Radio Samoa: E iai se tulaga o e lē fiafia ai ia John Campbell, poo le mea a lea ua ala ai ona iai le tulaga foi lea sa e taua ai, ‘o le a matua vaai ai lava le mea o le tamaititi tautalaititi i le mea sa e faia i lau Sui Palemia. E iai se tulaga i i le va lea?
Palemia: E leai. A foi lea ua ou iloa le uiga o le tagata lea e taufaasese, o le ala la lena na ou tapā ai loa. Manatua foi e fai foi e isi Palemia, e isi taitai o malo, ‘aumai muamua au fesili’, Ina ia sau ai tali, aua nei puea i le tulaga foi lea, e tapena lelei, ia sau foi le tali o la e tali lelei mai ma malamalama ai le mataupu. Aua a faateia se taitai i se mataupu e lei tapena i ai, e le iu lelei foi lena talanoaga. O le mea la lena na ou manao i ai, ia aumai lelei. Auā manatua foi o mea nei o faatalanoaga faapea, o le sao a o le faatalanoaga, ia malamalama le mataupu. Ae aua nei sao se mea lea, o lou sau e lamalama. E te lamalamā loa se taitai e faaleaga, e lē o se talanoaga lelei la le mea lena. O se talanoaga faatogafiti le mea lena, o lea e te taumafai e pue le taitai, o le mea la lena na ou taofia, ia aua nei tupu. O uiga na ou te lē fiafia i ai, o le mea o le fiapoto. Aemaise o lea ua uma ona sau tilotilo uma a i galuega na fai ma avatu faamatalaga, o mea tau tupe na faaalu i lea atinae ma lea atinae, ae alu atu toe fesili mai poo fea faamatalaga, ae la na alu atu ma faamatalaga, na e i lalo ifo o lona isu, pe a tilotilo i lipoti ia na ala atu. O lipoti a ia na avatu i isi taitai o malo, ma aumai ai latou faamatalaga o lea ua manino mea uma. Mea la lena ona ua lē sao la iina, lena la ua tomumu ai fai mai ua ou lē tuu atua le saolotoga o le autusitala. O ā saolotoga o lea na ou fai atu i ai ma te feiloai i le aso 4 o Novema? Ia pei la o le tulaga lena. Ae a tilotilo uma a i le ata lea na avatu, e iai ni talanoaga taualoa faapea e fai i fafo i le mea e paka ai taavale. O se mataupu e matuā sili ona lē migao lea mea, e fai e se tusitala i se taitai o se atunuu.
Radio Samoa: Aua o lea sa ta‘ua, o le aso lava lea sa fuafua e fai ai le lua fonotaga i le taeao, peitai ua lē faataunuuina la, ae lea la ua osofai ai foi lea ma ausulusulu solo e saili lau afioga i le Palemia, lea la sa maua i le po lea. O lea sa fuafua e fai le lua fonotaga i le aso lea?
Palemia: E leai se ma talanoaga na fuafua e faia. A foi lea ou te fai atu na aumai lana talosaga i le email, lea la na alu atu i le ata lena, na ou email atu ia te oe, o Novema i le Aso Tofi, taeao la iinei ta te feiloai ai. A o lea e manao a e fai ai a i le taimi lea, ina ua na iloa e leai se isi taimi ou te avanoa ai. E faapena le ala o mea. A faapea e te manao o le tusitala iina e alu e talanoa i le taitai o Ausetalia, le taitai o le malo, o le Palemia, pe te alu e te talanoa i le Peresitene o Amerika, e logo muamua le ofisa, poo le ā le aso e avanoa ai. Ae lē o le alu o lau talosaga ma e tu a e oso i le vaalele ma e alu, ma e manatu e te alu a, poo fea a le mea e te maua i ai. Ae faia le mea lena i le Peresitene o Amerika, e te iloa le mea e oo i ai, o le pulufana o oe. E sa tele ona e faia se mea faapena, auā o la e iai leoleo e leoa le Peresitene. E sa tele i mea o tagata faapea ona osofai faafuasei atu se taitai o se Malo i se mea pogisa e faatalanoa i se polokalame tāua faapenei. O lena ua uma ona alu atu, na o le pau a le faasilasilaga na ou avatu na ou saini ai, la e saini aloaia ai a‘u, ma o le mea lena e tatau ona faatāua e ia, o se ioega ua ou avatua, e saini ai le Palemia o Samoa, ‘o lea o le a fai le ta talanoaga i le aso 4 o Novema.’ Sa tatau loa la ona usitaia le mea lena, ma sau i le aso 4 o Novema. Ae aumai nei le tusi ia te au tala atu ananafi, faamalulu mai, ua leai ni tupe. Oi a iloa a la e leai ni tupe a o le ā le mea na talosaga mai ai e sau.
Radio Samoa: O le ā la mea lea sa alu atu ai Campbell i lo tatou atunuu o Samoa?
Palemia: E ese le isi ana mataupu lena na ala ai ona sau. Na logo mai au i le afiafi lena, o lena na sau i le isi ana mataupu, ae o lea la ua fia faaaogā le avanoa lea, e sau ma kope atu ai ma se interview.
Radio Samoa: Auā pei o lea sa fesiligia foi e le toatele, auā o lea la sa nofo nofo Campbell iina mo nai aso. Poo le ā lava le mea sa lē maua ai a se lua taimi ii, ina ua lē maua se taimi e talanoa ai i le po lea sa oo atu ai Campbell.
Palemia: Manatua foi, o lea e sau e feiloai i le taitai o le atunuu. E afe ma afe mataupu e faafeagai ma le taitai o le atunuu. O le mea o le reporter, e leai ni ana mea e faia. E lē faapea la e sau loa maua sona taimi e alu ai e feiloai ma le taitai o le atunuu. Vaai i ai i le anoano o tagata o le tatou atunuu, a o atu i totonu o lou ofisa, e faatali a sei ou avanoa. E oo a i tagata i Savaii, e logo mamao mai au, ‘faamolemole lau afioga pe mafai ona matou,’ ona ou fai atu lea, ‘o le Aso Gafua, poo le Aso Lua, poo le aso a,’ i le taimi lea, ona o mai lea i le vaa e faatatau tonu mai a i le taimi lea. O lea la e sau e talanoa i le taitai o le atunuu lenei, o loo afe ma afe ma afe mataupu e sili atu ona tāua o lea e faafeagai ma le taitai o le atunuu. E le faapea o se tagata foi lea e sau o nofo nofo i aso uma, e sau a maua loa ma le avanoa.
Radio Samoa: Faamolemole lava Tuilaepa, o lea foi sa iai i le Press Release i lenei afiafi ma le tulaga foi e pei ona ta‘ua ai e John Campbell le 111 miliona tala. Pe mafai a ona e toe faamanino mai, le 68 miliona tala ia le tau atoa, ia e pei ona taua ai foi le 35 afe ma le 33 milioa lea tatou Samoa?
Palemia: Leai. Na o le pau a le aofai o fesoasoani na folafola mai e atunuu, na o le 57 miliona Tau mai le taimi o le lipoti lea, na o le 35 miliona ua taunuu mai. Ae tau mai le taimi lea ua 68 miliona tupe ua faaalu i le tele o galuega ia ua fai. Lona uiga o le 33 miliona ia e sili ai, o a tatou a seleni. A o le sese la o John Campbell, ua nofo ma faaopoopo i ai, a tatou a nogatupe. E 95 miliona mai le faletupe o Asia, ma le faletupe o le Lalolagi. O a tatou a nogatupe e nonō mai, e lagolago ia tatou galuega toe fuataina. E le gata la i le sunami, ae o le financial crisis. E iai ma le 15 miliona e sau foi faanogatupe mai le Malo Saina, e tuusao mai a e Saina ia, e le aumaia i le Malo ae tuusao mai a i nuu foi ia e talosaga atu mo a latou faleaoga e fia fau. Ua nofo la le igoa ma faaopoopo uma ai ma mea ia. E le o ni meaalofa mea na, o a tatou a nogatupe e toe totogi. O le sese atoa lena o le lipoti a le alii lea na fai, sa tatau ona sau muamua fesili, pe fia le tupe ua sau ae pe fia foi tupe ua faaaogā. O le isi mea ua tele ai le lavelave, o le oso fua talanoa i tupe a isi atunuu. Sa tatau a ona talanoa i tupe a Niu Sila ia, na o le 14 miliona, ma le faaaluga. Lea na alu e fai ai fale, atoa foi ma pili o tamaiti, ua uma la ona faaaogā. O mea na sa tatau ona sau fesili i ai, ae lē o le alai fua i isi mataupu e lē malamalama ai, lea la ua atili lavea ai ia te au i a‘u faasalalauga ia e alu atu. O le ala foi la lena, o‘u lauina ai le faavasivasi ma le faavalevalea, i tulaga foi na talanoa mai ai le isi fai news mai Ausetalia. Le tulaga la lena lea sa ou manatu, a sau ona ma talatalanoa lea, ona ou faasilasilaina mālie lea i ai, ma ou tapā ai e faatoese mai ia te au, ma ou faamagalo ai, ia e lē faalautelea. E sese la le sau ii fai ana mea na, ia lea la ua ou faamatala aloaia atu loa i le tele o au faasalalauga ia e alu atu. Ma o na e alu atu uma a ia tatou loia, e lau uma ane i totonu i le taimi e faatalanoa ai le mataupu lea ma le faalapotopotoga lea a Niu Sila, o loo latou leoina mea ia o faamatalaga soonafai a le autusitala. O ina tonu la lena na ua fefe ai. E pei foi o le tamaitai o Barbara.
Radio Samoa: Sa e ta‘ua Barbara ma John Campbell faapea o le au fia mata muamua, ma e lē pule mai tua aiga. O le ā le uiga o lau saunoaga lea Tuilaepa?
Palemia: E lē o mai iinei faamasinosino. O le ā le mea e o mai ai iinei faamasinosino le Malo Samoa? O lena foi, a aumai loa meaalofa e aumai, ona lafo mai lea i le atunuu. E iai foi nai a tatou seleni lena na avatu i Kalaiesetete, ia tatou te lē fesiligia na mea. A avatu a iina, e pule ai a le Malo Niu Sila, e tatou te lē toe fesiligia na mea. Lea foi e aumai a e le Malo Niu Sila, e lē o toe fesili mai a. Na ona avatu a o lipoti, avatu lipoti ma tilotilo i ai.
Radio Samoa: O loo ta‘ua ai le auaufaatasi o John Campbell faapena foi le vaega o le SANGO, aemaise foi le faatonu o le nusipepa o le Observer, sei saunoa Tuilaepa i le vaega lea?
Palemia: O le faaletonu lena o lea na tupu i le mataupu lea. O le sau o John Campbell iinei, ma talimalo ai le tama lena o Lamesa. A lea sa faaali uma mai a, e galue mai ai i totonu o le ofisa ma run ai ana lipoti i totonu o le ofisa o le Observer. O mea la faapena, e le mafai ona taua o se lipoti e tutoatasi. Lona uiga o se lipoti e fau faatasi ma i latou ia ua uma a ona lauiloa, o le a lava le mea lelei inei e fai, e leai a se upu lelei faapena, na pau a le mea o le faitio, faitio, faitio. E oo foi i le SANGO la lea, soo se mea a e fai e le Malo, e taulamua a le SANGO e tetee pei foi o taavaleafi. Taulamua foi le SANGO e tetee i na mea. E oo foi i le vaega lea o le Tautua, tasi lena vaega o lea sa faauouo i ai. O le tulaga la lena o lea na tele ai le faaletonu o Campbell. O la e manatu o lea e lelei tagata ia latou te o faatasi, e le o iloa o lea ua faaaogā e le vaega ia, e faalauiloa ai foi o latou uiga tetee mai i le Malo. O lena la ua atili sese ai iina ma John Campbell, ona o le vaega lea. E iai ma le alii lea o Molesi, le tusitala foi lea, soo se mea a e tusi, e leai a se mea lelei na te tusia, na o mea valea uma e tusi e lena foi tusitala.
Radio Samoa: E ono maua se lipoti auiliili o mea taitasi ia na faaalu ai seleni nei o loo fesiligia pea, a o lei oo i le faigapalota o le tausaga fou?
