Talanoaga ma le Palemia – 12 Aug, 2010

O le tele o le faatupeina foi o lena ofisa, e faatupe mai e le Iuni a Europa. O le Iuni foi la e Europa lea o loo fuafua e tele foi le isi fesoasoani lea e ono tafe mai ai mo ituaiga o atinae eseese e ono fai mo le tulaga foi lea o le puipuia o atunuu mai le fesiitaiga o le tau lea o loo faafefefefe ai nei le lalolagi, i le ono siitia o le fogatai, ona o le liusuavai o pole aisa i Matu ma pole aisa i Saute, o loo loka ai le suavai i totonu o le aisa.

Ae talu ai le mafanafana o le ea lea ua molimauina ai le liusuavai o pole aisa nei ma alu ai i luga le suatai. Ma o le tele a o finagalo ua faaalia e saienisi, e ono magoto uma ai i lalo Tonga, ma Toealu, o Kilipati ma Tuvalu, e oo foi la i le tatou atunuu, e ono magoto ai ma afioaga tu matafaga.

O le ala lea e ala ai ona faatāua tele e le tatou malo auala galue, ina ia faigofie e o tatou tagata ona see i uta i mea maualuluga i tuamaota e nonofo ai, ina ia taumamao ese mai le mafola tulata i le sami.

O le tāua o faamatalaga ia ou te avatua, ina ia malamalama ai i le tāua o le mataupu lea sa lāgā mai e atunuu laiti ia tai pei o Tuvalu ma Kilipati, ma le atu Maikorenisia, faapea foi ma Solomona, i lo latou naunau ina ia auai Fiti i totonu o faalapotopotoga lenei a le ACP, ona o le latou manatu o le faalapotopotoga a le ACP e lē tatau ona faaafia fua i faaiuga a le Forum.

Peitai ane o le faaiuga a matou, soo se fono a e faamaopoopo e le tatou failautusi aoao, o fono uma a na o le Forum. Lona uiga e lē tatau ona oso mai le faamalama le alii o Bainimarama, e faafeagai ma matou o taitai na filifilia aloaia, ae lē tatau ona oso mai ai ma se taitai na mafua ona taitai ona na ia faaaogā pulufana e faafefe ai tagata.

E lē o se uiga lelei lea i malo malamalama. Na o malo a tagata aivao e latou te faia ni uiga faapea, ma e lē tatau foi ona saofafai faatasi matou ma ni taitai na oo i le pule ona o uiga ia faamalosiau ma le faaaogā o meatau e faatino ai lana pule, e lē talafeagai.

O le faapuupuuga la lena, ua fai si umi o le faamatalaga, ina ia malamalama ai i le background poo tulaga ia o loo taoto i tua o finauga nei a malo nei laiti, ina ia toe faaulufale atu Fiti ina ia sao atu ai Bainimarama matou te faafeagai, ae peitai ua faalava le amoā, ia ma soloa ai le aufuefue se manatu vaivai faapena o loo aumai e atunuu nei o le Maikorenisia ma atunuu o le Melanesia. Ia o se faamalamalamaga lena i le mataupu lea.

Ae o le mataupu lona lua ou te fia talanoa i ai i la ma feiloaiga ma le Palemia o Key, o loo atagia ai le ta‘ua ai ia te au le toatele pea o tatou tagata e o atu i faalavelave, ona overstayer ai lea, o se mea matagā tele lea mea. Ma e mafua mai le mea lenei, ona o aiga i Niu Sila.

O lea e fesootai atu e lo tatou ofisa i Aukilani, e faufautua e foi mai i Samoa, ina ia aua ne‘i solia le tulafono, ae ua oo ina laulauvavale mai aiga nei i luga o le telefoni, ma fai mai nisi upu matagā.

Ma o le tulaga tonu a lea o lea ala ai ona faafaigata tele le galuega o loo faafeagai ma le malo ona o le toatele o o tatou tagata o loo solitulafono, i le o atu o o tatou aiga i Niu Sila e o atu i faalavelave, ona fai ai lea o uiga faigata ia, e na o le faatupu ai o le masiasi foi ma le ma, e faafeagai ma taitai o Niu Sila ona o uiga nei o tatou.

O lea la ua ou talanoa atu ai i le itu lea, afai o faafogafoga mai faafeagaiga faapea ma taitai o a tatou faalapotopotoga, se‘i fesoasoani ane i o tatou tagata, e leai a se tagata e solitulafono ma sao. E iai a le upu foi lele, ‘e sola a le amioleaga ae tulituliloa a e le tulafono’.

O le mea la lea e tāua tele le polokalame lenei, ua auala atu ai se fautuaga i o tatou aiga i Niu Sila, soia ia tou te fesoasoani e solia tulafono i Niu Sila. Ua atili ai ona faigata le galuega o loo faia e lo tatou malo, tupu ai ma le faafaigata ona talia o tatou tagata e o atu i Niu Sila, ona o uiga nei o loo tulai mai pea.

O le aogā lena o le polokalama lenei, e avatu ai pea le talosaga i o tatou aiga, a o atu mātua, poo uso poo fanau foi e o atu i ni faalavelave, ia tautuanā ia toe foi mai totonu o le taimi faatapulaa na faataga e o atu ai. O le ala lena e faafaigata ai tele Niu Sila iinei, ona o le toatele e lē faamaoni i le tulaga o aiaiga o a latou femalagaiga.

O le ala foi lena o lea e tumutumu ai pea lo‘u ofisa ua pei o se ofisa o femalagaiga, i le o atu i Niu Sila teena mai, o mai ia te au o‘u taumafai atu, ia ae na o le faafeagai ai ma le tulaga lenei, e faatupu matamuli i le Malo, ona o le toatele o tatou o loo lē amanaia le tulafono, e o atu loa iina, ona fai a lea o le ivi o le tagata ia.

O le faaiuga lena o le ta talanoaga i lenei itula afiafi, ae faamalo tele atu i le valaau mai, ae lē uma le faiaso o le Atua, tala soifua le vaiaso fou, ia ona ta toe feiloai foi lea i le alofa o le Atua. Ae i lenei taimi, ia soifua ma ia manuia le faasausauga a Samoa.