O filifiliga o le loto i se laasaga fou e lē faigofie i le tuuina atu atoatoa lea o lou tagata i se mafutaga vavalalata ma le Atua. O le taumafai o le fili ma le tiapolo e faapisi le mafaufau i mea o le olaga ae ua itiiti taimi mo le Atua, atonu e fafau mai ai le ola faatuatua ma le talitonu ia faia se filifiliga tonu i ala e manuia ai.
Ua savalia nei i le luasefulu tausaga talu ona mulimuli e faia le finagalo o le Atua, e ala i le soifua tuuina atu, auauna atu ma saili i le Atua e ala i le faia o lona Finagalo ma faataunuu ana folafolaga tonu.
“O taimi o le filifiliga na molimauina ai le Aao laveai o le Matai Sili i le lagi. E vivii a’e ai loto i le Atua ona o nai tuaa na o latou asaina ia manuia ma faalauleleia ala e ao ona savavali ai. O nei faasinomaga e lē mafai ona mavae i loto ma agaga, lea ua tino mai, o le agaga o le faagaeetia, lotomaualalo ma le olioli, ua lē mafaia e upu ma tala ona faamatala,” o ni lagona ia na faaosofia ai le susuga ia Pastor Tago Bruce ma le faletua ia Inez Manu-Sione i lo la valaauina na faataunuuina ai se sauniga paia i le Aso Sa, aso 2 o Iuni, faapea isi auauna a le Atua, Pastor Alamalosi ma le faletua ia Peaulele Taaseu, Pastor Sam & Judy Eki.
O miti ua leva ona fafau ma faaata mai e mafaufauga, ae sa galulue i ni metotia e faatino ma faataunuuina ai lenei faamoemoe e ala i le tatalo pea ma tuu atu i le Atua. E talitonu, o se valaaulia na tofia faapitoa mai e Iesu le Ao o le ekalesia, e lagona ai le agaga faafetai tele i le Atua ona o avanoa faaauro e faatino ai nei tautua mo tagata o le Atua, a’o maua le taimi.”
O le ekalesia Hosanna Church e tusa o se vaega o le fesootaiga o ekalesia i le lalolagi, ua oo atu i le 15 aulotu i Kuiniselani. O le tala moni, o auala ua molimauina mai le tele o taleni ma valaauina eseese, o misiona uma mo le tala’iina o le finagalo o le Atua i totonu o ekalesia. E lē gata o agavaa ma tulaga i galuega i soo se matata ma metotia, o valaauina lava mea uma, ae o le soifua ofoina mo le Atua o le filifiliga ua mautu i le loto o le tagata.
O se lamepa e ao ona faasusulu i soo se taimi e lē na o le lotu, poo le aiga, galuega ae tufa atu i tagata lautele ma faalapotopotooga atoa ma ona tala atu, ua lē na’o upu ma tala, ae ua faagaganaina ma ua tino mai.
Mai le toatolu o i latou sa faapaiaina ma faauuina e ala i le siitia o aao o ana auauna auā le valaauina, na ta’ua e le faletua ia Inez Manu-Sione (Tongan) na faaalia sona finagalo ma siitia ai le Ieremia 29:11, “Aua o a’u nei, ua ou iloa manatu ua ou manatu ai ia te outou, o manatu i le manuia, a e lē o le malaia, o loo fetalai mai ai Ieova, e foaiina atu ia te outou le iuga e iai le faamoemoe.”
E mautinoa o le fuafuaga a le Atua e faamalosiau ai a’o feagai ma le tele o isi lu’itau o le olaga ina ia soifua i se olaga mautinoa e iai le faamoemoe i soo se mea a’o tau faamae’aina o nisi o taumafaiga o le poto salalau, e maua lava avanoa e tautua ai le Atua ma Lona finagalo, ma e moni lava Ana folafolaga.
O lenei foi filifiliga maumautu, na faavae mai i lagona o le alofa lē faatuaoia, na foaiina mai le Alo e toatasi o le Atua e maliu ina ia faaaolaina le lalolagi, lea ua ‘ae’ae ai le lalolagi atoa. A tatou talitonu ma le mautinoa, e lē mafai e pa o seoli ona taofia mai le tagata mai le tala’iina atu o lenei ALOFA.
O finagalo o susuga i Pastors na faauuina ma faaee i ai aao o ta’ita’i o le ekalesia, e tele tagata e ono faafetaia, e lē gata o mātua ma aiga, o i latou na asaina le gasū o le taeao na afua ai nei manuia, aemaise o tagata uma na lagolago ma fesoasoani faapea ta’ita’i le susuga ia Senior Pastor Manuia ma le faletua ia Ruta Aloalii ae tainane le susuga i le Aposetolo ia Pastor Joshua Asafo ma le faletua ia Helen Avia.
O i latou o avefeau mo tagata e tala’iina ma faasoa atu le Alofa matalasi o le Atua. E pei ona vaaia i nei vaitau i le atulasi o alo ma fanau mai le Pasefika ua faamanuiaina i soo se taleni, e faapea foi se meaalofa ua tuuina mai e ala i le auaunaga i le Atua.
E toatolu susuga i faifeau ua faauuina tofi faafaifeau e aofia ai Pastor Alamalosi ma le faletua ia Peaulele Taaseu, Pastor Sam & Judy Eki faapea se tasi foi o alo o le faafeagaiga Uniting Church, le susuga ia Pastor Tago Bruce ma le faletua ia Inez Manu-Sione.
