Palemia: Ua silia i le sefulu ma ona tupu tausaga sa faatalatalanoa ai faatuina o se itutino o le autusitala, e avea o se itutino e mafai ona latou faatonutonutatauina le galuega a tusitala ina ia mulimulitaia tulaga masani e tatau ona iai ia amio a le autusitala, le latou Code of Practice. Ua silia la i le sefulu ma ona tupu tausaga sa talanoa ai le mataupu lenei, ma ioeina ai e Sano o le a fai se latou itutino e silasila toto‘a i tulaga ia. Ua ova la i le sefulu ma ona tupu tausaga e leai a se mea a Savea o faia, ae na o le tausolomua lava ia ma lana nusipepa le faifai mea valea, ma tusitusi tala i isi tagata, ma lē tusi sa‘oa, ma lē tausisia ai taiala e tatau ona taiala ai mea nei o le aufainusipepa, i le tusia lea o tala moni ae aveese le tulaga foi lele o lou nofo ma momono i ai ma ou foi mafaufauga. E na o le tasi a le nusipepa o lea e fai soo le mea valea lena, na o le Observer.
E aofia ai ma le mea lea o le tusi o faamatalaga matuia e faatatau i tagata ae lē o sa‘o. E lē gata i lena ae o le faaaogā o le igoa o isi tagata e lē iloa e le lautele, ae o i latou foi a o lea e faigaluega i totonu o le nusipepa, ma Savea lava e latou te tusia ia mea ma tusi solo ai igoa o isi tagata faapei o ni tagata e lē o iloa e le lautele o le aufaitau.
Ae tele a la mea faaletonu e tulai mai pea, o lona faalavelave la, e iai taimi e tusi atu ai ia Savea e faasa‘o se tala tusia, ae musu e faasa‘o pe musu foi e faatoese mai.
O le mea la e fai e le tagata ua afaina lona suafa, o le agai loa e fai se moliaga e faasaga i le nusipepa. Ua tele foi ina lavea le nusipepa i le tele o moliaga ua faia ma iloa ai le lē sa‘o o faamatalaga. O isi taimi ua faatoese mai a le Observer, a o isi taimi e lē faatoese mai, ona faataunuu lea. Ae o le tulaga la e tulai mai ai, o le matuā telē o le tau e faatino ai e le tagata o lea ua afaina.
E sulu mai la ii i le tulaga o moliaga ua faia, ae toe soka ai iinā e loia latou i le maualuluga o a latou tau. O le tele o taimi nei i Samoa, e talanoa atu i le loia i se moliaga, ae sau le tali e totogi muamua atu le 20 afe faatoa faia ai lea o se moliaga. Uma ane ua ova i le 100 i le 150 afe le tau.
E lua la mea ua faia e le Malo, o le tulaga la lea o le faatuina loa o se itutino e pei ona iai foi le BSA iinā i Niu Sila, e puipuia ma uunaia le autusitala ina ia tausisia taiala lelei o mea nei o tusitusiga. Ma e soli loa ma faasala loa foi e pei ona faasala ai le tamaitai o Barbara Dreaver, ina ua momoli atu e le tatou Malo. Lona uiga, o le mea lea tatou te faia, o mea o loo faia e atunuu temokalasi tai pei o Niu Sila ma Ausetalia. O le tulaga la lena ua atili ai ona aliali mai ai le faavalevalea o le ituaiga manatu lea na faaali mai e Savea, ua faatusa ai a‘u ia Bainimarama, ae o mea ia e moomia e le malo ina ia iai se itutino e tua i ai le lautele o le atunuu ua afaina i le faaleaga tagata ma faasaoina ai le tagata mai faiga lē mafaufau foi a loia latou. O le tulaga la lena, e tali atu ai foi la ma lena lafoga faavalevalea na fai e Savea, ua faatusa ai a‘u ia Bainimarama. Ae o le eseese o Bainimarama, ua matuā faasā lava se tagata ona faitioina Bainimarama, faasā ma soo se nusipepa ona soona tusi se mea i le Malo. A o fuafuaga ia e fai e le Malo, o fuafuaga e masani ai atunuu temokalasi e pei o Niu Sila ma Ausetalia.
O le faalavelave, ua leva tele ona saoloto le Observer e fai mea valea ia e fai soo, lea a e fai i le taimi lenei, ua taumafai atu la le Malo, ae ua masani ai le Observer ma le vaega lea i ituaiga tulaga ia, ua mumusu e toe suia.
