O lea loa la na manao ai le Malo e fai le mea lea, ina ia iai se mea e tua i ai tagata lautele o le atunuu ua afaina le tauleleia o le latou igoa, ona o ni lipoti e lē fetaui ua faia le Observer poo ai lava poo se leitio foi, i se tulaga e lē faavaea.
E lua la mea e manao le Malo e fai, o le faatu o le itutino lena, ma faavae loa ma le tulafono e faataoto atu ai tau o loia ina ia mulimuli ai, e lē gata i lea ae o le faamalosia loa o le sue o tusi a loia, tai tolu masina ma sue, e pei foi ona fai i Niu Sila, e puipuia ai i latou o loo ave a latou seleni e teu e loia, e fuafua mo mea o teugatupe faamavaega, i tulaga foi ia e faaaogā i luga o aiaiga talafeagai, ae aua ne‘i faaaogāina e loia i se isi a mea.
Ua tele loia iinā i Niu Sila ua falepuipui ai, i le mea lea o le faaaogā faaletatau o tupe, ia lea foi la ua manao nei le Malo ina ia sue tusi a loia. Ia tasi lena mea ua tetee ai foi loia i le tulaga lena, ia ma le mea la lea o le taofiofi o le soona tuu i lugā o totogi, lea o le a faatulaga atu loa e le Malo le maualuga e oo i ai a latou totogi, ma ua faasā ona toe faaaogāina e se loia ni aiaiga, a lē mafai ona totogi e se tagata, ua ave a latou fanua umia saoloto.
Ua taofi atu foi e le Tulafono. O le tulaga lena talu ai le tele o nisi o aiga ua afaina ona ua ave e loia o latou fanua, i le auala lea e totogi ai a latou totogi maualuluga. Tusa la e lavelua le mea lea matou te aiaikuava ai i lenei foi taimi ma le autusitala ma le ‘au loia. O le faamatalaga lena. E lē o se faiga fou, o le faiga ua masani ai malo temokalasi, lena e fai iinā i Niu Sila. Lea foi la e manao tatou e faatu le tulafono ia e limataitaiina ai le autusitala. Lea la faatoa feosofi nei e fai loa le mea ua leva ona matou talanoa i ai ma fai mai e lafo atu ia latou o le a fai, ona o loa lea nofonofo ma leai se mea e faia. Lea la ua ta‘u atu loa e le Malo, ia lea la fai mai loa o le a o e fai loa le latou itutino. E lē o se mea o le a taofia ai, e fai a le itutino a le Malo e tua i ai tagata ua afaina lo latou igoa i tusitusiga ae ua lē mafai ona tagofia le Tulafono ona o le taugata o loia ma a latou pili. Ia lea foi la o le a faatonutonu le tulaga o pili e tatau ona oo i ai, o tau o loia ma le latou tautua. Ia o lena ua fofola atu tulaga uma e pei foi ona matou aiaikuava ai lenei taimi ma le autusitala ma le ‘au loia.
Radio Samoa: O le ta mataupu e uiga i le TV1. Talitonu sa pulea muamua e le malo le TV lea. Ia ua faatauina atu i nisi o le mamalu o le atunuu ma le latou tala, a maua le latou TV, o le a faapena ona soo ai Savaii ma Upolu o le a maimoa ai.
Ae oo mai le taimi lenei, e lei oo faatasi i Savaii faapena foi o loo fia maimoa, aemaise lava o taaloga a le Fitu ma le Manu Samoa o loo faagasolo atu. Ae o lea ua faaseā nisi fai mai, e lē tatau ona faaseā lau afioga i le Palemia, ae lelei lou oo i ai ona e silafia ai. Ae o lea ua mautinoa, o lea sa i le Malo muamua. Se‘i e faalautele mai lea mataupu ma le agaga faaaloalo, lau afioga Tuilaepa?
