Manatua foi e faapena foi le iuga na fai e le Akiepikopo ia i le Ekalesia Katoliko, e tuu i lalo le malumalu o le Ekalesia i Mulivai, ae toe fau lelei ona o le malumalu tuai na iai, e leai a ma ni uamea na fau ai, na o maa la sa iai i totonu ma le namu.
Ia lea foi la na tuu ai i lalo a o lea la ua toe fau a i le tulaga o le ata tuai, ae pau le eseesega o lea ua fau i uamea ma sima. Ae o lena manatu na tulai mai ina ua oso le mafuie foi lea i Kalaiesetete ma feoti ai tagata i le malumalu tele iinā i Kalaiesetete.
Ia pei la ua faatupu manatu le mea lena i le alii Akiepikopo o iai nei, ia ma tuu ai loa i lalo. Ia tiga ona tetele foi le faagaulēmalie, ia ae faatino a le mea e tatau ona fai, e faavae i le tofa mamao ma le faautautaga tatau.
Ia o le tulaga lena na iai sa fesiligia ai foi a‘u ma ou tali atu i ai, o uiga a ia o mea o faalapotopotoga i atunuu saoloto e pei o Samoa, a iai a se mea, e iai a tagata foi e ese o latou finagalo. O le tulaga masani, this is healthy in democracy. Ia o lena la lea na ave ai la‘u faamaninoga, e lē fou lea mea.
O mea uma a e fai e le HRPP e tai pei o le sui o le auala, sui o le taimi, sa iai a ē faasala ese. O uiga na faamafutaga e maopoopo. Ia ae falē falē a, ia ona tulai a‘e a lea o le mataupu ua malamalama ia ma fai loa le faaiuga.
Ia o le faaiuga a e fai, o le faaiuga lena e faagasolo ai fuafuaga a le Malo. Ina ua tuu la i lalo i le taimi lenei ma ua taalaelae le taoto mai o le Malae, ia lea la ua iloa e tagata le tāua tele o le iuga na fai.
Ua matuā manaia le vaai atu ii, ua leai se mea o toe punitia ai le vaai.
