Ae o lea e māua na saunoa le taitai o le Itu agai, Palusalue Faapo II, o loo iai nisi o au faipule o loo mimilo ai i lea tulaga. E fia manino ma toe faalautele mai poo iai se tulaga faapea, faamolemole lau afioga?
Palemia: Ia ua e iloa foi soo se mea a, e iai a foi ē faitau eseese, ia ona fai foi lea o le matou fono i soo se mataupu a, e talanoa i totonu o le lotoifale, e iai a ia finagalo e faitau eseese.
E manatua foi e oo a i totonu o fono a le nuu, a iai a se mataupu e ese a taofi o isi. Ina ona faamalamalama faamalamalama foi lea ma avatu faavae o faaiuga a le Malo, ia ona fai ai lea o le iuga, ma o le iuga a lena e mulimulitai uma i ai.
Na tau faafefufefu le mataupu ona o le Fofoga Fetalai ua malosi tele lana finau i le tulaga foi lea o le, aua ne‘i lōtea le fale.
Ia na avatu foi a faamalamalamaga foi aemaise ua pala le fale, e pei a ona masani ai o tatou fale e fausia i laau Samoa e lē treat ina, ua pala ua ‘ai e ane. Ia ma o lea foi e limataitaiina le Kapeneta ia i fautuaga faainisinia, e lelei ona tuu i lalo le fale ua pala, i ke‘i ua oo i se sauniga, pe to‘a selau ni tagata o nofonofo ai totonu ae oso ni mafuie pa‘ū feoti uma ai, o ai e tuuai i ai? Aemaise o lea ua sau le faaaliga a inisinia a le Malo, ua lamatia le ola o tagata ona o le tulaga ua oo i ai le fale, e tatau ona tuu i lalo.
