O le alii talavou Samoa o Alex Filemoni Elisara, na ia maua le tulaga lua i se tauvaga sa faagasolo mo aso e lua i Kalaiesetete i le aso 4-7 o Iulai. Ae a o lei faia le tauvaga tele i Kalaiesetete, sa muamua fai le tauvaga a pitonuu uma o Aukilani e sue ai so latou sui e toatasi mo le tauvaga lea i Kalaiesetete, ma manumalo ai loa Alex, lea fai ai o ia ma sui o Aukilani e tauva ma sui mai isi foi aai o Niu Sila atoa e pei ona faia i Kalaiesetete.
Sa iai uma sui o Northland, Waikato/Bay of Plenty, Central North Island, Ueligitone, Canterbury ma Otago/Southland; sa iai foi isi na filifilia mai le vaega a le Ami a Niu Sila (New Zealand Defence Force).
O se tauvaga e tailua tausaga ma fai, mo le faatinoga o soo se tomai faigaluega, ina ia aofia i le team o tagata faigaluega, le New Zealand Tool Black, o le a fai ma sui o Niu Sila i le tauvaga aoao a atunuu o le lalolagi, le World Skills International Finals, e fai ia Iulai o le tausaga fou, 2013 i Leipzig, i Siamani. Mo le matata o le vali taavale, Automotive Refinish Competition, e toavalu i latou na tauva, e aofia ai le alii o Alex. O le kamupani gaosi vali a le Resene Automotive and Light Industrial, o le lagolago malosi (main sponsor) mo lenei tauvagaa le World Skills International e matuā vailiili uma vaega eseese o le fausaga o le taavale e oo lava i le felavasaiga o uaea.
O Alex, na soifua ane lava i lona nuu i Salua i Manono, ma faagasolo ai ana aoaogai le tulagalua seia oo i le aoga maualuga a le latou Itumalo Aana. O se alii e fiafia tele i taaloga. Peitai ina ua vaetama mai e lona auntie i Niu Sila ma malaga mai ai i Niu Silai le 2008, lea ua aumau ai nei i Manukau, sa toe faaauau ai ana aoaoga i nisi o tomai patino e pei ona aoga ai i le MIT i Otara. Ta‘ua e Alex, ina ua sau i Niu Sila, sa matuā afifi malu i lona loto, lona manaoga ina ia iai ni ‘ai o lona alu ese mai le olaga faigata sa iai i Samoa. O le ala lea ina ua faagasolo ana aoaoga, sa matuā finafinau ia lelei ana aoaoga, ia maua sona tomai auā le faagasolo atu i le lumanai i le sailia o se galuega.
O se sailiga lumanai e na te ave ai le faafetai ma le faamalo i ona mātua ua tausia nei o ia ma nofo ai i Niu Sila, o Lama & Tiute Robertson, o laua ia o loo fesoasoani malosi i le tuliloaina o ana moemitiga. O le aoga a le MIT (Manukau Institute of Technology) sa ave ai mataupu a Alex i le matata o le uelo, inisinia i mea tau taavale, le suia o vali ma le valiina o taavale. O se taimi o le tausaga lenei o le a faamae‘a ai lana aoga mo lona tusipasi, National Certificate ma o loo faamoemoe ia avea o ia ma se tasi o tagata i Niu Sila e matuā maualuga sona tomai i lea matata o le valiina o taavale (top automotive refinishers).
O loo galue nei Alex i le kamupani faatau taavale a le Honda i Aukilani i Sasa‘e, e faagasolo ai iina ana toleniga faataitai mo lenei tomai i le vaega a le kamupani mo le valiina o taavale (Refinish Department). Ae i le mātau atu i le tulaga ua tulai mai ai le alii o Alex i le tausinioga a le World Skills National, ua matuā telē le mautinoa o lona ausia o lea moemitiga. O le taulaiga a Alex, ia tausinio lava i le tulaga e mafai ai ona ia maua le agavaa e toe foi ai lava i le MIT, e lē o se tama aoga, ae o se faiaoga, ina ia ona aoaoina nisi foi fanau i lona tomai o loo aoaoina ai nei.
Pe afai o le a lē taulau ona faataunuu e lē ua tulaga muamua ona tiutefai i le World Skills, lona uiga o Alex Filemoni o le a sosoo loa i le avanoa e fai ai ma sui o Niu Sila, i le tauvaga faavaomalo e faia i Siamani i le tausaga fou, e tauva ai ma le silia i le 1100 isi sui tauva mai atunuu e silia ma le 50, lea o le a latou tauva ai i ni tomai eseese pe ā ma le 46.
Na toe faamamafa mai e le alii o Alex taulaiga o loo agai i ai lona mafaufau i lenei taimi, ma ia ta‘ua ai, e lei taitai se olaga ma o loo lava pea lona malosi ma le tele o lona taimi o se alii talavou e lei faia se aiga, e faaauau ai pea ana aoaoga e lē gatai le tomai ua ia te ia i le taimi nei, ae fia manao foi e aapa atu i nisi tomai.
O lana luitau foi lea mo nisi fanau talavou a Samoa o loo taasē pea olaga i le malosi o taa‘iga lē aogā a lenei olaga, ina ia fai nei loa se isi suiga, ae fai se mea e aogā mo oe ma lou aiga, tainane le tauleleia ai o lou nuu ma lou atunuu. Fai mai a ia, e faigata tele le olaga i Samoa, ae faafetai i lenei atunuu, o loo tele ma faigofie ona maua ni avanoa e toe faalautele ai aoaoga, ae o le talavou lava ia i le sese o ana filifiliga o le a ia lē maua ai faamanuiaga mai nei avanoa lelei.
E telē le talitonuga o Alex, afai o lea e mafai e ia ua na o se tama sa amata mai se tulaga maulalo, ona ausia ni tomai tāua i lenei atunuu o loo anoanoai ai le mau fai‘ai atamamai, aisea la o le a lē mafai ai foi e isi uma alii ma tamaitai talavou ona maua nei faamanuiaga. E faatāua foi e Alex le sa‘o o tagata e te faauo ma mafuta i ai, i latou e aumaia fautuaga lelei ia te oe, nai lo le tatai o oe e fai mea leaga ma soli le tulafono. E pei ona ta‘ua, o le alii e lei faia sona aiga, ma o lana faamatalaga, e leai se mea o le a vavevave ai e saili se toalua, ae se‘i faaaogā lelei le malosi e faamae‘a ai le aoga ma faamautu se galuega. E lē faigofie ona avelua ni mea tetele i se taimi e tasi.
O le ki, ia galue malosi ma ia faamaoni, aua le fiugofie, ia iai le agaga lotomaulalo e faalogo atu ma talia fautuaga lelei ma isi, ae o le sili ia tatalo i le Atua mo lana taitaiga ma faamanuiaga. Ua ia matuā talitonu i le moni o lena fua, mo se lumanai lelei o soo se talavou.
