Aisea ua teena ai le talosaga apili a Taito Phillip Field?
• Se fasioti tagata ea Taito?
• O iai se polokiki eleelea i tua atu o le mataupu a le Afioga Taito?
• Aisea ua faauliulito ai finagalo o le Faamasinoga toe Iloilo poo Apili?
• E faamaoni le tumaoti o Faamasinoga, e lē aiāina e le Palemia ma le Faigamalo?
• O fea e tuaoi ai le Polokiki ma le Tulafono?
• O faletonu le faagasologa ma le faatautaia o galuega tau faamasinoga a Niu Sila?
O nisi ia o fesili ua amata ona alia‘e ma ua leva ona gagana ai le faletua ia Maxine a o tālia ai se faaiuga mai le faamasinoga o talosaga toe apili, e uiga i le mataupu a le afioga ia Taito Phillip Field. E lē gata i le faletua o le afioga ia Taito ma lona aigaalii, ae o le atunuu sa talanoa atu i ai e uiga lava i lea mataupu.
O le vaiaso na tea nei na lomia ai e le Samoa Times le tulaga o le lei maua mai o se tali o lea apili, ina ua mae‘a le taimi sa fofogaina e le faamasinoga o le a tali mai ai i le Ioe poo le Leai foi, ona toe iloiloina o lana faaiuga sa faia muamua.
Peitai o le Aso Faraile o le vaiaso lava na tea nei, na maua mai ai le tali, ma ua faailoa mai ai le teena o le talosaga, ae toe faamautuina pea e le faamasinoga o apili le faaiuga sa faia muamua mo le afioga ia Taito.
Tali a le Faamasinoga
Sa faamatalaina e le faamasinoga o apili e faapea, sa leai se faaletonu o le faaliliuina o le tulafono e le alii faamasino sa tauavea le mataupu e uiga ia Taito, Faamasino Rodney Hansen.
E lē gata i lea, ae sa mulimulitai foi i faamaumauga ma le finagalo o le laulau o faatonu sa nafa ma le iloiloga o le mataupu i le taimi muamua.
O lea lava foi faaiuga sa toe faamanino ai le sa‘o ma le talafeagai o le faaiuga sa faia, e fua i moliaga sa molia ai Taito. Sa toe faamanatu nisi o mafuaaga sa faatatau i ai le iuga a le alii faamasino ma le faamasinoga, e pei o le ta‘upepeloina o le afioga ia Taito, aemaise lona taumafai e tuu faamatalaga lē moni, ma ta‘upepeloina ai nisi o lana aufaigaluega i mataupu sa molia ai.
E lē gata i lea, a o le taumafai foi o Taito e fai ni auala e taofia ai se suesuega mo ia, ma taofia ai le ono faataunuu o sona lava faamasinoga. E 11 moliaga sa faamaonia uma i le Faamasinoga Maualuga ona o faiga piopio ma le lē faamaoni, ma le 15 o moliaga i le taumafai e toso ese le faia o se faamasinoga.
O vaega uma ia sa toe faamanatu, ma sa faavae ai le iloiloga sa toe faia ma faaleo ai loa le tali e pei ona faamatuu mai, O le lē talia ma le teena o le talosaga a le itu tagi.
Loia a Taito (Helen Cull)
Sa taumafai foi e fesiligia pea le tamaitai loia o loo tulai mo Taito, poo le ā sona finagalo e tusa ma le faaiuga ua tali mai ai le Faamasinoga o Apili. E lē gata foi i lea, ae sa fia iloa foi, poo le ā le isi laasaga o le a agai i ai mo le taimi nei, ona ua lē talia le talosaga.
O le tamaitai loia o Helen Cull sa nafa ma le tuufaatasia o le talosaga toe iloilo atoa ai ma le tuuina i totonu, aemaise ai o ia foi lea o loo sauni nei na te toe susueina ma finauina le faaiuga a le faamasinoga.
E oo mai i le taimi mulimuli o le tusitusiga o loo faatalia pea le tali mai o le tamaiatai loia i ni feau sa tuuina i lana telefoni feaveai mai le Aso Faraile o le vaiaso talu ai, atoa ai ma le afiafi o le Aso Sa aso 28 Novema 2010.
Maxine/ Taito
E lei mafai ona maua le faletua ia Maxine ona talu ai o loo iai pea i Samoa mo le isi lua vaiaso. Peitai sa maua se fesootaiga ma le alo tamaitai o le afioga ia Taito, ma sa faaoo loa i ai se lagona ma fesili a le Samoa Times.
O le tali mai a le tamaitai o Fiasili, sa ia muai faailoa ai le lē fiafia ma le faanoanoa tele e tusa ai ma le faaiuga o le teena o le talosaga a lona tamā. E tele vaega e faavae ai le lē fiafia, ae ui lea o le a tuu ai pea ia faapea, se‘i mae‘a le feiloaiga ma le loia i le vaiaso fou.
Sa toe fesiligia foi, poo le ā se tala mai a lona tamā, ae sa faapea mai, o loo iai foi lona lagona faanoanoa, peitai o loo ia maua pea le mafanafana ma le lototele mai le Atua.
O loo malosi pea lona teena o le faaiuga ma lona faasalaga, ae ui i lea, na te lagona e iai lava se mafuaaga ua faataga ai e le Atua lona tagata e nofo i totonu o le falepuipui mo lenei vaitaimi.
O le taimi o le vaiaso nei lava ua fuafua e feiloai ai le loia ma le tamaitai o Fiasili e talanoaina ai le isi laasaga o le a agai i ai le mataupu.
Ona talu ai o loo malosi pea le lagona o le tamaitai loia, e iai lava le avanoa e manumalo ai lana itu i le mataupu o loo finauina pea.
Helen Clark/ Faigamalo a le Labour
O le tamaitai palemia o Niu Sila Helen Clark, sa tulai mai i le vaitaimi tonu sa alia‘e ai le mataupu sa aafia ai Taito. O ia foi lea sa ia faatonuina le matagaluega o leoleo ina ia faia se suesuega faapitoa. Ae manatua foi o ia lava foi sa tofia se tasi o loia tutoatasi QC, na te suesueina le afioga ia Taito, ina ua faato‘ā alia‘e le mataupu mo le taimi muamua.
O le iuga o le suesuega a le QC, sa lei maua ai se solitulafono e faasaga ia Taito, ae sa faailoa le mamā o le alii faipule i lena vaitaimi.
O le teena ma le lē lagolagoina e Taito o nisi o tulafono taufaaofi a le Labour sa tuuina i luma o le fono, sa avea lea ma auala o le toe liliu o Helen Clark ma lana vaega faaupufai, ma toe faatonuina ai leoleo ina ia toe fai loa se isi suesuega faasaga ia Taito, ma ia faia ni moliaga i le tulafono.
O le toatele o Minisita ma Faipule ua aliali a‘e uma nei a latou faanunumi ma faiga piopio ma le faaalatua, o i latou sa i lalo o le taitaiga a Helen Clark ma lana faiga malo i tausaga sa tulai mai ai.
E lei tuutuu mamaoina foi suesuega sa faia na mafua ai ona alia‘e lapiti ma le faaaogā sese o tupe a le atunuu.
Ae masalo ana toe faafoi i tua suesuega i le vaitaimi atoa sa ta‘ita‘i ai Helen Clark, o le a mafai ona maua se tuufaatasiga tele o ni seleni sa alu lē aogā ona o le piopio ma le lē faamaoni o sui o le palemene a Niu Sila. O ai na iloa pe lei aafia ai foi ma le tamaitai ta‘ita‘i, o le vaega faaupufai a le Labour.
Aisea na lē faatonuina ai ni suesuega faapitoa e faia mo minisita ma faipule amio piopio ma le faaaogā sese o tupe a tagata totogi lafoga.
E lei iai se tuuaiga o Taito i sona faaaogāina o se tupe, atoa ai ma le faaaogāina o sona taimi faapalemene e fai ai ana lava pisinisi, se‘i vaganā ai ni meaalofa sa tauaaoina e tagata lautele mo ana galuega lelei ma le fesoasoani sa faia mo soo se tasi.
O ia faiga sa tuuaia ai Taito ma faauiga sese, pe sa faaliliuina i se auala lē sa‘o e le toatele o papalagi ma le au faipolokiki, sa mafua ai ona mamafa tuuaiga faasaga i le tamalii o le atunuu, ma sana maua ai auupega a le faamasinoga.
Iuni Sapolu, Josephine Sapolu (Sapolu Law Services)
E lei mamao atu ona faalauiloa faalauaitele le tulaga ua taofia ai le toe faamatuu mai o seleni a le malo ma le matagaluega, mo le auaunaga a nisi foi o tamaitai loia Samoa, o Iuni Sapolu ma Josephine Sapolu.
O se suesuega sa fai faalilolilo e aunoa ma se faailoaina, mulimuli ane sa faia lava le faaiuga ma taofia ai tupe, taofia ai foi ma le toe faaaogāina o auaunaga fesoasoani Legal Aids sa faaaogāina e loia Samoa.
O ni mau e faapea e lei lelei ona faaaogāina, ma e lē lelei foi le faatinoina e le Sapolu Law, o ana galuega faagasolo ua mafua ai ona faaleaogāina ia auaunaga masani, sa oo atu ai se fesoasoani tele mo tagata o Samoa lava latou ia.
Aemaise lava i latou e faigata tele le gagana mo fesootaiga, ma le taimi e tulai ai i luma o le faamasinoga i ni mataupu e aafia ai.
Fesiligia le ofisa o Minisita o le palemene i Ueligitone (Ministry of Internal Affairs)
Sa oo lava suesuega a le Samoa Times i le matagaluega ma le ofisa o loo nafa ma le vaaia o tupe faaalu a alii ma tamaitai minisita o le Palemene. (Ministry of Internal Affairs) Sa tāpa se faamaoniga o suafa ma alii ma tamaitai minisita sa latou faaaogāina sese tupe a le atunuu, e ala ia latou pisinisi faaleaiga.
Sa faamaonia uma lava fesili ma vaega sa manaomia i suesuega, sa faamatuu mai suafa o minisita, atoa ai ma le aofaiga o seleni sa faaaluina. E oo lava foi ia i latou sa tāpa alauni ma tupe faaopoopo mo latou totogi ona o manaoga mo na o le palemene, peitai sa faaaogāina i nisi auala sese ma le piopio e maua ai ma saga totogi ane pea ia vaega tupe mo i latou.
E lei iai se vaega na toe gole i le taumafai pea o le Samoa Times ina ia manino i le uiga moni o faiga piopio ma le solitulafono, ae faaaogā ai metotia faapapalagi e ufiufi ai i lalo o le kapeta, ma gagau ai le mea amiotonu agai i le polokiki eleelea ma le palapala.
Fesiligia le auaunaga ma le ofisa autū mo sui o le palemene i Uelegitone (Parliamentary Services)
Ona talu ai e ese le matagaluega e feagai ma minisita, ese foi le ofisa e nafa ma le faamaumauina o tupe faaalu a faipule o le maota, o le ala foi lea na lē maua uma ai le tali mai a le matagluega a le Internal Affairs.
O le ala foi lea na tāpa ai ma tuliloa pea lea ofisa autū mo se latou foi tali mai i le suesuega lava lea e tasi sa manaomia ai ni tali mautu ma le faamaoni.
E lei talitualimaina foi e lea vaega a le malo ni fesili sa tuuina atu i ai mo le fia maua mai o se atoaga o le mataupu.
Sa faailoa uma mai foi e le auaunaga lea, le tulaga i suafa o faipule ma vaega uma sa aafia ai, e ui ina e lei faasaga i ai ni tuuaiga ma faia i ai se suesuega faapitoa.
E anoanoai ma tele ni suifaipule sa maua ma faaaogāina e lē gata i tupe, a o le faaaogāina foi o le malosi faasui o le palemene e saili ai a latou lava pisinisi, ma le faaaogāina sese o taimi o malaga sa malaga ese ai i fafo o Niu Sila.
Peitai o le tali sa tautata pea ma faamae‘a mai ai saunoaga a i latou sa fai ma sui sooupu o ia matagaluega a le palemene o Niu Sila. Sa latou faapea mai, e ui ina sa latou faaaogāina sese tupe ma taimi, atoa ai ma le malosi faasui a faipule, peitai ua mae‘a ona toe totogi uma tupe, ua mae‘a foi ona faia a latou faatoesega aloaia mo le atunuu atoa.
E lei lava lea faaupuga e tau ufiufi ai faiga piopio ma le lē sa‘o, pe afai o i latou o sui o le palemene, atoa ai ma ta‘ita‘i o le atunuu e fai ma faataitaiga. E lē gata i lea o tagata foi lava nei, o loo fafauina ma tusia ma toe pasia tulafono mo tagata lautele, ae pagā lea, ua latou toe toese ma aveesea le tāua ma le faamaoni o le tulafono.
O le talitonuga o le Samoa Times, ina ua mae‘a talanoaga ma suesuega sa faatinoina, ua atagia mai ai se tulaga lē paleni o le faatinoina o galuega ma tiute a le Malo ma le Faamasinoga. E lē o tutusa le faaaogāina ma le faataunuuina o solitulafono ma ona faasalaga. E lē atagia mai se faaletonu i le faaaogāina ma le faaliliuina e alii ma tamaitai faamasino o tulafono e mulimulitai ai faaiugafai, pe fua i minisita ma sui faipule ua soli le tulafono.
O le solitulafono, o le solitulafono, o le taufaasese le faaaogā sese o tupe ma le mautinoa. O faiga piopio ma le lē amiotonu, le mafaufau sa fafauina ai auala solitulafono ae faamoemoe i le faatoesega ma le toe ta‘utino mulimuli e magalo ai. (Fraud, Bribery &Corruption)
O le aitupe ma le lē faamaoni le saili mea ma le faipisinisi i taimi o le palemene, a o maua pea le totogi.
E eleelea ma gaoi le tāpa ma le soona talosagaina o tupe a tagata totogi lafoga, e totogi ai alauni, ae o loo nofo i lona lava fale faatau e lē o faaaogāina se nofoaga mau totogi e pei ona aiaia i tulafono faasui o le palemene.
Ua tatau ona faatonuina ni suesuega faapitoa e faia mo sui faipule uma o le maota sa aafia i le tulaga tau tupe, ma le faaaogāina o le malosi faaminisita, ma le tofi o le maota e saili pisinisi ai, ma faatino ai manaoga faaletagata lava ia.
Suiga fou fofogaina e le Palemia John Key
O le vaiaso na tea nei, sa toe faailoa ai ma fofogaina e le alii Palemia John Key, le aveesea ma le faaitiitia o alauni ma tupe faaopoopo mo sui o le palemene.
O ia vaega tupe sa maua i le ta‘i $37,000 i le tausaga, peitai ua faaitiitia a o isi lava ua aveese motu e tusa ai ma se saunoaga a John Key.
Aisea ua taofia ai e le Palemia o John Key nisi o faamanuiaga sa masani ona maua e alii ma tamaitai minisita ma faipule o le palemene? O le finagalo o le Palemia talu ai ona ua amata ona soona nunumi ma fefiloi mea tonu ma mea lē amiotonu.
Ua manatu ai John Key i se auala e tau tuuitiitia ai faiga lē manuia, ma faiga faalilolilo e ono lamatia ai le tulaga maualuga ma le ta‘uleleia o sui o le maota.
