Palemia: Eleai o le tulaga lena o lea ua uma ona fofo foi. Ona o le itu a ia, e afua i faitioga foi a nisi, o lea lava ua leva ona folafola atu e le TV1, o le a agai atu ata, ae o lenei lava e lei faia se mea, se‘i vaganā le TV3.
O le tulaga la lena e pei o lea e mafua ai faitioga e lē tatau ona ou soona faitio i mea ia. Ae o mea lava, afai e oo mai ia te au le faitio o tagata, e tatau a ona ou faaleoina.
Pei la ua avea foi lo‘u faaleoina, ma mea ua logo mai ai a‘u e le TV1, o lea o le a fai mo‘i a le latou galuega, o le o loa e toso le latou TV i nofoaga ia e lei oo a i ai, aemaise nofoaga sa iai muamua ae na faaletonu ona o le sunami ma pe mai ai a i lena taimi. Ae o lea o le a o mo‘i loa e fai loa.
O uiga a foi ia, o le faalavelave o le TV1, o la e pulea ma faagasolo foi e i latou sa iai i le malo i lena taimi, ia la e mafaufau pei o tagata o la e i totonu o le Malo, ae ua leva ona tatau ona faapisinisi mafaufau, ma pulea loa ma faatonutonu le TV e pei ona masani ai mea nei o pisinisi. O le tulaga la lena ua fofo foi lena tulaga. Ua uma foi ona fesootai ma fai mai ou te malie, o la o le a o loa e faatino le latou galuega e pei ona tatau ona fai i tausaga ua tuanai.
Radio Samoa: O lea na māua, sa iai se tou fonotaga ma faalapotopotoga i tua atu o le Malo, poo i latou uma i lalo o le faamalu a le SUNGO, i le aso 1 o Mati, o lo latou teena pea o le Tulafono Taufaaofi o loo vevesi ai nei e uiga i nofoa foi ia e 5 a tamaitai poo tina i le Palemene.
A ia manatua lelei, e talitonu a le faamoemoe, na soifua mai lava le Palemene, i le taimi na soifua mai i luga o le laueleele o Samoa, ae talitonu o le taimi tonu a lena ua agavaa ai tina ma tamaitai, ne‘i lē oo i ai so‘u iloa, i totonu o le Palemene i tulafono. Ae talitonu lava, e iai se sao o tina i totonu o le Palemene pe a faapea e sao i ai. Ae o lea lava e fai mai latou, e lelei lava le o i ala o mea.
O loo teena e latou fai mai o le ala e ofi atu ai tamaitai ma tina i totonu o le Palemene, i alu alu suaga a le vaatele, nei iai se agaga foi lele, o le ‘au faatumu pu. Pei o le agaga lea o lea e ia i latou, ae lelei a le saunoa i ai o lau afioga i le Palemia, lau afioga Tuilaepa?
Palemia: O le manatu lena faapea o le sui faaopoopo o le sui faatumu pu, e mafua foi i manatu faatauemu o loo lagalaga e le Itu agai. O se manatu foi lea o le vaai faatauvaa ina ia faatupu ai se lagona e valea le mea lea e fai e le Malo.
