O le tulaga lena o lea ou te fai atu ai, tuu le talanoaga sei amata lelei, pe a uma ona ta o e te asiasi ma e alu e te vaaitino a i mea ia na fai, ma ou faasino atua auala, o moli, o fale e 862 ia sa fai, atoa ai ma taligalu ma faleaoga ma falemai, ma isi fale turisi la ua fau, ina ia malamalama atoa ai tagata Niu Sila, i le mataupu lenei na e sau e amatamea ai. Ae o le po anapo lea na e alu atu ai e vaai au o fai lau taligamalo.
Ou te tau atu lava John Campbell, faatoa ou tau a lea i se palagi lē mafaufau lē popoi, ma le lē faaaloalo. O tagata Niu Sila ua ou feiloai i ai o tagata faaaloalo, ae pau a lenei o le tagata ua ou feiloai i ai, o le matua lē faaaloalo, o oe, toe tele lou pepelo.
Ae o lea la ou te tau atu, o le a ou look forward i le aso 4 o Novema ta te talanoa lelei ai. Ina ona toe avatu lea o lau feau lena lona lua analeila.
Ia lea la ua fetaui tonu a lou valaau mai, ae o lea ou te faatali nei i le tali mai, auā e tatau ona aumai muamua ana fesili o mea ia e fia malamalama ai, ina ia matuā malamalama lelei le ma feiloaiga o le a fai i le aso 4, poo le Aso Tofi o le vaiaso fou. Ia o le tulaga la lena e pei ona e ta‘ua.
Ae ua uma ona ou faasalalauina atu i au faasalalauga i Niu Sila ma Ausetalia, le vaivai tele o le tagata lenei na sau e igoa ia John Campbell. E avatu i ai faamatalaga o tupe na maua, ae lē malamalama.
Na o le pau lava le aofai o tupe na folafola mai o fesoasoani a malo, e lē selau ma ona tupu miliona, na o le limasefulu ma le fitu miliona tala, na folafola mai e fesoasoani mai ai malo i fafo ia Samoa, i le tuufaatasiga foi la ma seleni uma sa aoao mai ekalesia ma faalapotopotoga uma.
O le aofai la o tupe, auā e ese a le folafola, ese le tupe ua totogi mai. Tau mai la i le faaiuga o Aukuso lea na faamautinoa ai fuainumera, e na o le 35 miliona o le 57 miliona lea ua taunuu mai i Samoa.
Ae o le tele o seleni ua alu i galuega faatino, e 68 miliona sei tau mai i le masina o Aukuso o le tausaga nei. Lona uiga la, i le aofaiga lea e 68 miliona, toese le 35 miliona mai fafo, lona uiga la, e 33 a miliona tupe a Samoa lava ia, lea sa alu i fesoasoani o faatinoga o galuega nei.
Ma o loo mautinoa foi i le ulutala o loo avatu i le tusi lea o faamatalaga o tala tupe ma le lipoti na avatu, o loo auiliili atu ai i faamatalaga, o tupe ia faaalu mo galuega fuafua o le toe faaleleia o nofoaga na faaleaga, e 4 tausaga e faatino ai. Ma o seleni ia ua faataoto atu i le lipoti, e faasino i le tausaga muamua.
Lona uiga, e lei sau le tausaga lua, lei sau le tausaga lua, lei sau le tausaga tolu, lei sau le tausaga fa. Ae ua faitau sese e John Campbell le lipoti, ua lē tilotilo i le ulutala e 4 tausaga, le tilotilo i le ulutala, o mea ia e tilotilo i ai, e faasino i le tausaga muamua, ae ua sese ai la John Campbell, e faapea a ia, e pau ia o le tupe, ma na o le pau lenei o le tausaga e faatino ai galuega. E 4 tausaga e faagasolosolo ai, ma e na o le pau lea o seleni ua mafai ona maua mai ia tatou paaga mai fafo.
O le ala lena sa faatusa ai foi, sa ou agai ai e faamatala mo se faatusatusaga, le afā tele lea sa agi i le malo o Amerika i le 2005, e lima tausaga o le polokalame toe fuataina, toe fausia o le fale ma mea na faaleaga i Setete uma o Amerika na afaina i le mea lea e iai le vaitafe o Missori.
Mai le 2005 na oso ai le afa lena, i le 2010 i le tausaga lenei, ua lima tausaga, ma e lima a tausaga o le latou polokalame, ae oo mai le taimi lenei, e lei taitai lava ona uma galuega.
O la lava e tau paluku e le malo Amerika, ae 102 piliona tala Amerika le tupe e faatino ai a latou polokalame. Ae manatua foi la o le malo Amerika, o le malo maoae i le lalolagi atoa.
O le a lava le faalavelave e tupu i lea malo, e tumu tumu atu i ai vaalele e avatu i ai meaai ma avatu i ai le army e fesoasoani i ai.
Ina ua tupu le afa lea o Katrina, o le mea moni, e uma le vaiaso o la lava e faatali mai tagata poo fea ea lo latou malo.
E lalata i le lua afe tagata na maliliu ai, ona o le faatamala o le malo, o lea a e oo mai a i aso nei, o la lava e taumafai le malo e faatino a latou galuega.
Fuafua mai la ia tatou ma le toagaogao ma le lē lava o tatou seleni, ae ua telē mea la ua fai, o le mea moni a, o lea foi ua aliali mai i Kalaiesetete, ua lua mafuie ua agi ai, ae o lau faalogo, e oo mai nei, e lei iai a ni mea ua fai.
O le mea lea, e ese a le faigofie o le talanoa o le tagata ma faitio, ae a oo loa i le faatinoga, e ese foi le tulaga o le faatinoga.
