Radio Samoa: Faafetai i le Atua o lea ua maua mai le fesootaiga ma le Taitai o le Malo. Avea ia le leo faatauvaa o le auauna e fai ma fofoga faaleo o le mamalu o le atunuu i Aotearoa nei, faafeiloai atu i le agaga faaaloalo i lau afioga i le Palemia, lau susuga Tuilaepa Sailele Malielegaoi. Malo le soifua maua ma le lagi e mamā!
Palemia: Faamalo i le valaau mai foi i lenei itula afiafi e tusa ai foi ma le tatou polokalame talatalanoa i lenei itula afiafi auā le faafogafoga foi a le tatou atunuu. Ae lafo atu ia e amatamea lau susuga Taito.
Radio Samoa: Talitonu ua uma ona ta talanoa, saunoa foi i le tulaga lea. Ua faafagogo atagiao le mataupu ia ae lelei lava, a malamalama lava e fiafia foi le atunuu aemaise foi lau afioga. Ua fautuaina e le Malo se itutino mo le aufaasalalau poo tusitala, poo media council e pei ona fautuaina ai e le Malo.
Ua maua le tala ua lagolagoina e i latou o galulue i nusipepa, leitio, televise, le tulaga lea. Ae fai mai latou, e latou te lē mananao e iai se sao o le Malo i totonu talu ai, fai mai latou o faiga faapolokiki.
Pau lava le mea e moomia e latou o le lagolago a le Malo i le media council e faatupeina, aemaise o lea foi ua matuā tetee mai lava se tasi o faatonu o le nusipepa o le Observer, le afioga ia Mataafa Keni Lesa, lona lē lagolagoina o lea mataupu, aemaise foi le faatonu sinia o lea foi nusipepa, le afioga ia Savea Sano Malifa, lona faaseā i lea mataupu.
O lona teena fai mai, e tatau lava ona mulimulitai i latou i le latou taiala, poo le Code of Practice, e limataitaiina ai le latou galuega, ma ia faatusaina ai tulou vaeane lau afioga i le Palemia, ma ia faatusaina ai lau afioga i le taitaiau a Fiti. Ae manatua e silafia lelei a, e leai ni au fitafita Tuilaepa, e leai foi se laau malosi o e fealuai ma oe, e pau lava, na o lou iefaitaga ma lou alo‘a.
Ma ua fautuaina foi e le Malo e ala atu i le Komisi o le fuataina o tulafono, ina ia fausia se tulafono e ta‘ua o le Tulafono mo le Saolotoga o Faamatalaga poo le Freedom of Information Act, e agavaa ai le lautele o le atunuu ia ma le autusitala ma le aufaasalalau. Ae lelei lava, lafo atu ia i lau afioga i le Palemia pe a tusa ma lou finagalo, se‘i e saunoa i le ta mataupu ua uma ona ta talanoaina.
