O le tulaga la lea o le saili malo, e lē mafai ai ona fai se faiga e faapea atu, e pei ona fai mai latou, e sue mai se lua mai Savaii ae sue mai se tolu mai Upolu.
E lē mafai ona fai lena mea. E fai atu loa i nuu afai e afe nuu o Samoa, o lona uiga a fai le palota e sue mai ai ni tina, e afe foi sui e tutulai. O le matuā lē talafeagai ma a tatou tu ma a tatou aganuu. Aisea? Leaga e iai a le uiga lena o le saili malo i nuu.
O le ala foi lena ua seāseā toe iai se itumalo e sao mai se sui e aunoa ma se faiga palota, ia vaganā a foi si tama lea na sao mai ai totonu a, ia ma le afioga foi i le sui faipule o Anoamaa i Sisifo, le fetalaiga ia Fonotoe, lea la na toalua ai ma‘ua e lei palotaina le tofi. Ae o le uiga a o nuu, e lē faigofie la, e alu a i le tulaga masani, e filifili a le nuu a latou le sui ua ioe i ai. O le tulaga muamua lena e lē fetaui ai manatu ia lē aivaa e aumai e le Tautua.
O lona lua o le manatu lea faapea e taoto pea le tulaga i tina e alu alu a pa‘ū i lautuatogi, o le manatu lena e mafai ona faapea, o lea a ua tuu i totonu o le Tulafono lea e avatu e le malo, lea a ua iai.
Pau le eseesega, o lea e manao le Malo, e amata i le lima, ia iai se Tulafono e mafai ai ona faatulaga a sau loa le iuga o le Palota e lē atoa le lima, ona faaatoa loa lea e le Tulafono, i le faaopoopo o sui.
Ae o le tulaga lava ia, a sau a le faiga palota e mananao itumalo na o tamaloloa e omai e 49 sui tamaloloa, o inā la faatoa faaaogā ai loa le Tulafono lea, ma filifili mai loa tina ia sa tamomoe, e maualuga a latou palota, filifili mai ai loa le lima.
O lona uiga, e lē o afaina a pe taofia ai le finagalo saoloto o itumalo i le faitauga muamua o le palota, e aumai ai tamaloloa pe afai o le manao lea o le itumalo. Ae a uma loa ona faitau le palota ma ua vaai atu le Malo e 49 sui ia o tamaloloa, lona uiga e leai a ma se tina o sau, ona faaaogā loa lea o le Tulafono, vaai loa tina ia sa o i le Palota e pito maualuluga a latou palota, aumai loa sui faaopoopo na e lima, ona 54 ai loa lea o sui o le Palemene.
Ae afai foi e sau le faiga palota e 48 tamaloloa ae na o le tasi a le fafine, aumai loa le fa na o i le faiga palota, o matai tamaitai, aumai loa le fa faaatoa ai le latou lima. Lona uiga o le Tulafono lea, o le Tulafono faaleoleo.
