O lea la sa fono le Palemene ananafi ma tala atu ananafi, na alu le aso atoa ma le po o talanoa le teuteuga o le faavae, ma faaiu aloaia i le ta o le 10 i le po o le Aso Lua, i le pasia loa o le Tulafono Faavae, ma ua see atu nei i le Komiti o Tulafono mo le faatalanoaina ma le lautele o tagata o le atunuu e o atu e fai ni a latou molimau.
E 3 la masina i lalo o le faavae, e tusa ma le teuteuga o le faavae, e tatau ona oo atu loa i ai, faatoa fai loa le palota faaiu, le faitauga lona tolu, o inā la e tatau loa ona ausia le 33 o nofoa e lagolagoina se mataupu faatoa aloaia loa, o le 2/3 lena o le Palemene, ona e oo loa i le Faavae, e tatau a ona maua se 33 o sui ona faatoa avea loa lea o se Tulafono ua pasia. E oo loa i le teuteuga o le faavae, ona tatau lea o le 2/3 e pasia e le Palemene.
Ae manatua foi, e 37 le aofai o sui o le Palemene lea ei le HRPP, o le 75 pasene lena o le Palemene, e leai la se mea e popole ai. Ae i le faatalanoaga, ua atagia ai, e lagolagoina uma a e le Maota, e aofia ai ma le Itu agai, ina ia faatoatele sui o tina. Pau a le mea na aliali mai, e lē o lagolago e le Itu agai le auala lea e faatino ai.
Ae lagolago le tulaga o le faatoatele o sui tina, ae lē fiafia i le auala lea e faatino ai, ona fai mai latou, e lē mautinoa ona e feosoosofai solo le aofaiga o sui e lē mafai ona iloa ai i le 49 i le 54. Ia ma le tulaga la lena, a maua tina, e pei ni sui foi ia faatumu pu, sui faaopoopo.
O le isi a latou taofi, e tele auala. O le isi auala o le tuusa‘o i le atunuu i se faiga foi lele, e ave ai le isi lua i Savaii o tina, ae tuu le isi tolu i Upolu, e faatulafono sa‘o mai a e le Tulafono o Faiga palota. Ae o le isi o latou manatu, e tatau ona tuu pea, o lea e iai le mea e igoa o le Trend, e alu alu a, ona taofo lea i le tulaga taugamalie le siitia o tina, ma agai atu ai lava ina atoa le toalima pe sili atu foi.
E pei la o le tulaga lea e iai nei, nai lo le fesiitai fua o le aofai o le Palemene mai le 49 i le 54 e mafai ai ona oo i ai le sui faaopoopo ina ia atoa ai le toalima o tina i totonu o le Palemene.
O ina la le tulaga o mafaufauga o loo aumai e le Itu agai. Ia na ou ta‘ua a i le Itu agai, e leai a se manatu o latou aumaia e aogā, talu ai ona e tele a mea ia ua latou laaloa ai le latou vaai. Mea muamua o lo‘u taofi lea, e tatau ona latou nofouta i le mea lenei, o le atunuu lenei o Samoa, o le atunuu e pulea e matai. Ma e tatau ona faautagia tulaga masani o le faamatai.
O le faamatai lena na pulea ai Samoa i le tolu afe tausaga talu ai, ma o loo tumau pea ona maua ai le filemu o Samoa. O le faamatai la lea o lea e misi atoa i le latou silasila. O le uiga o le taofi, e pule a nuu latou. A oo ina fai le filifiliga, e iai le mea e igoa o le saili malo i le filifiliga o sui o le Maota.
O lona uiga o lea mea, e tulai mai se itumalo e tolu ni nuu, mo se faataitaiga, e tiga ona tulai mai le sui lea e o loo iai nei, o loo lelei ona faafoe e le sui gaioiga uma auā le itumalo, ae oo a‘e a i le taimi o le a fai le faiga palota, e fiu a le sui lea e toe tatalo atu, malilie maia toe tuu mai a‘u se‘i ou alu, ae tasi a le upu a isi nuu, e malie e faatu foi a le matou sui, oso mai le isi nuu, e faatu a foi le matou sui, ia fai loa ma le palota.
