O se lipoti mai Samoa na auina atu i le Samoa Times i le vaiaso talu ai, sa faaalia ai le vaaia i luma o le ofisa o le faalapotopotoga o fesoasoani laveai, le Koluse Mumu i Motootua i Samoa, le amata ona latou faatau ese atu nisi o oloa sa auina atu o ni fesoasoani mai tagata eseese auā taimi sa mafatia ai nisi o vaega o le atunuu i le sunami.
O lena lava lipoti na lugā lalō ai le tele o faasoa i luga o le Radio Samoa i le vaiaso talu ai, ona o lagona faaseā o le mamalu o Samoa o loo alaala ma aumau i atunuu mamao, i lo latou manatu, e lē sa‘o lea faiga ua fai e le Koluse Mumu, o le sue o a latou tupe i meaalofa sa auina fua atu mo le tufatufaina i aiga ma tagata uma sa mafatia i lea mala faanatura.
Peitai la, o lea ua toe oo mai se isi lipoti mai Samoa, ua faailoa mai ai e le failautusi o le faalapotopotoga, le faletua ia Namulauulu Tautala, e faapea, o loo iai faiga faavae a le Koluse Mumu e mafai ai ona latou toe faatauina atu ia oloa i se auala e saili ai ni seleni mo a latou galuega. Na ia ta‘ua, o le tele foi o oloa o loo toe faatau atu, o oloa ua amata ona mae‘a le taimi e aoga ai.
O nisi o oloa o fesoasoani sa tuusa‘o atu lava i le Koluse Mumu. Faaalia e le failautusi aoao o loo iai le malosiaga e mafai ai ona latou faia lea fuafuaga i fesoasoani e tuuina atu, ae o le a iai se taimi ona faamalamalama lea i le atunuu mafuaaga ua toe faatau atu ai nisi o fesoasoani ma foai.
O foai mai le atunuu i le taimi o le sunami na faaalia e Namulauulu ua mae‘a ona tufa ma faasoasoa i aiga ma tagata na aafia i le sunami.
O nisi o oloa na ta‘ua sa toe faatau atu, e pei o lavalava, seevae, o totoga o le tunoa poo le umukuka faapea fasimoli taele ma fagu taele, fagu u‘u ulu poo shampoo. Ua lua nei vaiaso o faatau atu i le atunuu ia oloa.
