Talanoaga ma le Palemia – 4 Nov, 2010

Radio Samoa: E iai le faamoemoe faapea e te malaga mai i le polokalame lea a le autau apu.

Palemia: Ou te alu atu i le mea lena, ae a manao ia te au, ou te fai a i ai, ‘sau ta o i Samoa e fai ai, ta te o a faavaai i mea ia.’ E mafua ona ou manao e sau e ave mata e alu e faavaai, leaga o lena a e fesili, poo ā mea o fai ai. E leai la se aogā ma te talanoa ai na o upu, ae ou te manao a sau ma te o e faatilotilo i mea ia na fai.

Radio Samoa: O le vaega mulimuli lau afioga i le Palemia. Se‘i toe faamatala lava, o le ā tonu le uiga na e saunoa ai i le faamatalaga lea poo se saunoga ia John Campbell, le lē toe foi atu o John Campbell i le lua interview, ua misi ai le avanoa e faatoese ai, ae o se faamagaloga mai le Malo?

Palemia: O le mea lena na ou manatu i ai, pe ana faapea e sau i le aso 4. Ona ou faamatala uma a lea iai o mea ia na sese ai lana faasilasilaga lea na fai muamua ina ua uma le feiloaiga ma Misa. O le a ou faamatala uma a i ai mea ia na sese. Muamua o le sese, o le nofo ma faitau fua a tatou loans, ua oo a i le selau ma le fia miliona. E leai na o le 35 a miliona mea ia ua maua e le Malo o Samoa. O le sese lona lua, o le nofo ma manatu e na o le tasi le tausaga e faatino ai mea uma. Ae o lena e alu atu a i le lipoti, e 4 tausaga e faatino ai galuega. O le sese lona tolu, o le nofo ma tilotilo i vaega tupe ia na avatu faapitoa i lea atinae ma lea atinae, ma lea galuega ua fai, ma manatu o galuega faaiu ia. E leai, na o le tasi a le tausaga lena e agai i ai fuainumera na. Na e manino a i le ulutala, Year One. O lona uiga e iai le Year Two, Year Three, Year Four, ae faatoa Budget a pe a oo atu i le 2011 e pei ona masani ai mea nei o Malo, 2012 le 2013. O tausaga na e 4 o lea e aafia ai le lipoti lea, e faitau ai ae lē malamalama. O le isi sese tele, o le sau lē alu e talanoa i le High Komisi o Niu Sila, o le tagata lena e sili atu ona malamalama i galuega ia e fai ma le malo. E musu e talanoa i ai, ae alu talanoa i le vaega au faipolokiki laia, ma sese ai ma ana lipoti ia na alu atu faaali iina. O le isi sese sa ou ta‘ua, o le nofo ma faaopoopo fua i ai a tatou nonogatupe, e leai sana feau e talanoa ai fua i mea na, e lē o ni meaalofa mea ia, o a tatou a nogatupe e toe totogi. E tele a la mea na ou nofo ma ou ta‘ua foi i ai, ‘ua tele lou sese o lou agai fua i isi. Sa tatau a na lote e oe na o tupe na aumai Niu Sila. E sili atu lena ona faigofie ona faamatala atu, auā lea a e faigofie ona tau atu i le lipoti lea, le faaluina o seleni na. O mea na e sese, ma isi foi mea ou te ta‘ua i ai, ia na ou fai loa lea i ai, ‘ia aumai loa sina au faatoesega, ia ma ou faamagalo ma ou lē faasalalaua, ma lē iloa e tagata sia ta mea lea ua fai.’ O mea la na sa ou naunau e ta‘u i ai, ia lea la ua ou faalautele atua ma atili ma ai. Masalo ua atili afuafu ai i faamatalaga la ia sa ou taofiofia. Ua mateletele, matelele i lana TV show lena, ia ou tapā loa ma le ofisa ou fai atu, ‘tatala loa mea na e faasalalau’. E lei uma la faasalalauga, toe tasi le isi faasalalauga tele lea o le a alu atu, poo le Aso Faraile nei poo le Aso Toonai. O le a alu atu atoa ai loa auiliiliga uma o mea o tupe taitasi na faaalu e tau mai ia Aukuso, lena e i totonu o le lipoti lena na alu atu ma ia ae lē malamalama ai. Alu atu ai loa ma ata uma o mea la i tuā, mea ia na musu e alu e vaai, lea o le a faaata atu i le Savali ma faalauiloa atu i le lalolagi, ma atili tofu ifo ai a i lalo lana fetu sa tu maualuga iina, talu ai le nofo nofo fua fia oso mai i Samoa. Sa maualuga foi le fetu a Barbara, ae na goto ifo foi i lalo ina ua oso mai fua fai ana mataupu faalemanuia i Samoa nei. Sa tatau ona alu ifo i isi atunuu e sao ai, ae aua le sau iinei. O le tatou atunuu lenei, e lē o se atunuu e nofo nofo a lea tamai palagi sau faavalea le atunuu lenei.

Radio Samoa: Ae pe ua avatu se foai a John Campbell i le sunami ua naunau ai e faailoa ma faalauiloa atili lenei mataupu?

Palemia: E lē o se mea lena o la e naunau i ai. Ana faapea e naunau e faaali le mea sa‘o, manū e tatau ona sui lana mataupu i le taimi o le talanoaga ma Misa. Ia o mea nei na fai ia Misa, ‘Faafetai telē a Misa. O lea ua ou malamalama lelei i le faaaluga o tupe a le Malo Samoa talu ai le lipoti lenei. Ia o le a ou alu e fai se faasalalauga lelei’. Ae alu atū, e ese mea ia na sau.

Radio Samoa: Faafetai tele lava i lau afioga i le Palemia, Tuilaepa, ua maua le tatou fesootaiga matagofie i lenei afiafi. Ia ua faafofoga manino foi le paia o le tatou atunuu, e pei ona māua mai le ta faatalanoaga. Ae iai le faamoemoe, o le a toe maua foi se isi faaopoopoga o le tatou polokalame i le vaiaso fou, i le pule faasoifua a lo tatou Matai i le lagi.

Palemia: Toe tasi a le mea lenei. Manatua lelei, ua uma ona faasalalau faafia e le Malo Niu Sila, o lea ua matuā fiafia latou i le faagasologa o polokalame, ma le faaaogaina o a latou seleni. Ua uma foi ona faalauiloa mai e Ausetalia, auā o lea e iai o latou Hai-Komisi iinei, lea e malamalama uma a i mea uma. E leai la se mea tatou te popole ai i faasalalauga a John Campbell. Le ala lena, ona ou lea ou te iloa, o loo mafatia uma le toatele o tatou, ona o le faaleaga lea na fai e Campbell, e leai a ma se iota e tasi o afaina ai lo tatou va ma Niu Sila ma Ausetalia. O le latou vaai, o le faiga a ia o le au tusitala, e tau sue ni o latou lanu, ona o lea fai faamatalaga faapea. Ae o lea a, e leai a se mea e popole ai lo tatou atunuu, o loo maualuga le vaavaai mai a le Malo Niu Sila ma le Malo Ausetalia, ma le Malo Saina, ma le faletupe o le Lalolagi ma le faletupe o Asia i le faafoega o le Malo. E leai a la se mea tou te popole ai i le tulaga lena. A o lea a ua faatino le tiute o le Malo, ua molia le susuga ia John Campbell i luga o tulafono a Niu Sila, ina ia silasila toto‘a i ai le faalapotopotoga lea, e tusa ai o ituaiga uiga ia mata muamua ma le taufaasese o loo fai e John Campbell faasaga i le tatou Malo. O toe upu na e faamafanafana atu ai foi i le tatou atunuu, ae pei ona mātau, e lē o ni uiga ia, ma ou te lagona foi, e tatau ona ou tausi mamalu, i le mamalu o le atunuu lenei. E lē o le tafao tafao lava o lea tamaititi i le po, ona sau lea, fea a le mea e maua mai i ai le Palemia o Samoa, tope ai iina faalēmamalu mea o talanoaga e avatu i mea tāua e aafia ai lo tatou atunuu. E lē faapena ni uiga o se taitai e faatāua e ia le mamalu o le atunuu lenei. Mea la lena e lē malamalama i ai le tamaititi lea na sau. O lea sa ou taumafai e fai aloaia le ma talanoaga, e fai i totonu o le ofisa o le Palemia, ma ma o aloaia e faamatamata i galuega uma ia na fai. E lē o se mea leaga, e lē o se mea e nanā. Ma o le mea pito sili ona tāua, o lo‘u alu e faasino i ai, ‘o mea ia sa faaalu ai le seleni e fia miliona e pei ona faamaumau e le tatou Matagaluega o le Tupe’. O le tele o tagata e lē o malamalama i le mea na. O tupe uma a mai fafo, e ave uma ia tatou teugatupe e le Matagaluega o le Tupe, ona faasoasoa mai ai lea e latou. O loo iai ma le Suetusi a le Malo, e latou te faamaonia vaega tupe o galuega uma e fai e tamafanau a le atunuu, o latou o loo faatinoa konekalate i le fausia o alatetele, fausia o alavai, i le tosoina o le eletise, faapea foi ma taligalu o loo fausia nei. O le tele foi o atufalega ua faia i uta, ma le auala faalava ua fesootai atu ai Saleapaga agai i Lalomanu, lea na o mai le malaga a le Minisita o le Va i Fafo ma le toatele o le mau taitai o le Palemene, mau faipule o le Palemene ma o ai luga ma tilotilo i mea uma sa fai, na matuā fiafia ina ua vaaitino i le faatinoga o galuega. Pei la o tulaga na, o lea ou te talanoa atu, leaga e toatele le mamalu o le tatou atunuu, peiseai iinā ua faanoanoa tele i faasalalauga a le palagi lea. Ae o lena la ua ou talanoa atu, ia mau pea le toovae. O lea a e iai Mose ma le Au Perofeta o loo vaaia lelei mataupu a le tatou atunuu. Ae o tatou foi lea ua agai i le palota. O le isi mea lena ua atili ai le sese ai si alii ia John Campbell, ona o lea e behind ai foi ma isi o tatou, ia o lea foi e fagafaga mai i le Malo ma mea o loo taumafai e fai. Aemaise a le taimi lenei i le agai atu i le faigapalota, e tutupu ai mea ia. Atonu la o lea ua masaa le ipuvai, ia atonu o lea ua nofo nofo nei latou sa latou tafu le afi, ia ma tilotilo i fetusiaiga nei, i le taumafai atu o le Malo e puipui le mamalu o le tatou atunuu, ina ia aua nei aafia i ituaiga o upu ia e faaleaga atu ai lo tatou atunuu i fafo. O le upu e masani ai tatou, ‘Aua le pupu i Fale’, e lē maua ai se ‘ai o Samoa. E faatoa iloa a o oe o le Toa, i le tulaga o le va ma isi atunuu, ae lē o le pupū i fale. Ia o le tulaga lena o le talanoaga i lenei itula afiafi. E faamalulu atu foi i le faafogafoga mai a le atunuu i le tulaga o le talanoaga, o lea ua ou talanoa atu i upu sasa‘o ina ia vave malamalama ai foi lo tatou atunuu, i le tulaga o loo taumafai nei mo le mamalu o Samoa, ina ia aua nei faatasina e ni tamaiti, e tafafao vale tafafao vale a, poo fea le falesiva sa tafafao ai i le leva o le po, ona o atu lea fai ituaiga amioga faapea e lē talafeagai ma uiga faatamalii e tatau ona faaaloalo ai i se taitai o se atunuu. O le faamatalaga lea i lenei itula o le po. Ia manuia tele le faafogafoga mai a Samoa i lenei itula o le po, Soifua ma ia Manuia.