Radio Samoa: Matou te faafeiloai atu i lau afioga i le Palemia, lau Susuga Tuilaepa Sailele Malielegaoi. O le ta mataupu muamua, e lē o auaoa lava i le silafia i le mamalu o le atunuu, amaise foi i Aotearoa nei i luga o upega tafailagi, aemaise foi si o tatou atunuu, e pei o le malaga mamalu a le afioga i le Palemia o Niu Sila, ia Toasavili John Key, aemaise foi taitai o party. O loo faatali le atunuu.
O ā ni mataupu ogaoga sa faapena ona e saunoa i ai, aemaise foi le mataupu e toe teuteu ai le feagaiga poo le faauo a Niu Sila ma Samoa?
Palemia: O le faapuupuuga o le tele ma le anoano o mea sa talanoaina, o le tulaga o polokalame fesoasoani mai mo Samoa, faapea foi ma isi mataupu e ese ai, i le va ma Fiti, sa faga uma a na mea uma. O le tulaga a mo femalagaiga, o lea ua siitia le tulaga o le tapenaina o o tatou tagata, mai le ono i le valu masina.
O le faaauauina o le tatou polokalame foi ia e o atu ai o tatou tagata e faigaluega iinā ma toe foi mai, e lē o mafai ona maua mai i le taimi nei se tali i le faalauteleina o le polokalame lena ina ia aofia ai ma le vaega o tomai faapitoa.
E tai pei o i latou e faufale, tomai faafaieletise, tomai uelo, faakamuta, mea uma na sa faatalanoaina. Peitai e ono maua se faamanuiaga o le atoatoa ai o le faatinoga o latou polokalame mo le toe fausia atoa o le aai tele o Kalaiesetete.
O le itu sa agai tele i ai talanoaga, o le itu lava lea tau galuega. E le o lelei tele le tulaga tau galuega. O le ala foi lena e faigata ai ona toe fai se isi faiga, ona o le itu lava tau galuega e tatau ona maua, ina ia toatele atu ai o tatou tagata.
O loo malamalama lelei lava foi Niu Sila i lipoti o o tatou tagata agai i le immigration a latou, i nisi foi o tatou e o atu ma faaumiumi ona iinā ma avea ai ma faaavega mamafa i o tatou tagata iinā i le tausiga. Sa talatalanoa foi i le tulaga foi ia o aoaoga faasikolasipi, i le tāua o le faaauau ma le faatoatele foi o sikolasipi. E le gata la i lea, ae o le siitia o le seleni lea e fesoasoani mai ai Niu Sila i le totogiina o pili, lea ua faaagai atu i le Tausaga 9, 10, 11, maualuluga.
E ono oo atu ai foi faamanuiaga i aoga a Ekalesia. E iai nisi mataupu sa lagā e le media sa ma talanoa ai, i le itu lava lea o talosaga a le afioaga lea o Satapuala i mea tau eleele. Ua manino mai foi le tali a Key, o le mea ia lena, e lē mafai lava ona oo mai se latou aiā fua i mea e fitoi tonu i le tatou malo. O itu tetele na sa talanoaina.
O tulaga foi i mea o fesoasoani a le malo, sa folafolaina lava foi le itu e taulamua ai pea Niu Sila i soo se taimi e tutupu mai ai ni faalavelave faafuasei i Samoa, e pei foi ina tutupu i le taimi na oso ai le sunami i le 2009. Ia o tulaga tetele na sa talanoaina.
Radio Samoa: E lei māua i sau saunoaga le tulaga foi e pei ona ta talanoa ai le vaiaso ua tuanai atu lau afioga i le Palemia, i le tulaga foi lea e omai iinei ola ai nisi o alo ma fanau, le mau foi lea na soloia mai le 2006 poo le 2007, e tatau ona toe foi i ai tatou, e okometi lava ona sitiseni nai tamaiti na pe a faapea e soifua ae nei i Niu Sila?
Palemia: E lei aafia le tulaga lena i talanoaga, vaganā le vaega foi lea sa siligia foi, tamaiti aoga foi ia e fia omai iinei e aooga ai, le tulaga e ono aumai ai faamanuiaga o loo fai iinā iinei, pe afai e fia omai tamaiti e aooga iinei. O le mataupu lena e pei o loo lafo mai pea i le va o aoga, e laga pea e latou i le va o iunivesite.
O loo iai le fuafuaga faapena ou te malaga atu i le vaiaso fou, ona sainia lea o le feagaiga ma le iunivesite o Vitoria, e faatatau mo avanoa e fai ai faailoga PHDs o tatou tagata iinā i Vitoria.
Radio Samoa: O le mataupu lea e pei uma na ta talanoa ai poo Mati poo Aperila, lea na ta talanoa ai e uiga i le faatūina o se Itu tino poo le Media Council, latou te faia se faaiuga i le aufaasalalau leitio ma televise, pe a faapea e lape le latou auaunaga i le latou pitolaau. O lea ua toe māua atu faapea o se tali a le malo lea e faatali i ai? Se‘i faalautele mai lau afioga i le Palemia?
Palemia: E lei oo mai le fautuaga lena a le Komisi foi lea o Tulafono. Ae ia te au ia, ua siliga tali i seu se tulaga e faatū ai e le Media se latou a Fono e vaavaaia a latou amio. Ua ova i le sefulu tausaga sa matou talanoa ai, e leai a ma se mea o faia.
O le mea a lea e atagia mai, a tuufau i ai e pule a latou, e toeafe a faia se mea. Auā foi e taofiofi ai lo latou saolotoga e fai ai mea valea ae taulia ai le pepa ma saga tele ai a latou tupe i le tulaga eleelea. O le tulaga la lena ia te au a ia, e lē suia a uiga tuai o le Media e ui ina fai a le mea lea e manatu i ai le malo.
Radio Samoa: Māua se tala sa faapena ona auina atu se tusi i lau afioga i le Palemia, tauleagaina ai foi ni galuega lelei sa faapena foi ona e taumatalii ai aemaise o le taitaiga o le malo, aemaise foi totonu o le matagaluega a leoleo. Ae fai mai o se tagata lava i totonu o malu o alii mamalu o le malo. Ae talitonu o loo momoe le matagaluega a leoleo.
Palemia: O le tali puupuu atu i le mataupu lena, o lea a e iai le suesuega o loo faia nei e le Loia Sili. Ua uma foi ona ou talanoa i le Loia Sili, e lelei ia ona tapena se Komiti Suesue. E ui o le tusi na aumai e lē sainia. Ae manatua foi e faigofie a ona e faaleaga ni tagata se toatele ae lē sainia lou igoa.
Ona masalosalo ai lea o le sa‘o ma le lē sa‘o. Pau a le mea tāua, e iai cases na e ta‘u mai e faigofie ona faamaonia. Ae o le faamoemoe lena, i se taimi o i luma e fai ai se iuga i le faiga o se Komiti Suesue.
Radio Samoa: E talitonu lava le faamoemoe, e leai lava se tasi e atoatoa i le soifuaga ma le ola o loo tatou iai, vaeane foi le faafofoga a le atunuu, se faafofoga a lau afioga i le Palemia. E talitonu foi e lē o faamasino atu. Ae talu ai o loo ua manunu le toau ma faapena foi ona fetosoai faapautolo foi i le mamalu o le atunuu se tasi foi o tamalii, le afioga ia Mulitalo Siafausa e tusa ai ma le faamoemoe. Ae a tautala le tulafono, e laugatasia uma tagata uma.
E lē o iloa la poo fea na lilifa i ai le faaiuga, fai mai e lē o sa‘o le faaiuga. A soli a le tulafono, ae aumai le faaiuga na o le tolu afe e totogi, ma le 26 itula o le Community Service. Faamolemole lau afioga i le Palemia, poo le ā sou finagalo i ia tulaga ogaoga i se faaiuga mai le faamasino, ma le agaga faaaloalo?
Palemia: E manatua foi e lē feaiā a‘u ma le faamasinoga. Ae ua uma a ona faataoto i lalo o le tulafono aiaiga o faasalaga ma tulaga o mea faapena.
E telē lava le faaaogā o le faautautaga tatau, e alii faamasino e faavae i luga o molimau na tuuina atu. Pau a le mea i le taimi nei, ua ou tapā le faamavaega a Mulitalo mai lona tofiga o se tasi o komisi e pulea galuega a le Malo.
Ma o le Aso Faraile a lea na faasalalau mai ai, na faamavae ai Mulitalo ma lea foi tofiga. E na o le pau lena o le mea e mafai ona ou tali atu i ai. Auā manatua foi le upu e masani ona ave i le mea lenei o tulafono, o le tulafono mo mea o le asini. Lona uiga o lea faamatalaga e faapuupuu atu, o le asini o le mea e ulavale, e lē iloa tonu le mea e alu i ai.
O la e te manatu e alu i luma ae uma ane ua alu i tua. O la lava e iai tagata o le tulafono latou e fuafua a e latou le mea e talafeagai. O tatou la mata faapenei ma o tatou mafaufauga i mea faapenei ua uumī lava mea ua oo i ai a tatou faamasinoga.
Ae o loo manino lava le afioga a le Atua, e lē o ia i tatou se taui, ae ia agalelei pea i tagata faapea. Ia ma o taimi uma lava e te agalelei ai, o le a faapena foi ona faafaupue ai malala ola i o latou luga. O le tali lena, o le tali a mai le Atua le tali. Tuu ai pea Mulitalo tatou te aiāina fua e tatou na mea. Ae lafo pea i le Atua na te faia le taui.
Radio Samoa: O le ā se tulaga o se tali mai o Jack Chen, ua toe tatala le tatou maketi i Saina mo le alu atu o le sua o le nonu mo le taimi nei?
Palemia: E lē o taofia. O la lava e faatau le nonu a le vaega lena a Michael Jones ma le latou vaega. Ou te lē o iloa auā e ese foi Chen, ese le vaega lena latou te faataua le mea i o i Saina, pei e iai le kamupani lena e faatū. Ae o la lava e faatali le faaiuga toe a o nai moliaga, ae o moliaga pito mamafa uma na ua dismiss.
Radio Samoa: O le malaga atu a Graham Henry, poo se tasi foi sa faiaoga foi i le All Blacks a auina atu le Ipu a le lalolagi. Ou te talitonu o se atunuu muamua lea ua mafai ona ave i ai le Ipu a le lalolagi e feiloai i ai. O le ā le autū o le malaga a Graham Henry, aemaise foi se tasi o sui o le All Blacks, le susuga ia Victor Vito?
Palemia: E faamatala mai a e le malaga a Henry ia le mafuaaga. Omai ai ma Vito, o le Samoa sa taalo ai. O lona uiga o le omai e faasilasila ma faalauiloa i Samoa, o lea sa telē le sao o Samoa. Manatua foi ou te tala‘ia a, o le Manu Samoa 2 lea na mauaina le Ipu o le lalolagi. Ia lea a la ua omai Graham Henry e aumai le Ipu a le Manu Samoa 2 iinei i le Manu Samoa 1.
E oo foi i le taimi na fai ai ana aoga faataitai i isi foi kalapu, o se tulaga fiafia tele lea na ou matauina i le susuga ia Henry. E matagofie tele faafiafiaga a Don Bosco na fai.
O la‘u lena faafetai, ua maua le avanoa e silasila ai tamafanau a Samoa, ma faatupu ai o latou manatu fiafia i le taaloga. E oo atu i le isi World Cup, matuā lelei a tatou tama e o aumai le mea inei.
Radio Samoa: Ou te talitonu o latalata mai se taimi o le a faapena foi ona maua se tatou taaloga ma le All Blacks i le va o le All Blacks ma le Manu Samoa. O iai se finagalo o latalata mai se taimi?
Palemia: O lea a e faatali. Manatua foi o le amio a lea a le Olopeleki o le taamilomilo solo, ae mumusu a, talu mai a le tatou taaloga foi lea toeitiiti faaletonu ai le Olopeleki, taetaei ai ulu ma mata. Manū a e matagā ai le Olopeleki iinā. Pei ua avea mea ia ma mea ua augatā ai le Olopeleki e faataaalo ma tatou.
Radio Samoa: Momoli atu le faamalo ma le faafetai i le tali mai foi ma le manatu mai le atunuu o loo aitaumalele atu foi i lenei atunuu. Ae o ā ni polokalame ma ni mataupu o loo faataoto e le Palemene mo le taimi nei, ona ta taumavae ai lea, momoli atu le faafetai tele i lau afioga i le Palemia, Tuilaepa?
Palemia: Ia momoli atu le faafetai tele a mo le valaau mai lenei itula afiafi. O loo iai le faamoemoe e asiasi foi iinā i le vaiaso fou, e vaavaai poo ā mai outou, ona toe liliu mai ai foi lea na o ni nai aso, ou te agai atu ai i Ueligitone i nisi foi o polokalame o loo fia faia ai. Ae o lenei taimi, faatofa i le mamalu foi o loo faafogafoga mai i le ta talanoaga. Ae manuia tele lenei po. etai foi i le pale ma le onosai o lau afioga i le Palemia, o lea lava ua tali faaaliali le Alii, ia ma ua toe pale mai le Tamaaiga Afioga Tui Atua Tupua Tamasese, o lea ua toe avea ma Ao o le Malo.
Lima tausaga talu ai, i le paeaiga foi e pei ona faagasolo mai ai ma suia ai foi le faavae e pei ona filifilia le tai lima tausaga, aemaise foi le taimi na filifilia ai le vaiaso na tea nei.
O le a foi se tali mai a le Itu agai, aemaise foi le lua mafutaga mai lenei lima tausaga seia oo mai lenei foi aso, ma le faatautoina o le Aso o le Malo? Sei saunoa i lea tulaga faamolemole Tuilaepa?
Palemia: O le lima tausaga lea sa faataoto mai e le tatou faavae, e fai ma filifili ai se isi e umia le tofi. O le uiga la o le filifiliga, talu ai ona o le matou vaega foi lea e pito toatele, i le faapuupuuga o le tagata e tusi aao i ai le matou vaega, o le tagata lena.
O le tatou faavae foi ma aiaiga o iai, sa tusia i le taimi e leai ni vaega, ma e iai foi le talitonuga e lei iai ma se mafaufau na iai i o tatou tuaa na latou aiaia le faavae, e iai le taimi e alu alu ona iai lea o vaega faaupufai e lē toe moomia ai le tulaga o tagata taitoatasi e faatuina se suafa o se isi, o lea ua filifili faavaega.
O lona uiga o le vaega a e toatele, o le vaega lea e tu malo, o i latou na e faia le faaiuga. O le ala foi lena e tāua ai ona ta‘ua ai ma le Itu agai, ona e le o faavaea i le tulaga o le tulafono faavae se fuafuaga o le a iai ni pati.
I le faapuupuuga la, o lē a e tusilima i ai le malo, o le tagata lena. Matou foi filifiliga sa fai, sa faa-Taiti na fai. Manatua foi o le faa-EFKS, e palota a oe i le tagata e musumusu ia te oe le agaga paia, ona tusi a lea o le igoa ae leai ni sui faatutū.
O le tulaga lena na faatino ai le matou faiga palota faalilolilo, ma i totonu a o le matou foi faafaletui, o faipule o le HRPP ma maua ai loa le tasi.
E tulua Fiame i le faiga palota, ae tutolu Tuimalealiifano. Faapuupuuga la lena o le matou faiga palota, sa faalilolilo, ia ma ave ai loa i luma o le Palemene.
E ui a la na ou valaau ai foi i le Itu agai, e lelei ona tuu ifo lona igoa e faapipii i le matou pepa lena ona tasi ai lea, e faafaigofie ai auā e maimau ai fua le taimi e faatoatele vale ai fua sui ma igoa, ae o le mea a e fai atu le Malo e fai, o le mea a lena e fai.
Ua leva foi ona nofo tatalo le atunuu ma matou foi, tuu atu i luma o le Atua. Lona uiga e leai a ni talanoaga na fai poo ai e pito agavaa, leai a ma se leo na oo i ai, o a aiaiga ua manatu o le tagata lea ua talafeagai, pau a le mea o le musumusuga lilo a le agaga paia. O lea la ua uma ona fai le faatautoga o le Ao o le Malo.
Radio Samoa: Pe ua toe maua se tou faafaletui e toe lauliliuina ai tulafono tau faaofi foi nei e lua, o le tulafono o taaloga eseese ua ta‘ua o le casino, aemaise o lona teuteuina.
Palemia: Se‘i ou tali puupuu atu i le mea lena, ua uma ona pasi e le Palemene i le fonotaga lea na uma atu nei. Ae pei a le tulaga la e iai, o le tuufaatasiga o tulafono, auā na pasi i le 1991 le tulafono o isi gambling e tai pei o bingo.
A o lea la ua faatu atu le casino. Na pau a le mea na tuufaatasi ai, o le tulaga foi lele i le pulega, faaaogā pea le pulega lea e iai nei, e faaauau e na te pulea foi le casino. Tasi a le komiti e vaaia a ituaiga o taaloga nai lo le lua i le mea lea na iai. Ua uma foi la ona pasi e le Palemene lena mataupu.
Radio Samoa: E tusa ma le mataupu e pei ona feteenai ai le malo ma le afioaga o Magiagi, e pei ona faatonuina ai e le Malo poo lau afioga i le Palemia, ia oo atu i le faaiuga o Aukuso ua soo aiga uma i le mita foi lea e mafai ona totogi o le cash power poo le mita.
Palemia: O lea ua aumai le latou talosaga ia te au. La foi la ua uma ona ou toe tali i ai. Na ou faalogo na fono Magiagi ma teena le fuafuaga a le malo.
Aumai la le latou tali, o loo iai a latou talosaga mo taui o mea na faaleaogaina i paipa na faataoto mai i aso o Tupuola Efi.
O lea na ave i ai lau tusi, e sili ona fili mai ni sui se toatolu o outou e feiloai ma le Malo, e faamaape a tou mataupu i taui. O le mea lena, e ese a mataupu i taui, ese mataupu tau eletise.
E le aumaia fua le taui e taofi ai tama o le eletise e o atu e fua a latou mita ma sui foi a latou moli ia faa-cash power. Lona uiga a le totogi mai lau cash power lona uiga ua pe.
La la ua ou toe tali foi i ai, e lelei ona amata faatalanoa ma le malo a latou taui pe talafeagai. Ae o Aukuso e faataunuu ai le tulaga o le faa-cash power uma a. E lē moomia ai se latou ioega.
O le faiga faavae a ia, a lē totogia loa lau aitalafu ua tipi lou moli. O le faigofie ia o lenei mataupu. O la ua uma ona toe ave i ai lau tali e filifili mai ni nai a latou sui e faatalanoa ma le Malo a latou taui.
O le taui a e talafeagai e totogi, a o le taui e faaletonu, e lē totogia foi. E manino a faavae o le tatou malo e lē o ni faavae faatoa fai ananei, o faavae ua malamalama uma a i ai tagata.
Radio Samoa: Ua fesiligia e le atunuu, pe faatuina se komisi mo faasinomaga faaleaganuu. E talitonu foi, e lē tau faailoaina le tāua o measina a Samoa. E oo lava i ana faasinomaga faaleaganuu, ua tatau ona malupuipuia lelei mo le agai atu i le lumanai.
Palemia: O loo iai le faamoemoe faapea o lea e tapena, ina ia iai se komiti faapitoa latou te tilotilo i le mataupu lena.
Radio Samoa: Ou te talitonu na e māua foi se tasi foi o tamalii o le atunuu, le afioga ia Nanai Su‘a Tanielu, lea sa avea ma tofi foi sa tautua ai i le 9 tausaga o le faatonu aoao o le Ofisa Tutotonu o Faigafaiva a le Pasefika.
O lea ua māua ua lē toe filifilia e pei ona galue ai i le ofisa autu i Honiara, o le laumua lena o le Atu Solomona. Ae o loo sau le tala atua, e lē o sa‘o le filifiliga, sa tatau lava ona toe tulai mai le afioga ia Nanai Su‘a Tanielu. Pe na oo i ai sou finagalo?
Palemia: O le tulaga o Su‘a, o le aiaiga o le faavae, e tailua a nofoaiga ma uma. E lē o se tulaga foi lea o le sa‘o pe sese, ae uma loa lau second term, ona uma loa lea i lalo o aiaiga o le tulafono faavae o loo iai nei. E leai a la se isi i aso ua tuanai ua tolu ni ana nofoaiga, e uma loa le lua, sui.
Radio Samoa: Talitonu o le mataupu lenei, ua oo foi i ai le saunoaga ua faapena foi ona saili malo ai, o loo faapena foi ona tagisa atu ai le atunuu. O iai le faamoemoe o lea ua silafia e le mamalu o le atunuu aemaise foi lau afioga i le Palemia le Malaga a John Key ma le vaega, o le a faapena foi ona faataunuuina atu i Samoa i le vaiaso fou, mo le faamanatuina o le 50 tausaga o le la feagaiga foi lea o le Treaty of Friendship.
O lona uiga, atonu o le avanoa lea, e talitonu e lē faatonuina lau afioga i le Palemia. O le mataupu lava lea o le Quota a Samoa, e lē o mafai lava ona oo atu i le afe selau i tausaga uma.
Talu ai o le faamoemoe ona o pepa faigaluega, ou te talitonu, o le a avatu le faamoemoega foi mo lea avanoa, atonu o le a mafai ona toe fesootai i ai lau afioga i le Palemia, aemaise o le isi mau lea na tapu mai poo le 2006, a faapea e omai iinei nisi ulugalii ae fananau ai ni a la tamaiti, sa otomeki lava e maua le sitiseni ma le nofomau, peitai ua tapu le tulaga lena i le mau a Niu Sila, ia ma nisi mataupu o loo finagalo i ai lau afioga.
Ae pei o le Quota lava lena, pe mafai ona faagalo ia pepa faigaluega, a manuia i le se‘i, ia omai loa Samoa. Pe mafai ona e saunoa i ai a o faafofoga le mamalu o le atunuu auā o lena o le a maua le tou mafutaga.
Palemia: O lea o le a talanoa i mea uma a na, ae iai le mea e sili ona malamalama i ai tatou, o le isi lea faafitauli o feagai ma tatou, i le taimi lea e o atu ai le toatele ae lē maua ni galuega, auā e iai mea ua tutupu faapena, ona tausi lea e o tatou aiga iinā.
Ona tausi tausi lea ua fiu e tausi ua lē maua ni galuega, o tatou aiga lava e toe o ane logo faalilolilo le immigration e toe faafoi mai ua lē mafai ona tausi, ua tele tupe e alu ai.
O le tele ia o mataupu ia e lipoti mai, e tuuaia lava tatou. E iai isi e o atu iinā, e lē gata ina faaosooso e o tatou aiga iinā ia overstayer tagata, ae tigaina ai a e tausi isi ua o atu iinā, ona toe o a lea o tatou aiga na ua lipoti faalilolilo i le immigration.
O le tele ia o mea piopio e faamatala mai, se ta te ma, aemaise foi o isi tagata ua matutua, ua tele ina ou fesoasoani i ai e o atu iinā, ae o atu overtayer. Foi mai la iinei, ae lē umi ae tau mai ua oti le atalii lea sa overstayer ai. Ae toe tagi mai e fia o atu e fai le oti ae o lea na overstayer.
O tatou le isi atunuu e ese le piopio o tagata. Ou te manatua a le saunoaga a Tofilau, ua lē toe talitonuina o ia e Niu Sila talu ai, na tele ona ia faamaonia isi malaga e aofia ai faifeau.
Na ala foi ona ia faamaonia, ona o malaga e o atu o faifeau e o atu iina ma latou aumalaga ona usitaia lea. Ae o atu foi faifeau, e piopio foi faifeau latou.
Afai la o nisi tagata pito piopio o faifeau, piopio atu ma nisi o tatou ae lē o ni faifeau, o le matuā telē a o le faafitauli ia e faafeagai ma a‘u, i mea nei o feagaiga ma Niu Sila, e talanoa talanoa ae toe logo mai e Niu Sila, o tatou tagata a ia e mafua ai ona latou iloa mea leaga e fai e isi foi Samoa ma toe faafoi mai.
Radio Samoa: Ia faafetai tele lava mo mataupu i lenei po. Ae avatu ia sau saunoaga mulimuli aemaise foi o le o atu o le tatou atunuu mo taaloga a le Olimipeka lea o le a sauni. Poo le ā le mea ua lē oo atu ai i se sefulu ma ona tupu le autaaalo. Pe na o le valu ea lena e sauni mai?
Palemia: O le mea sili o lena ua valu. A o aso ua tuanai, e na o le tasi, lua, tolu. O le tulaga lena e masani ona iai i aso ua tuanai, o le mea sili o lea ua oo i le valu. Ia ona faaiu atu ai lea i lau faatofa atu ia outou i lenei po. Soifua ia.
