Ua 10 lelei tausaga o le matati‘a o le siisii uamea mamafa i le paga o le ausiisii a tamaitai laiti (Junior Women’s division) ma e 103 kilokalama – lea na sii e le tamaitai o Mary Opeloge, i le sailiga o se au a Samoa mo taaloga a Malo o le Taupulega ma Asia lea e talimalo ai ia Iuni. O le ‘ata‘ata a lea tamaitai i le taimi na sii ai na manino ai lava, ua ia iloa ua ia ausia le isi laasaga lea o ana taumafaiga i lenei taaloga faigata, ua ia ausia le maualuga e sili atu nai i lo le matati‘a lea.
O le sii malele lea sa iai lea matati‘a. O le maualuga lea ua iai nei sauniuniga a le ausiisii a Samoa i le taimi lenei aua le taligamalo lea ua sauni atu i ai ia Iuni, aemaise o le sailiga o ni avanoa o le au a le atunuu i taaloga o le Olimipeka ia Iulai i Peretania.
E lei malolo lava le au taaalo lenei a le atunuu talu ona foi mai i Ausetalia i isi taaloga a le Itulagi o le Oceania, lea e aofia ai Ausetalia ma Niu Sila i le masina na tea nei.
I le itu o tamaitai matutua (Senior Women’s division) na faamautu ai foi se isi maualuga i le sii malele ma le sii ma malolo i le sailiga lava lea na faatautaia i le Aso Faraile na tea nei.
O le tamaitai o Mary Opeloge na manumalo o le tamaitai siisii i lea tausinioga i le faaiuga o le vaiaso. Ae o le tamaitai o Iuni Simanu na faapea foi ona ia talepe se matati‘a i le vaega o tamaitai laiti i le sii malele mo le vaega laiti o tamaitai.
E 18 tausaga o lenei tamaitai ma ua ia faatuina nei le matati‘a fou i Taaloga o le Pasefika i Saute i lana sii malele lea i le Aso Faraile.
O le isi alii o le au Opeloge, o Petuu na ia talepe foi se matati‘a mo le vaega i lalo o le 18 tausaga i tausinioga a Malo o le Taupulega i lana sii malele, ma ua faatuina ai se matati‘a fou i lea vaega o le tausinioga e mautinoa o le a agai mai isi alii siisii ma taumafai e talepe.
Faaalia le faafetai o le alii faiaoga o Tuaopepe Jerry Wallwork, i taumafaiga a lana au ua sauni atu nei mo taligamalo. Faaalia e Tuaopepe o le toatele o le fanau na taumafai mo ni avanoa i lenei au e fou uma i le taaloga, ae o le faagasolo mai o toleniga ma sauniuniga ua vaaia ai le toatele ua vave le see i luga i le mamafa ua mafai ona sii.
O le maualuga o lea tausinioga na faigata ai lava se filifiliga o se alii siisii o lea taamilosaga, ma o le faaiuga na tofia ai le alii o Faavae Faauliuli lea na ia sii ma malolo le mamafa e 190 kilo.
O lana sii na manumalo ai i le pine auro i Taaloga o le Taupulega i Initia e 192 kilo. “O lea ua toe vaaia le malosi o Faavae,” o le faamatalaga lea a Tuaopepe.
“E tatau ona oo atu i le isi tausinioga ua mafai ona ia sii le 195 kilo”. Faaalia e le faiaoga, ona pau lava le popolega sa iai i lea taamilosaga ona o le tamaitai o Ele Opeloge o loo faataotolia i gasegase o le tino ma e masalomia le maua i le dengue fever.
Faaalia e Tuaopepe e tatau ona oo atu i le isi taamilosaga ua toe malosi ma sauni loa mo taaloga tetele ia e talimalo ai Samoa ia Iuni.
O le tamaitai o Vanessa Lui lea na faamanu‘alia ina ua afaina lona vae i le mae‘a ai o ana sii i le mamafa o le 77 kilo, 82 kilo ma le 84 kilokalama.
O i latou uma lava na tauva i le Aso Faraile, ua i totonu nei o le au ua sauni mo sailiga siamupini a Malo o le Taupulega ma Asia i le masina o Iuni.
O le isi taamilosaga tele a Samoa lava ia o le a faatautaia i le aso 10 o Me, lea o le a tuu ai le avanoa i le au siisii fou e tausinio ai a o loma Iuni.
O le Aso Toonai lava na toe amata ai toleniga a le au a le atunuu.
