Na matuā tumutumu faatasiga o le vaiaso atoa ua tuanai i le talanoaina lea e le mamalu lautele o sui o afioaga o Tulafono ua toe iloiloina nei.
O se vaega o se galuega tele ina ia toe vaavaai ma silasila i ni suiga talafeagai o tulafono o iai nei, ia ua silia i le ta‘i 50 tausaga o faaaogā pea.
O le mau ua mafua ai ona faatu le Komisi o le toe teuteuga o Tulafono ona o le finagalo o taitai o le atunuu, ua tele tulafono e lē o toe talafeagai ma le suiga o le soifuaga o tagata Samoa i lenei vaitau, ma e tatau ona toe soalaupule lelei le atunuu ma le Malo e ala i Matagaluega o loo nafa ma lenei galuega tele, i auala e toe faaleleia ma faamalosia ai nisi o tulafono, pe ua iai foi ni tulafono ua tatau ona aveese mai i Tulafono o le atunuu e pei ona aiaia ai i le Faavae o le Malo Tutoatasi o Samoa.
O le motu o Upolu la lea na amata ai ona soalaupule nei tulafono ma o se tasi lava lenei o tulafono ua matuā malosi ma toatele ua saunoa i ai, o le tulafono lea o Faiganuu o le 1990.
O le tulaga mautinoa ua toatele ua faaali finagalo, o le tulafono lenei e lē o atoatoa ona e lē o maioio lelei mai nisi nafa o le pulega a alii ma faipule se‘i vaganā ai lava vaega e lua o le teuteuga o aai ma le feagai ai ma atina‘e o afioaga i ona itu eseese. Na tele ina lāgā faasalaga fai a nuu aemaise o le ono fesopoai ai ma le Tulafono e ala i galuega faatino a le Matagaluega o Leoleo.
O le mau a nisi, afai ua na o le pau lea o nafa e faasino i pulega a alii ma faipule i afioaga, o le a tele se aafiaga o le va o pulega a alii ma faipule ma tagata lautele o totonu o afioaga, auā ua leai se faaaloalo a o se mamalu foi o pulega.
O suiga ua iai le unaiga o le aiā tatau a tagata, na laga e nisi o alii ma faipule, ua faaopoopo i le faatuatuanai ua vaaia nei mai i tagata lautele o afioaga faasaga i nei pulega.
O le mau a nisi, e talafeagai lelei lava tiute ua tuu mai e le Tulafono lenei o Faiganuu o le 1990 auā a vaavaai i isi faiganuu ua fai lava e i latou faaiuga ma faasalaga ogaoga e aunoa ma le faatinoga o laasaga e talafeagai faato‘ā oo ai i ni faaiuga e pei o le ati ma le lau, o le mu o le foaga ma le faatulai ese o nisi o aiga.
O le faafefefefe lea a le toatele ona o le malosiaga lea o afioaga e tulai mai ai le tele o faamasinoga i lenei vaitaimi, auā ua faatāua foi e le toatele latou o latou aiā tatau e pei foi ona sau ai i le Faavae o le Malo o Samoa.
O le velo‘aso faatasi la o le atunuu i ni auala ma ni alafua e tatau ona uia e afioaga uma, lea ua faafetaia ai e i latou o sui o le Malo o loo faasavalia lenei faamoemoe, le faatinoga o feiloaiga nei.
“O le tāua, auā e mae‘a loa nei felafolafoaiga, ona ave loa lea o finagalo nei ua tuufaatasia ai se lipoti a o lei toe foi i taitai o le atunuu auā le pasia ma le faamalosia o ni teuteuga,” o le saunoaga lea a se tasi o sui o le Komisi o le toe Iloiloga o Tulafono, o le tamaitai o Fanaafi Le Tagaloa Pita.
O nisi foi o le atunuu ua lāgā le suiga ua iai tupulaga ma le tele o sauāga ua vaaia faasaga i fanau teine a le atunuu, lea ua tāpā ai foi se sao o alii ma faipule o afioaga ina ia faamalosia ai le malu puipuia o fanau a afioaga taitasi.
O le mau a le toatele o tamā matutua o le atunuu, ua lē o toe vaaia le faaaloalo sa iai le atunuu i le va o tupulaga ma tagata matutua, ma a taumafai atu foi nuu e faatino le tiute o le faia o tapu ma sā, e lagalaga mai foi le saolotoga e ala i aiā tatau faaletagata.
O le mafuaaga lea o le fenumiai o le tele o faaiuga fai i lenei vaitaimi ma agai ai le tele o mataupu sa mafai ona fofo ma fai i ai faasalaga i totonu o afioaga, i le Faamasinoga o Soligatulafono.
O le vaiaso lenei ua faatautaia ai nei faatalatalanoaga i le motu tele i Salafai.
