Radio Samoa: O lea ua maua le feiloaiga ma le afioga i le alii Palemia, le taitai o le tatou atunuu, le susuga ia Tuilaepa Sailele Malielegaoi, aemaise foi lenei po ma se faatalanoaga puupuu i nisi foi o vaega e pei ona iai ni atinae o loo faapea ona fausia e lo tatou atunuu i Samoa auā foi nisi o mataupu o loo fia fesiligia ai le afioga i le alii Palemia, mo le silafia e lo tatou atunuu nei, i vaega o loo tutupu i lo tatou atunuu pele o Samoa. … Malo lava le soifua i lau susuga Tuilaepa, faamalo le onosai mai.
Palemia: Faamalo Papalii, faafetai foi le valaau mai lenei itula afiafi ina ia maua ai pea le avanoa e faatalanoa ai i nisi o mataupu e ono lagalaga e faatatau i mea foi o loo faatino e le tatou malo iinei, ma nisi fuafuaga foi mo le silafia e lo tatou atunuu. Ae lelei ona faagasolo le ta talanoaga.
Radio Samoa: O loo faapea ona aumai i tala i mea o loo tutupu i lo tatou atunuu, le tulaga e pei ona iai le Tino o loo fia fausia se Tino e lipoti i ai le au faasalalau ma agai i ai le aufaasalalau e tusa i le va ma le tatou malo i faitinoga ma tuuaiga, ae lelei ona faalauiloa mai pea e lau afioga i sau saunoaga e ui o lea sa e saunoa i ai le vaiaso ua tea?
Palemia: O le mataupu lena i le iai o se itu tino e fai ma tiute tauave le tulaga o le vaavaai pea ma mataitu taualumaga o le faatinoga o galuega a le autusitala, e pei o ina i Niu Sila, o loo iai le itutino e ave i ai mataupu a le lautele pe a lē fiafia i le faatinoga o galuega a le au tusitala.
Manatua foi o loo taoto foi taiala lautetele o le faatinoga o galuega a le autusitala. E pei la o lenei: a lipoti e latou se faamatalaga o mea tutupu, e tau aloalo ese ma le mea lea a lipoti mai, ae tuu foi i ai ma o latou manatu lē faavaea. Ae a lipoti mai, lipoti sa‘o mai mean a vaai i ai.
Afai foi sa fai se latou suesuega, ona aumai uma lea o manatu o itu e lua, auā e soo se tala o mea tutupu, e lua itu e ono aafia, o le tagata lea e mafua ai se faalavelave, o loo faapogai i se faalavelave, ma le tagata o loo aafia i se faalavelave. Afai la e aumai se faamatalaga e aafia ai se itu se toatasi, ona lē atoatoa lea o le tala. E tatau a ona fesiligia itu e lua, ona lipoti sao mai lea.
O loo manino a taiala o le faatinoga o galuega o le autusitala, ae a mafuli loa le lipoti o le tala i se itu e tasi, ona afaina loa lea o le isi itu. O le mea la lena o lea e faatalanoaina ma uunaia pea, o se faiga faavae lelei ina ia faatino e le autusitala o latou tiute.
