Radio Samoa: Faafetai tele lava o lea ua manino lea tulaga. 53 talavou tama filifilia o le a faapena ona auina atu e fai ma seila foi i vaa tetele i Europa.
Momoli atu le faafetai foi ona o le tulaga o lea foi ua maua lenei avanoa e fesoasoani foi i nai aiga, aemaise foi o lea ua māua sa e faamalosiau i ai, ia tautuana ma pulea lelei amio, ia ma tautuana le igoa Samoa. Ae o le tulaga lea e iai, sa faapefea ona filifilia lenei 53 lau afioga le Palemia?
Palemia: E fai a e le Kamupani Vaa. Manatua foi e lua a tatou kamupani vaa, o le isi e nafa ma femalagaiga i totonu o le atunuu, ae o le isi la e nafa ma le tatou vaatele foi lea, le Forum Line, ma le tulaga o le faafaigaluegaina o tatou tama seila i kamupani vaa i fafo.
O le tulaga la lena, lea e fai ai a e latou foi filifiliga e faavae i luga o tama foi ma o latou talaaga pe na pasi atoatoa i le tatou aoga faaseila ia ma o atu ai latou e o i fafo.
