Talanoaga ma le Palemia – 4 Nov, 2010

O le tulaga la lena, peiseai o loo tele le tatou atunuu foi e tilotilo la i le mea o fai atu ai le palagi na faapea e sa‘o, ae lē o tilotilo poo fea le mea lea e fai ai le talanoaga lea sa pue atu i le ata. O tafatafa o mo mea e paka ai taavale. E lē faapena ni mea e talanoa ai se palemia o se atunuu ma se tusitala.

O lena la sa ou tusi i ai, o lena ua faasalalau atu a‘u tusitusiga sa ou taofiofia, ae tei ua ou faalogo atu ua faasalalau le lē mafaufau iina, na la ua tatala atu loa a‘u na ua alu atu i le internet, na la faatoa malamalama ai le toatele o tagata. O le tulaga sa‘o la lena, e ui a ina toatele foi tagata lē malamalama o le tatou atunuu.

E vaai ane loa o le papalagi faapea lea e sa‘o mea a le papalagi, ae lē sei vaai ane pe faapena se mea o se Palemia o se atunuu, le sau o le mea o le tamaititi manao e fai le talanoaga i le mea e paka ai taavale ma le pogisa, ae ua tea le 11 i le po.

O lena la sa ou tusi atu i ai, ua tele lou lē mafaufau. E tiga ona tau atu ia te oe le taimi ta te talanoa ai, ae sau a e manao e fai le mea lena e te loto i ai. O le tulaga sa‘o la lena. Na ua uma ona ou faasalalau atu foi i website ia malamalama ai le atunuu o ē faitautusi.

Radio Samoa: O le tulaga lea e pei ona ta‘ua e le alii lea o John Campbell, i le faamatalaga foi lea, e lē fia alu atu i le lua interview, pe lē fia agai atu i le lua talanoaga lea faapea e o e faasino fale, i le tele o fale ia sa faia. Na pau le mea lea e manao ai John Campbell, na o le fia aumai lava o le ripoti.

Palemia: O le tulaga la lena e lē mafai ona ou talanoa ae ma te lei o e faavaai i fale. Auā e na o le tolu fale ia na alu e vaai, ae 862 fale ia na fai. Lea sa tau fesili poo fea mea ua alu i ai tupe, ae na o le 14 miliona tupe a Niu Sila.

A o le mea o le oso foi lele e talanoa i tupe a isi atunuu, e leai sana aiā e talanoa ai i mea na. Lea la na ou manao ma te o e faasino i ai fale nei e 863 ma le alu atu tautala le gutu poo fea o alu i ai, ae o lena e alu atu i totonu o le lipoti. E 9 miliona 300 afe mea lena na alu ai i le faiga o fale na.

O le ala la lena o lena e aloalo ai ma a‘u, e musu e alu o le a ou alu e faasino lelei i ai. O le faalavelave, o lea e sau e aafia ai foi ma isi o tatou tagata ia ei iinei, mo mea o le au faipolokiki. O le faalavelave lena o lena ua sese ai ma lena palagi.

Radio Samoa: Malo faafetai tele lava i lau afioga i le Palemia. Auā o lau talanoaga i le vaiaso lea ua tuanai atu sa māua ai, e iai se vaega faapea, ua ave sese e John Campbell le lipoti lea sa avatu e le Sui Palemia.

Palemia: O le tulaga sa‘o lena. O faamatalaga uma a o lena e i totonu o le lipoti lena na avatu. O a‘u la sa ou manao sei sau sei ma o e toe faatilotilo a i le 51 nuu ia, ma ave e faatilotilo a i auala ma eletise, ma taligalu, lena na ou tau atu i ai i lau feau lena na avatu i ai. Ma e pue foi e tatou ma le ata, e le faapea o le a faalagolago i lana ata, ina ia aua a nei toe alu ma fai ni ana faamatalaga faavalevalea i fafo.

O mataupu uma la na ua avatu i le loia e molia ai i luma o le Oisa foi lea o Faasalalauga, i le lē mafaufau ma le alu atu fai faamatalaga pepelo iina, ma faasese ai tagata, ae musu e sau ma o sei ou alu la e matuā faavaai a i mea ia, na e alu atu i totonu o le lipoti lena na alu atu ma ia.

O lea ua ave uma i le Malo Niu Sila, la ua matuā fiafia le Malo Niu Sila, fiafia le Malo Ausetalia. Lea la e faafeagai au ma le Malo Niu Sila, na ua tautala faafia atu le minisita, o la e sa‘o le Malo Samoa, la e manaia le lipotia maia. Ae sau lona tamaititi faavalevalea manao e faasese mea ua uma ona silafia uma e Malo Niu Sila ma le Malo Ausetalia.

E leai a se mea o faaletonu, o lea e lelei mea uma. A o le faalavelave la lena, o lea ua taia ai ii, o lena la sa taumafai e fai se faiga ina ia faamatagā ai le tatou atunuu, aemaise o lena ua taoto le mataupu i luma o moliaga lena na avatu. Lena la e musu ai e ma te o, ou te alu e faasino uma mea ia, e faatilotilo i ai maka, mea la ia o lea sa e tau fesili ai, ae o lena e avatu i le lipoti o tupe na alu i fale ia. E oo foi la i fale ia o tatou, o la e sau fai mai e lapisi fale. E faafefea ona lapisi fale, o fale o lea e nonofo ai tagata? O le aiga lena sa pue atu, o le aiga lena e manao e tolu ni latou fale e fai. E na o le tasi a le fale. Afai e tasi le fale na leaga, e tasi a le fale e fau e le Malo. O le tulaga la lena e faale o lelei ai le mataupu. Lona uiga la, ua panic le alii ua lē maua le mea lea na taumafai i ai e fai, ina ua oo mai ou fai atu, e lē mafai ona fai le ta talanoaga seiloga ta te o muamua e faasino uma atu a mea ia na e fesiligia ai le Malo Samoa ma e fesiligia poo fea o agai i ai tupe. O lea la o le a o e faasino uma atu a, ia auala ma eletise ma vai ma mea uma ia o taligalu, ia e tilotilo i ai, ona ta o mai loa lea ta talanoa. E musu la e fai le mea lena. E musu foi e aumai ni ana fesili foi ia. Na ou manao e matua aumai lelei a ana fesili, ia aua a nei toe mulimuli ane faapea ou te lei tali atua ia mea na manao ai. O le tulaga la lena, o ia sa manao mai ma talosaga mai, ma o lena sa ou saini atu i le feau na avatu, o le aso 4 o Novema ta te feiloai ai. A o le faalavelave la lena, e manao a e sau a ia e fai pea le mea lea e manao ai, ae tuu le mea lea na fai atu le taitai o le atunuu, e fua mai i ai lou taimi. E le faapena ni mea. Afai o ita ta te manao i se Palemia o se atunuu ta te feiloai, e feiloai taualoa i totonu o le ofisa, ae lē feiloai i le auala tele. E faapena mea a tagata malamalama. E lē feiloai i le pogisa, e le feiloai i ni mea e paka ai taavale. Ae feiloai i totonu o fale taualoa ma ofisa taualoa, ma taimi taualoa. O le tulaga lena mo mea o tagata malamalama. Lena la sa ou tusi atu i ai, ‘o oe Campbell ua fai a si ou lē faaaloalo ma e lē anoano. Ua tiga ona tau atu ia te oe le taimi, ae e manao a e sau e faamalosi le taimi ma faamalosi le mea e te manao i ai. O le tulaga la lena. O mea foi nei, e tatau ona tutu tatou i le tulaga e faaaloalo mai tagata ia tatou, ae lē o le alu alu a o lea tamaititi tafaovale sau manao e talanoa ma le taitai o le Malo, pe talanoa i le aualatele, ona talanoa a lea ma alu atu. Aemaise o mea ia e talanoa i ai, o mea tāua. O mea o fesoasoani na aumai e fesoasoani i o tatou tagata. Lea la ua uma ona ave lipoti ia ma ua molimoli mai faafetai a Malo, ae o lea ua sau le tamaititi lea tautalaititi manao e faaleaogā uma lava faatamalaga na avatu. Mea la lena na ou manao ai ina ia fuafua lelei le taimi ma te talanoa ai, ma o le a pue foi e tatou ma talanoaga e fai, ma ou alu e matua ave lelei i tuā, e faatilotilo i mea ia na fai e le Malo. E musu ai la, auā e maua ai ii ana lipoti pepelo uma a ia na avatu, o le mea lena na musu ai. Ia nofo loa ma pue ata na ua alu atu ma alu atu pepelo iina, ou te musu e fai le ma interview, o le mea o le saolotoga, o lapisi uma na ia tau atua, o le ala la lena o lea na faasalalau atu ai loa a‘u tusitusiga na avatu, o lena la lea ua fiti ai, o lea ua tele ina toe tusi faamalo mai tagata mai iina, o isi papalagi ma faamalo mai, o lea la faatoa malamalama. O mea foi faapena e lē faia, e oo a ia tatou tusitala i Samoa nei. O lena la ua ou tau atu i ai, e oo a i tusitala i Samoa, e faaaloalo i le latou Palemia. E leai se tusitala iinei na te faia le mea lea na e faia. O lou alu atu sue sue aupu atu a‘u o la e fai au taligamalo, ma manao e tope le talanoaga i le mea e paka ai taavale i le pogisa. E le faapena ona faia ia mea o talanoaga ma taitai o se Malo.

Radio Samoa: Na tupu muamua lea vaega Tuilaepa vaeane lenei afiafi, i le saofaiga foi i le tulai mai i le avea ma Palemia, pe sa iai se isi mea na tupu i tua atu, e pei ona iai le tulaga i le va lea ma oulua ma John Campbell?

Palemia: E leai, e lē tupu foi se mea faapena iina i Niu Sila. E le o foi sue se mea o ‘ai ai ma fai i fafo se talanoaga faalēmigao faapea ma le alii o Key.

Radio Samoa: O le tulaga lea sa ta‘ua faapea e lē fia tali atu ai John Campbell i le tulaga pei ona iai le fonotaga na e ta‘ua i le aso 4, e oo lava i au written questions foi lea sa fuafuaina. Fai mai e lē fia tali ai. Faatoa pau a lea o se palemia e fesili atu ai ae fai mai e fai fesili tusitusia, a o John Key, Helen Clark, ma le tele lava o latou i polokiki, e fesili atu loa tali mai.

Palemia: E iai le mafuaaga na ou tapā ai. Ona ua ou iloa i le talanoaga muamua na fai ma le Sui Palemia, alu atu sui uma le talanoaga. Itula atoa na talanoa ai ma Misa, ae na o le 30 sekone na sau i luga. Ona nofo loa a ia ma fai ana fesili ona aumai lea o Misa foi lea, e ese mea na talanoa i ai Misa, na foliga mai lea, e faavalevalea Misa. Mea la lena na ou lē toe tuua ai loa se avanoa, ua ou matuā tamauina a ina ia ou puea ai, mea la lena o na e alo alo ai, ma musu ai ina ia aua nei ou mauaina ia, le ala lena ua lē sao loa, ia tomumu atu loa ma alu atu fai ana faasalalauga na. O le mea la lena o lea e tomumu ai, ua lē sao lana togafiti lea sa fai.