Radio Samoa: I le leo faatauvaa o le auauna e fai ma fofoga faaleo o le mamalu o le atunuu i Aotearoa nei. Ia faafeiloai atu ma le agaga faaaloalo i lau afioga i le Palemia, lau SusugaTuilaepa Sailele Malielegaoi. Malo le soifua maua ma le lagi e mamā!
Palemia: Faamalo foi i lenei itula afiafi le valaau mai. Ae faagasolo le ta talanoaga.
Radio Samoa: Māua o loo iai le aufaipisinisi mai Amerika, o loo faapena na o atu e latou te fausiaina se maota gasegase, ma o loo vaavaai le Malo poo fea se pitonuu o Samoa o le a faatuina ai, poo le a faafesagai ma le uafu i Mulifanua, ia ua center foi lena mo i matou o loo i tuā agai i Falelatai ma Mulifanua. Ae lelei a le faalautele mai e lau afioga i le Palemia poo le ā le tulaga ua oo i ai, faamolemole.
Palemia: O le faamoemoe lena ua uma foi ona fuafua e fai tonu i le faafeagai ma le Malaevaalele. Sa ou faalogo o iai foi ni faalavelave mai a le afioaga lea i Satapuala, ia ua uma foi ona ou tali i ai i lena tulaga, o fanua o fanua o le Malo ua uma ona fai i ai le Faamasinoga, i le faalavelave pea o Satapuala, ia ua uma foi ona fai i ai le iuga a le Faamasinoga, o fanua o fanua o le Malo.
Ma o inā la lea e fuafua e fausia ai se falemai, faapitoa a la mo i latou na i itumalo i i lava faafeagai ma le malaevaalele, ae aogā foi lea mo ni faalavelave tutupu, ae o lea o loo iai se falemai o loo tulata ifo i le malaevaalele. O le tulaga lena e pei ona faa fesili mai ai.
Radio Samoa: O loo māua o loo iai, e lē o mautinoa ae o silafia e lau afioga i le Palemia, o loo fetōtōa‘i le autusitala ma le aufaasalalau e tusa ma le latou finauina o le latou fono faatonutonu.
Ia talu ai faapea na iai ni a latou fono, ia ua iai foi nisi ua teteva ona o le lē lelei o le latou lomiga muamua lea na faapea e faatonutonu ai. Ae lē o mautinoa po ua oo i ai se finagalo o lau afioga i le Palemiai lea mataupu faamolemole?
Palemia: E sa‘o o le latou fono sa valaau ona o le fuafuaga a le Malo ua uma ona faasilasila i ai, o le a faatu e le Malo se itutino e pei foi ona iai le itutino e vaaia faasalalauga ma faaseā faasaga i tusitusiga ma fai foi i ai iuga.
