Afai e atoa a le toalima i le tulaga o le faiga palota ua sau, 49 sui; 44 tamaloloa, 5 tamaitai, na lava la ua atoa i le tulaga o le faitauga muamua o le faiga palota, ia ona 49 a lea o sui e leai se mea e suia. Lona uiga o le tulafono ia, o se faiga taugamalie e mafai ai ona aumai tina e aunoa ma le faaafaina o finagalo o itumalo e mananao a latou e aumai tamā.
Ae faatoa faaaogā a le tulafono, pe afai ua lē atoa le lima o tina, faaaogā loa. E faigofie lava le tulafono. Ae o le tulaga lea o le faifai mālie ma mātau le Trend, ia o lea e iloa lelei e sa‘o, ua siitia le aofai o tina faipule i le 50 tausaga lenei, mai le tulaga na iai le sui toatasi na uluai ulufale i le Palemene, le afioga ia Faimaala, o ia lena o le Sui Tamaitai na mua i malae, lea la ua faaiu tonu a le 50 tausaga, ae lua pe a tamaitai ia e iai nei i totonu o le Palemene. Lona uiga la o lea na amata i le tasi, lea ua uma le 50 tausaga ua oo i le 2, toe uma ane la le isi 100 tausaga ua 3.
Ae manatua foi, o le Trend, o le fesuiai mālie, e mafai foi ona alu i lalo. Lona uiga pe 2 lea ua iai nei, ae oo i le isi selau tausaga lea o loo i lumanai, poo le isi limasefulu tausaga lea o loo i lumanai, ae uma ifō, ua leai se isi.
Ma na tupu le mea lena i le nofoaiga lea talu ai, na 4 tina sa iai i totonu o le Palemene, tamaitai faipule, ae oo mai nei ua 2, o lona uiga ua pau mai le 4 i le 2, toe oo atu i le 50 tausaga ua leai. Ae o le faiga lea ua faataoto e le Malo, o se faiga e mautinoa ai, e iai lava le 5 i taimi uma e fai ai le faiga palota.
A alu alu loa lava ua saū le mea, ua masani a itumalo i le faafoi mai o le lima, ona lē toe faaaogāina loa lea o le tulafono ae toe pau a i le 49 i tausaga i le lumanai, ona taoto a lea i le tulaga taugamalie, ua lē toe faaaogāina le tulafono, ona o lea lava ua otomeki a le omai o le toalima i le tulaga o le uluai faitauga o le faiga palota, o lea a ua omai uma tina i le first pass seat, ua lē toe faalagolago i le economy seat.
O le tulaga la lena o lea sa ou faamatalaina, ana faapea e manatunatu loloto ma mafaufau loloto le Itu agai i le tulafono lea e avatu, ona latou iloa ai lea, e leai, o lea lava ua iai i totonu ituaiga o mafaufauga ia, i le faifai mālie i le agai atu i le lumanai. Ia te au la, ua leai se case.
Na o le pau o le mea e tatau ona fai e sui o le Maota, o le faapea ane loa, “Hosana Praise the Lord” ae ua ou te‘i i le alaga mai o le isi sui matua o le Itu agai, “Aleluia!” i le po, ia puna mai loa ma le Fofoga Fetalai, “Amene” o lea ua uma, ua oo i le iuga o le mataupu.
Ua ‘praise the Lord’ mai Tuilaepa, ‘aleluia’ mai Leala, ia lea ua ou ‘amene’ atu, ua uma le mataupu, ua pasi le Tulafono. Ia o le tulaga la lena, o lea ua pasi le Tulafono i le faitauga faalua, see loa i le Komiti, lea la ua iai nei mo nisi molimau e aofia ai la ma le SUNGO e o atu e fai ni latou molimau, ona tolu loa lea o masina, poo le masina o Iuni, foi mai loa le Tulafono, ona matou palota loa lea, o le palota la lena e tauvalaau, o le a valaau loa le sui poo fea e iai lana palota. Ae o ituaiga mea foi faapenei, ua aiaia i lalo o le matou foi faiga faavae o le HRPP, e sa se faipule ona palota ese, o taimi la ia ua tutu faatasi ai loa le HRPP e palota faavaega, e lagolago atoa le tulafono. Lona uiga la o lea a ua tatou iai.
