O le mea la lea e tupu ia tatou i le olaga lenei, o le tele naunau o tagata e televave e faitio, ae o le matua leaga faia a i le faatinoga, pe a tatou tilotilo i mea o loo fai e tagata faitio.
O le tulaga la lena o lea e taoto ai nei le mataupu. Ma e pei foi ona faamatalaina atu, ua uma ona faasalalau e le malo Niu Sila, uma ona faasalalau e le malo o Ausetalia, le latou agaga fiafia i le maioio ma le manino o faamatalaga o le faaaluina o tupe ua aumai e latou malo, e fesoasoani ai i le malo Samoa.
E leai a se mea o faaletonu i le latou silasila mai i le maeaea lelei o faamaumauga ma le faatinoga o galuega ua fai i le televave.
O le finagalo la lena o le malo Niu Sila ma le malo Ausetalia ua uma ona faalauiloa. Ae manatua foi, o le au tusitala, o le toatele o le au tusitala e le fia o e fesili i malo, ae fai a le latou faafiapoto, ma fai a latou faaiuga.
O le mea la lea ua tupu, o analeila lea ua pasia ai e le Kapeneta, le vaegatupe e faagaioi ai loa le mataupu, lea foi ua uma ona fesootai atu ia tatou loia a le tatou malo iina.
Ua uma foi ona faamaonia e la tatou loia sili, le faagaoi loa ma le faatinoina loa o le galuega a tatou loia iina i Aukilani, e tuu aloaia atu loa le mataupu lea i le itutino lea o loo iai o le Malo i Niu Sila, e tusa ai o le faaleagaina o le Malo Samoa e le tagata lenei o John Campbell.
E tutusa lelei a ma le tulaga foi na fai ai e le tatou malo le tamaitai o Barbara Dreaver.
Lona uiga la, o le a toalua ai i le au tusitala o le a faasa‘osa‘o atu e le tatou malo, talu ai uiga nei fia matamuamua, ae le sei siaki muamua a latou mataupu poo sa‘o poo sese.
O le tulaga la lena ua faagaioi pea i le taimi lenei moliaga a le tatou malo, lea na faia analeila lea na pasia ai e le Kapeneta le iuga, o le a faagasolo loa lenei mataupu, ina ia aua lava nei tuufaua le vaega tusitala nei, e fia sue ni o latou lanu, e o mai ai i Samoa nei, e faaaoga sese ai faamatalaga e taumafai e faasese ai ma sue ai o latou lanu iina i Niu Sila, ia ma o le a tatou faasagasaga atu a i le au tusitala nei e faasaosao ma faatonutonu. Ia o le faamatalaga atoa lena e pei ona faafesili mai ai.
Radio Samoa: Malo, faafetai tele lava i lau afioga Tuilaepa mo le taumafai foi e faamanino le ata ua oo i ai. … O lea ua oo mai lau imeli agai i Niu Sila, lea foi ua atofa foi le aso e te lua mafuta ai.
Ae talu ai o lena ua lua faafesagai lelei ma John Campbell, ae o le a le tulaga ua toe tuu ai le avanoa mo se isi vaiaso, lea ua e finagalo e tapena mai ni ana fesili, ae o lea e manino lelei mata o le vai i lau silasila i lau taitaiga o le malo ma le tulaga ua oo i ai?
Palemia: Radio Samoa: Ia manatua foi o lea e feagai au ma tamaiti. E le faatopelauina la a‘u e se tamaititi faavalevalea faapenei.
O le tulaga la lea ua ou manatu, o lana mataupu lea na nofo ai ma soonafai lau Sui Palemia, ia ua ou faapea, sei ou matuā faatigaina le tamaititi lea ma iina. Sei toe tuli lelei atu a iina e faalogo i le mea lea ou te fai atu ai, ae lē sau ia faatonu au.
E le faapea o le a ou io atu i lana polokalame. O le mea e fai, e fesili mai ma talosaga mai, seiloga la ou te io atu, faatoa fai lea.
Ae le o le tufue a talosaga mai, oso loa i luga o le vaalele. E iai le ituaiga manatu lea faalepopoi. Manatua foi le mea le ana maliu ai Lady Diana, i le faalavelave lea, o le o o ituaiga o tusitala nei, o tuli tuli, ua lē maua se filemu.
E oo a i le faleaiga na o iai, o atu nofonofo i fafo. Pei a o le mea a Campbell lea na fai, nofo nofo i fafo, ia o mai loa o loa tulituli, tusa lava poo fea le mea e o i ai, ae o atu a ma latou meapueata e pue. E pei ua pule mai tua aiga.
Pei ua latou pulea ma faatonutonu mai. Afai o ni o latou uiga ia e fai i le latou Palemia Niu Sila, e sā na fai mai le mea lena inei i Samoa. E le faatonua ma e ni tamaiti ia taitai o le malo lenei.
E nofo ane a ia, ma aumai lana polokalame o le a ou alu atu iina ta te talanoa, lea la ou te lei tali atu, ae oso a i luga o le vaalele, sau loa ma fai mai o le a sau ma te talanoa. Leai e fesili muamua mai ia te au, poo ou avanoa. O mea na e fai e tagata malamalama.
Ae le o le sau o le tamaititi na nofo ma faaleaga muamua le malo, ona toe sau foi lea e toe saili mai sona avanoa e sau ai foi lea, e aunoa ma le io atu, leai la e le fetaui lena mea, e le talafeagai ma lou mafaufau.
Afai o ana faiga na e fai ia Key, e sā ona ia faia le mea lena i le Palemia o le malo Samoa.
Palemia: Malo faafetai i lau afioga i le Palemia. Talosia ia, molimoli se lua soifua, ia maua foi se lua fonotaga matagofie i le la vaiaso, ma soalaupule ai foi le faamoemoe.
Radio Samoa: E lagolagoina e le Tautua Party le faamoemoe aemaise foi John Campbell. O le a sou finagalo i le tulaga lea Tuilaepa?
Palemia: Manatua foi, o tupe nei e faaalu e le malo, e avatu i totonu o le Palemene ma auiliili ai.
O le mea ua tupu, ua le tilotilo le vaega lea i mea sa matou talanoaina, ae ua fai loa le faasalalauga a Campbell e faaleaga mai ai le malo, galo loa i faipule mea ia sa matou faia, oso loa tietie i luga o le wagon a le alii o John Campbell e faaleaga ai le malo. Ia tulituli loa lava e le isi tusitala ia Levaopolo e uiga i faasalalauga ia, ia ‘alo‘alo loa Levaopolo.
Telefoni mai loa Levaopolo ia te au, ‘Tuilaepa, se tali ifo ia i le vaega lea ua ou musu ou te tali i ai.’
O le ala lena o lea sa fai ai lau faasalalauga, o mataupu nei, o mataupu sa auiliili i le tala o le tupe a le Palemene. Ma soo se faipule a e alu lagolago le mea lea e fai mai ai John Campbell, e atagia mai ai iina ma lona faipule, o lea na io i le Palemene i tupe ia na avatu e le Malo, a o lona uiga e fai le malamalama le tofi.
O lona uiga la o lea mea, na o lou alofa i tagata o sausaunoa mai i le Tautua. Masalo ana nofonofo, ou te le iloa le tulaga o loo iai.
Ae o le puna mai ma faapipii ia John Campbell, o ina ua faalautele atili ai i lo tatou atunuu, le vaivai tele o alii faipule o le Tautua.
