Radio Samoa: Malo faafetai tele lava i lau afioga a le Palemia. Talitonu o lea pe toe lua masina ona faataunuu lea o le faamoemoe e pei ona silafia e le mamalu o le atunuu, le faamanatuina o le 50 Tausaga. Ae o lea ua māua mai le asosi a faletalimalo, ua leai ma se avanoa o iai i Samoa i le taimi nei.
O le ā se silasila a lau afioga i le Palemia i le tulaga lea, aemaise o le taupati atu a le auturisi, auā pei o lena ua māua mai ua toatele Agentina na ua iai iinā, ae ua leai ni avanoa foi ia o le au feoai, ae lea e lei taitai ona oo i le taimi o le faamoemoe, faamolemole Tuilaepa?
Palemia: O se tulaga manaia tele lea. O le aogā foi o le mea lea, a omai loa outou foi e omai iinei, ia aua loa ne‘i toe nofo se tasi i se faletalimalo ae o e vaai aiga. Ma se‘i maua ai ni nai tupe a nai aiga.
Radio Samoa: O le ā le tulaga, pe na maua se lua mafutaga faafaletui ma le Kovana foi lea poo le Sui Kovana ma a Ausetalia, faamolemole Tuilaepa?
Palemia: O taeao e asiasi atu ai i le Palemene ma saunoa aloaia ai totonu. Ua uma ona tuu i ai le avanoa o le a faasilasila mai ai nisi foi o fesoasoani a Ausetalia.
O loo iai le faamoemoe o le a ia faasalalauina mai taeao le tali i talosaga a le Malo se‘i fesoasoani mai Ausetalia e toe fau atoa le Fale Fono tuai, le fale fono lea e fai ai nei fonotaga. Ua pala le fale, na tatala i le 1972, ia ua iai vaega ua tutulu. Ia ma o le tulaga la lena o lea ua taatia mai ata, o le a faatelē, telē atu i lo le mea lea e iai nei.
