Talanoaga ma le Palemia – 12 Aug, 2010

Lea ua ou avatua loa i o i le vaega a Europa, e malilie ia ae saini ia i le Pasefika, o lea ua io le ACP, ia lolo loa ma le taofi o Europa, ia pati loa ae ua ta tonu a le 4:00 i le vaveao, ae ou liliu mai, toe pau a le minisita lea e tapuai atu, na o Sir John Coubletin o Papua Niu Kini, ae ua leai ma se Fiti o iai, ua o e momoe. Sa iai nai Tonga, ma nai Solomona officials, e tapuai atu le faatalanoaga lenei, ae ua leai le au Fiti ua o uma e momoe, ae o lea ua manumalo le Pasefika i le toe mataupu o le faatalanoaga o finauga nei e fai i le va o le ACP ma Europa.

O le taimi la lena ua ioe loa o le a saini Suva, pati uma loa itu e lua, matou tutu loa i luga, ae faasolo mai loa ona o mai foi le aufaigaluega a le Iuni e faasolo mai a matou ipu ua faatumu i le champagne, matou tutu loa i luga ma feei ma patipati e sami le taunuuga, ua faaiu le feagaiga ua uma ona ioeina ma o lea foi ua malilie uma, o le a o mai i Fiti e saini ai le feagaiga, ma o le a maualuga ai le fu‘a a le Pasefika.

O Fepuari lena i le tausaga e 1999. Ona tapenapena loa lea e oo a i fesootaiga foi sa ou faia ma taitai o le malo Fiti i lena taimi, o le a tapena foi le ausiva a Samoa e avatu e faafiafia ai ma faamanaia atili ai le sauniga. Faapena foi Fiti ua amata ona tapenapena fuafuaga uma, mo le sauniga tele lea o le alu atu uma i ai le lalolagi atoa.

O lea la e fuafua ia Iuni, ae oo mai ia Me, ae oso loa le fouvalega a Speight, oti atoa ai ma faamoemoega uma o le Pasefika ma Karepeane, auā e lē mafai ona taunuu o lea ua pulea loa faamiliteri le malo ua lē temokalasi, ia fono loa faavavevave le ACP ma Europa, sui loa ma le feiloaiga, o le a sainia le feagaiga lea i se tasi o aai tele i se tasi o atunuu o Aferika o Cotonou, lea la e faalauiloa ai nei le feagaiga lena, o le Cotonou Agreement, lea la e iai i le taimi nei.

Lea la ua oo mai le taimi lenei, e 14 malo o le Pasefika lea o loo faamanuiaina ai iinei, o loo sau ai seleni, faapena ma Tahiti o teritori ia o Falani, Tahiti, Niu Kaletonia, ma Wallis ma Fotuna. Lona uiga tusa e 17 atunuu o le Pasefika ia e faamanuiaina ai i le feagaiga lenei, faatasi ai ma atunuu pe a ma le 15 o Karepeane, 15 ma le tatou 17 ua 32 lona uiga la, e ova i le 60 atunuu o Aferika lea e iai. O le aofaiga la o malo, e sili laititi atu lava i le 90 malo o loo iai totonu o le faalapotopotoga lea a Aferika, Karepeane ma le Pasefika.

Lea la o loo tele a le fesoasoani lea e manuia ai le tatou atunuu mai lena foi faalapotopotoga ma sainiga feagaiga lea ma le ACP, e fai ai fonotaga i tausaga uma. O le tausaga e 92 ma le 93, sa faalua ai ona ou taitaifono i le fonotaga a minisita a le ACP ma EU i taimi tonu ia na tau ai le taua i le va o Iraq ma Saudi Arabia, sa ou taitaifono ai i le fonotaga tuufaatasi lea a Europa ma Aferika, Karepeane ma le Pasefika.

Lea la ua ou see loa a‘u i luga, ona ou tuua loa lea o mataupu uma a tau Europa i le afioga foi ia Misa e nafa ia ma tulaga uma ia, ma tofia ai lea o le susuga ia Joe Keil, o loo fai pea ma auai i fonotaga nei a minisita a Europa.

O faamatala la lea ua ou avatua, e faamalamalama atili ai le tāua tele o le fonotaga lenei, ona o i tonu lea o loo tafe mai ai le tele o faamanuiaga, e pei mo sina faataitaiga, o loo iai i totonu o Samoa le ofisa o le European Union poo le Iuni a Europa, tasi lea faalapotopotoga o loo lagolagosua i le JICA, o loo alu atu ai seleni e fau ai le tele o faleaoga i tua a Samoa, a le tatou atunuu.

E faapena foi i le tulaga o seleni e avatu e faagaioi ai le tatou faletupe o le Atinae, o i le faletupe o Europa lea e alu atu se isi vaega tele, e fesoasoani ai ina ia maua pea seleni e nonō atu e le Faletupe o Atinae mo le atinaeina o a tatou faatoaga ma tagata taitoatasi i nuu i tua.

E telē a la le fesoasoani o lea e maua e tatou mai le faalapotopotoga lea a Europa, e telē foi a latou fesoasoani e faitau miliona lea e agai mai i le Iunivesite a le Pasefika, ma isi a mau atinae soofaatasi a malo uma o le Pasefika, tai pei o le faagaioiga foi o le tatou ofisa aoao lea e failautusi aoao ma taitai ai le tofa ia Tuiloma.