tulaga na faapea ona faagasolo ma na fanau le pepe fou ma ua faamautu le maloloina o lona toalua faapea ai ma le la pepe.

Peitai na ia faaalia o le vaiaso lava lea na toe agai ai i le falemai ma toe taoto lona toalua ona o le faamatalaga o loo iai se faaletonu o le taotoga muamua lea ma e iai se fusi poo se kosi na galo ai i le manava o le tina.

Faaalia e lenei tamā e tolu lelei lava isi taotoga na faia o lona toalua ma na iu lava ina agai i le ofisa o le Minisita ona o le popole tele i tulai mai ai nisi tulaga ogaoga ma iu ai le ola o lona toalua ona o le ogaoga ma le tele o le manu‘a na vaaia ina ua mae‘a taotoga nei.

Faaalia e le tamā lenei na ave lana talosaga i le minisita o le Soifua Maloloina pe lē tatau ona ave i Niu Sila lona toalua ona e foliga mai e lē o foi i se lelei taotoga nei na faia. Peitai na fiu e faatali se tali ma agai mai ai loa i tusitala.

Na agai le tatou ofisa i le Minisita i le Aso Faraile na tea nei ma ta‘u mai ai sa oo atu le tusi a Vaofusi ia te ia ma logo loa fomai na faia le taotoga i le mafuaaga o le tele o nei taotoga aemaise o le tulaga ua iai le tina.

Faaalia e le alii Minisita le afioga Tuitama Dr Talalelei Tuitama na toe foi atu le lipoti a fomai na faatautaia taotoga o le tina lea ma ta‘ua ai sa maua ni siama i le manava o le tina ma e tatau ona fufulu ma faamamā e ala i taotoga nei ma o le mafuaaga lea o le sosoo ona fai ina ne‘i afaina i siama totoga o le tina, ona leaga atu lea o se isi tulaga e oo i ai, ae na mafai lava ona fai i Samoa lea taotoga.

E ono aso na va ai le faatonuga a le alii Minisita ma le tali na avatu e le falemai.
O le Aso Faraile lava lea na toe logo mai ai le tatou ofisa ma faapea mai ai le afioga i le Minisita o lea faatoa mae‘a lava ona toe su‘i manu‘a o le tina ma ua tapunia ai le manu‘a tele lea na iai le atugaluga o le tamā o le aiga.

Sa faapea foi ona faamalamalama mai o le lipoti a le falemai e talafeagai lava le tatala o le manu‘a e pei ona iai vaaiga ia na matuā popole ai le tamā o le aiga ona o le taumafai lava ia tape le siama lea na maua ai i lea itu o le tino o le tina o le aiga.

Ua tea le tina i tua ae e lē o malie lava le tamā o le aiga. O le tala a Leituala Dr Ben Matalavea, e lei iai se popolega na iai e ono agai ai i fafo mo togafitiga ma o le lape atonu na tulai mai o le fesootaiga ua lē malamalama ai le tamā i le faamaninoga o le faatinoga o lea taotoga ae o lea ua mae‘a le taotoga ma o lea foi ua leai se siama ua toe maua i ia manu‘a o le tina.

O le faamatalaga a Dr Matalavea e lei iai lava se fusiga na galo i totoga o le tina e pei ona iai tuua‘iga ua lafo e le tamā o le aiga ma o lea na auauai le taotoga ona e tatau ona pe le isi itu o le manava ona faatoa faatino lea o taotoga i isi vaega na fufulu ese ai le siama.

Tuitama Dr Talalelei Tuitama