Ona lele ai lea o lana asiasiga i Kilipati i le Aso Lulu. Ia ona toe lele mai foi lea o lana vaalele toe mālōlō iinei, mālōlō ia Aggie Grey, ia oo i le taeao lele i Tuvalu.
Ia ona toe uma foi lea o lana asiasiga i Tuvalu, ia toe foi mai toe mālōlō iinei, ae faato‘ā amata aloaia ai la taeao lana faigamalaga mai i Samoa, ia ona faatino ai foi lea o tulaga o faaaloaloga uma o le tulai faaaloalo a leoleo, faato‘ā ta ai loa le latou Vii, ta foi ma le tatou Vii, i le feiloaiga ma le Ao Mamalu o le Malo, ona faaiu ai lea i le saunoaga ma le feiloaiga ma le Palemene, ia ona sosoo ai lea ma le faaafe a le malo, ia ona sasao ai lea o lana polokalame ma toe taliu atu ai, e lele atu iinā i Vanuatu mo lana asiasiga.
Radio Samoa: Malo! Faafetai tele, momoli atu le faafetai i lau afioga i le Palemia, Susuga Tuilaepa mo le faaavanoaina o lou taimi foi i lenei po. Ua matagofie foi mataupu ua faafofoga i ai le mamalu o le atunuu.
Ia ae lafo atu ia e faamae‘a mai le ta polokalame, poo iai nisi o mataupu e pei ona e saunoa, se‘i faailoa mai i le po nei ia fonotaga foi ua tuanai atu e lei oo i ai le ta talanoaga, faamolemole a. Ae faafetai tele lava mo lenei po.
Palemia: Masalo o le a faamuta ia ii le ta talanoaga. E lē uma le fai aso o le Atua. E iai le faamoemoe ou te malaga atu iinā i le vaveao o le Aso Sa, ona o loo iai feutagaiga foi o fia faia ma le Mayor, le tama o Brown, e faatatau i nisi foi o mataupu e faatatau i le tatou nofoaga iinā o loo fia fai i ai se faaiuga faaiu, ia ona ou toe taliu mai ai lea i le taeao o le Aso Lua.
Pei la na o le pau lena o le tulaga foi ou te agai atu ai iina, na o le tasi a le aso ou toe taliu mai i le vaiaso fou.
Ae pei o nai vaega na, sa iinei foi ia le Sui Peresitene o le Faletupe a le Lalolagi, ma le Sui Peresitene o le Faaputuga Tupe a le Lalolagi, International Monetary Fund, ia faapea foi ma faauluuluga o le Faalapotopotoga a Europa o loo base i Fiti, ia faapea foi ma le Sui Peresitene o le Faletupe o Asia i se feiloaiga tele a sa fai ai foi iinei, faatasi ai ma sui, o Minisita o Tupe uma a o le Pasefika ma a tatou paaga.
O se mafutaga sa fetufaai ai, ia aemaise foi o tulaga tāua sa feiloai ai ma a‘u nei ma tatou malo, i le itu lava o fesoasoani mai a faletupe tetele nei o le lalolagi ma Asia i le tatou atina‘e. Na o le pau na o ni mea mo lenei vaiaso ae lē uma le fai aso o le Atua, toe feiloai foi faapenei i le la vaiaso, ma talatalanoa ai i nisi foi o mea tutupu. Ae o lenei po, ia manuia tele lava le faasausauga a le tatou atunuu.
