Ae tiute uma a mea uma. E leai se mea e lē sao i lalo o le tulafono, ona o le tulaga lena, o auala ia e saili tupe ai le Malo mo le faatinoga o galuega mo le atinae o se atunuu.
O le itu la lena o lea ou te manatua lelei le mea lena leaga e iai foi le maa faamanatu na aumai foi e nisi o matou aiga, ona sulu mai lea ia te au. Ia o‘u tilotilo atū i le tulafono, e leai a se mea e ‘alo ai, e tatau ona totogi. Ia ona ou faamalulu foi lea i ai, o itu a na faalemalo ia, e soo se mea e aumai i totonu o le atunuu, e totogi a le tiute.
Radio Samoa: Ia o le a tuu atu ia i lau afioga pe iai se isi vaega tāua e te fia saunoa i ai lenei vaega o le afiafi, Tuilaepa?
Palemia: O le vaiaso fou, o le aso 6 o le masina lenei, o le a fono ai le Palemene. Masalo foi pe tasi pe lua aso e fono ai, faapitoa a mo tulafono.
O le tulafono la o lea o le a fai ai loa la‘u tautalaga ma teuteu ai le faavae, o le tulafono foi lea mo le lē i lalo ifo o le 5 tina e mafai ona ulufale i totonu o le Palemene i soo se faiga palota lautele. Sa ou tautala foi la analeila i le fono tele a le faalapotopotoga o Faamalu o Faalapotopotoga i Samoa, ia o le autū a lea o se faamalamalamaga atili i le tulafono lea.
