Radio Samoa: I le agaga faaaloalo e faafeiloai atu ai i lau susuga Tuilaepa, malo le soifua maua ma le lagi e mama.
O le ta mataupu muamua i lenei po…, o iai se finagalo o le Itu agai, aemaise lava le taitai, le afioga ia Palusalue Faapo II, saunoa ma fai mai, ‘ua faatogafiti e le malo ia faaiuga e pei ona fesili faalua ai le Fofoga o le maota.’
Po ua maua se fesootaiga ma lau afioga i le Palemia e tusa i au lafoga, lea na lafo ai e tusa foi ma le faaleoina o le suafa o le faipule ia Levaopolo Talatonu.
Fai mai latou, ua ofo foi i le lē maua o se avanoa, e pei ona fesili faalua ai le Fofoga o le Maota. Sei faalautele mai pe te saunoa i lea mataupu, ma le agaga faaaloalo?
Palemia: O mataupu faavalevalea uma a na mea. E faatoa o atu nei ananafi nei faipule, ae sei faalogologo i ai i lafoga sa fai i taimi o Tupua, matou iai faatasi ma Vaai ma Tofilau, e tatau ona o e faitau uma a matou felafolafoaiga sa fai i ai i na taimi. Nei ua oo a i nei tamai mea, ua leai ni mea e talatalanoa ai.
Radio Samoa: O le fesili, e pei ona lē talia ai nai tamaiti i le suega mulimuli i le Papaigalagala, la ua teena mai. O iai se fesoasoani a le Malo?
Palemia: O le tulaga lena o lea e fono ai le Kapeneta i le aso a taeao.
O le mea ua tupu faatoa logo mai au e nai tamā, ae o le taeao lava lena e amata ai suega. O le mea a lenei o le faatamala i le totogiina a pili.
Manatua foi o le eseesega o mea ia o pili o aoga ma mea o faalavelave faafuasei e pei o le oti; e tupu mai loa a le oti, pe na o le tasi a le vaiaso e saili ai mea e fai ai le oti. Ae o le mea lenei o le pili, e tolu, fā masina o saili.
Lona uiga la, e pa‘ū atu lava i le faatamala o mātua. Lea foi na omai mātua ia te au ma faalalolalo mai ia te au, ua leva ona vinavina mai le iunivesite, ae o le faatamala a, e lē o se ma‘i fou le ma‘i lea.
Sa ou aamia foi le pule o le iunivesite ma ia tau maia, ua leva ona fofoga mātua ma faamanatu, ae o le mea a lea e masani ai tatou, o le ave o le faamuamua i isi mea ae lē mamafa ia i latou ia pili o fanau.
Ae o le iunivesite foi latou, e pei a o iunivesite iinā; na ona lē totogia a o le pili, off ma le aoga e lē mafai ona sue. Ae o le mea lenei faigata foi o le faalagolago i le va fealoaloai.
O le tulaga la i la‘u mātau, o la e sa‘o le iunivesite. Ia tuu mai foi i mātua ia, o la e sa‘o foi mātua; ua taufai sa‘o uma a la. E leai a se mea e ese ai ma le tuugataavale na fai atu i le isi foi tausaga.
E vaai mai le avetaavale o le taavale laitiiti lea iina i tala atu o Saleimoa, i Utualii o loo alu atu le tuugataavale a pasi, ae la e telē a le avanoa e tatau ona ‘alo i ai. Ae manatu a le avetaavale laitiiti lenei sei tulituliloa lona sa‘o. Ia o le sailiga sa‘o la lena e uma ane ua tietie le pasi i luga o le tamai taavale, oti ma le toeaina na avea le tamai taavale, oti ma lona toalua, i le mea a lea o le suega o le sa‘o. Ia lea la ua tupu le faalavelave, sa‘o le iunivesite, sa‘o mātua ae faaletonu ai aoga a le fanau.
Lea la ua oo mai ai ia te au le manatu o le a matou fono taeao, ma samania le iunivesite sei matou feiloai taeao, poo le ā le ituaiga fofo e fai i tamaiti la ia ua lē mafai ona sue. …O lona uiga la, o le sa‘o silisili lea o le a saili taeao e tau faasa‘osa‘o ai tamai sa‘o ia.
Radio Samoa: Fesiligia e le afioaga o Satapuala e pei ona vevesi ai foi i le falemai lea sa iai. O lea ua māua, ua toe foi atu malu o le malo sa faaupegaina e leo le fanua, fai mai ua matuā maualuga a le vao. O fea ua fai i ai le vevesi lea faamolemole?
Palemia: Manatua foi o mea ia e faatupe mai fafo. O le taimi lea sa manao ai le Malo Amerika e fia maua tonu le fuataga, lea na ala ai ona faatino loa le mea lea. Masalo e le o toe umi.
Ae o le mea lea e (omit….) le mataupu, o le tau atu ia Satapuala e leai se latou aiaina o mea a le malo, ae o lea e saga aiā mai lava.
E leai ma se feau a Satapuala aemaise toeaina ia na soona talatalanoa mai fua i fanua o le Malo, taatia ai pea fanua o le Malo ia, tusa a pe ola ai le vao, taatia pea fanua o le malo. O le mea lena e tupu ai le vevesi o le manaonao fua i fanua o le Malo.
Radio Samoa: O lea ua toe ave i tua le lafo a le Malo, talitonu ua maea le talanoaina ma le faitauina faalua o le tulafono taufaaofi o le komisi faufautua o fanua faaleaganuu, 2011 i lona faitauga lona lua….O le ā se lumanai pe afai ae faataunuuina lea fuafuaga i le komiti taufaaofi lea ua iai?
Palemia: O le komiti lena e na o le toatolu a tagata. E fai ma latou galuega le saili o ni atinae o ni tagata iinei poo ni tagata mai fafo e atinaeina le tele o tatou fanua o loo taatitia ma ola ai le tavai, o le kava, faapea ma fuafua. Ua tele i le o atu iina ae taatitia fanua.
O le tulaga lena o lea e tutupu i totonu o nuu. O lea la sa aumai ai foi atugaluga o tulaga masani a o le Itu agai, soo se mea a tetee faasoloatoa.
O lea la ua uma le faitauga lona lua, lea foi la ua alu i le komiti e valaau ai le atunuu e o atu e faaali ni o latou taofi.
O le auala lena e faatino ai galuega faapalemene. Masalo poo le toe a‘e o le fonotaga i le aso 18 o Tesema e faamaea ia Ianuari e fai ai iina le faitauga faaiu, ona amata galulue ai loa lea o le komiti lea e toatolu.
Radio Samoa: Ua māua e talitonu e taimatalii foi lau afioga i le Palemia poo le faatamā o taulasea o Samoa. Ua māua ua malepe ua iai nisi ua o ese. O le ā le tulaga faamolemole lau afioga i le Palemia i le tulaga ua oo i ai le asosi a taulasea o Samoa?
Palemia: O lau faalogo foi lena auā ou te lei iloa, ae o lau faalogo lena i le leitio. Ia o le faiga lea o mea faapea i faalapotopotoga, o se taimi ua malosi o se taimi ua malepe. E lē o se mea e fou lena mea.
O lea a ua oo i ekalesia. Ua faapena ua lua ekalesia Aso Fitu. Ia o lea foi ua iai foi le EFKS Faafouina, ia la foi ua iai ekalesia foi ia, e EFKS, EFKS ua oo i le taimi e tatau ai ona litaea ae mumusu, ia ona tutoatasi foi lea.
E tele a iina i Niu Sila le mea lena. Ma o le tulaga la lena o lona uiga e oo a i ai le EFKS, o le avatu o le faatonuga ae mumusu lea ekalesia, ona tutoatasi foi lea.
O le faiga a o se mea, e iai le taimi e lelei ai le faalapotopotoga, ae iai foi le taimi e feeseeseai ai. O le lalolagi lenei tatou te iai, o le lalolagi e tumu o lea e fetafai solo ai le alii o le lalolagi, e tele ai mea faapea e tutupu ai ma lololo atili ai le lalolagi.
Radio Samoa: Ua māua ua feteenai pagota i totonu o le toese, talu ai ia faatulou foi i le itu o faafafine. Ua fesiligia e se tasi o faipule i Falealili, le afioga ia Tusa Misi Tupuola e faapea, le tulaga o faafafine ma faafatama pe a faapea e o atu i le falepuipui.
Ua tatau ona iai lava se nofoaga faapitoa mo i latou, auā ua feteenai mai e tama, feteenai mai foi e le itupa vaivai. O le ā sou finagalo i lea tulaga Tuilaepa?
Palemia: O le mataupu i le lalolagi lenei, o tagata uma a e fausia mai mea e ta‘ua o chromosomes, poo seula o le tino. E 46 chromosomes lea e fau ai le tino o le tagata. E 23 chromosomes mai lou tina, 23 mai le tamā.
O le tulaga la i le soifua maloloina, o le faaigoa o le chromosome, o le X ma le Y. E 2x, 1y o chmorosomes lena o le tamaloa. A 2y, 1x o chromosomes lena o le tamaitai.
O le mea la lea e tupu, o chromosomes lona uiga o seula ia o le tamaitai lea ua fau ai le tino o le tamā, lea o ona totogasā, o totoga o le tama, ae o chromosomes o le tamaitai lea e fau ai.
O le ala lena e ola ae ai le tagata lea, e teine la mafaufau, teine uiga, e fiafia foi e alu i le mea o iai teine.
Lea la e iai faafafine. A o fafatama, o tamaitai ia o foliga uma a o le tamaitai, sei vagana o chromosomes o le tama lea e fausia ai.
O le ala foi lena e amio faatama, fiafia e ofu faatama, e oo lava foi i le leo e leo faatama. E fiafia a la e alu e mix i le mea o iai tama.
O le uiga o le faamatalaga lea ou te fai atu nei ia te oe Taito, e sā ituaiga o tagata ia i le lalolagi.
O tama e atoatoa, o tamaitai e atoatoa, ia ma tama ua fai chromosomes o tamaitai, ma teine ua fausia chromosomes o le tama. Lea la e maua ai le tulaga ia o faafafine ma faafatama. Lona uiga o le latou natura lava na fananau mai ma latou. E iai la le mea e tupu.
O nisi o faafafine ua o fai a latou taotoga, ua matutua fanau, ae lē mafai a ona aveesea le naunau e lilifa agai i o o latou o chromosomes o le teine lea e fau ai, ona iu a lea ina o e fai taotoga, ina ia maua uma foliga ma totogasā o le tamaitai. Lea la ua ou ta‘ua le faavae o mea ia, o a‘u ou te malamalama lelei i mataupu ia e lua.
Ma e tāua le mataupu lea e te aumaia, o le mea tonu a lena e tatau ona fai. E tatau a ona fai ese se falepuipui e tuu ai faafafine, fai ese se falepuipui e tuu ai fafatama. …o le tele a o tatou tagata e lē o malamalama i mea ia sei vagana tagata ua malamalama ai ma faitau i mea ia.
O lena foi e iai le falemai tele i Amerika i Kalefonia, e galulue ai faafatama ma faafafine, pau a lea o le latou galuega, o le taoto uma ai a o faafatama ma faafafine, e toe liliu o latou tino, ina ia avea ai faafatama o ni tama, ae avea faafafine o ni tamaitai. Ae o lena ua tali lau fesili.
Radio Samoa: Na māua i le vaiaso na tea nei, o se vaiaso tāua i le kalena o fuafuaga fai a le malo i tausaga taitasi, e pei ona faatāua ai le puipuiamalu i le saogalemu o lo tatou siosiomaga, e lē gata i le vaomatua ma meaaola o loo nonofo ai, ae faapea foi le gataifale ma le vanimonino.
E mafai ona e faalautele mai le tulaga lea mo le silafia e le mamalu o le atunuu?
Palemia: O lea ua faigofie ona iloa le anoano o le mau mea valea ia e fai, o le soona tatipi lalo o laau ma mago ai le vai; o le saga o e ave mea ia e tapue ai i‘a ma faaonanā ai i‘a.
Pau a le mea lea e taumafai i ai le malo, o le tōtō o laau ina ia puipuia ai le vai taumafa ia maua pea le vai e feinu ai tagata.
Ma soia ia le toe o i le sami e fai uiga lē lelei ia o le faaonanā o i‘a a ua tele ina afaina ai ma le tatou siosiomaga i le sami ma pepē ai ma le tele o amu..
Radio Samoa: O le ta fesili mulimuli, o le faatupeina e le Malo o le sa o le taitai o le Itu agai, le afioga ia Palusalue Faapo II, ua iai ni fesili o sa‘i ai lagona, ‘aisea na lē faataunuuina ai lenei faamoemoe mai paeaiga ua mae‘a atu?..(omit)
Palemia: O le tasi lea mea sa faitioina ai matou, o le lē faia o ni auala e aloaia lelei ai le Itu agai. Ia lea la ua iu a ina fai le auala e o ifo e tietie ai ma feoai solo e sipai solo i mea o loo fai e le Malo ma vaai masei. Ina ia faigofie ona o e mataitu ma o e tilotilo solo i mea ia e fai e le Malo ma faufau ai a latou tala e tetee mai ai ia te au ma le vaega. E moomia tele ia malosi le Itu agai, ia ma ua ave i ai le taavale lelei e tietie ai le isi i le isi nofoa, ave e ia le taavale ma le isi toatolu i tua, ia la foi e telē le keli e ofi uma ai a le latou vaega.
O le faafaigofie o a latou galuega. Sei vaai la i le lelei tele o le HRPP, fai lelei le mea e fealuai ai le taitai o le Itu agai. E lē tatau la ona toe faitio mai ia matou, o la foi ua ave i ai le fanua e fai lelei ai se latou fale, e pei foi o le matou fale. Lea la ua faauupega uma a i tulaga e tatau ai ona avea o se Itu agai e aloaia….Ia faamanuia tele le Atua i le faaiuga foi o lenei vaiaso. … ia soifua ia ma ia manuia.
