Honorable Tuilaepa Lupesoliai Sailele Malielegaoi
by Leni Ropati Mamea of Radio Samoa 1593A
Radio Samoa: I lenei afiafi, i lou ava tele ma le faaaloalo e toe faatalofa atu ai foi i lau afioga le Palemia. Faafetai o lea ua maua foi lenei avanoa, ua vaoseugā foi tatou te lei toe feiloai. Ae talitonu lava o loo fia faafogafoga foi le atunuu i Aotearoa nei, poo le ā foi sau saunoaga i nisi o mea o loo tutupu i le tatou atunuu, aemaise foi le tatou mafutaga i aso taitasi. Ae lē gata i lea, o le fonotaga lea na usuia i Port Vila.
Palemia: Faamalo atu foi le valaau mai, e maua ai foi lenei avanoa e talatalanoa ai i mataupu e pei ona lāgā. Masalo o mataupu e lua ou te fia talanoa i ai, o le fono sa faia i Vanuatu, o le fono a taitai o malo i le mataupu lava lea ia Fiti, ona ou agai atu ai lea i se tasi o mataupu sa ma feiloai ai ma le Palemia o Niu Sila i Vanuatu, le susuga ia Key, i le tulaga o loo aafia ai o tatou tagata o loo o atu ma overstay iina, ona o tu lava ma aga a tatou tagata iina e mafua ai.
O le tulaga tāua tele lena, ona e foliga o loo tuputupu pea le solitulafono o tatou iina, ona e o atu i faalavelave ona fealoalofai ai a lea iina, ma aafia ai le talitonuina o upufai o feiloaiga o loo faia e a‘u ma le Palemia i fesoasoani e mafai ona fai mo o tatou tagata.
O le fonotaga lea i Vanuatu, sa tau fai foi sina faigata, o le taumafai o nisi malo e toe tau faaofi atu Fiti, ae auala atu i le fono foi lea a matou muamua i mataupu o loo aafia ai atunuu o le faalapotopotoga lea o le ACP, lona uiga o le faalapotopotoga foi lea, o le feagaiga tuufaatasi i le vafeagaiga ai o fesoaosani mai Europa, ma atunuu o Aferika, Karepeane ma le Pasefika.
O le agaga o nisi o malo ia sa auai i Fiti i fonotaga a le alii lea o Bainimarama, ia auai Fiti i le fonotaga lea, pe a oo ina talanoaina mataupu i Europa tau ACP i le faalapotopotoga lea ma Europa, ona o se taofi, e lē o se fono a le Forum, o le fono lea a le ACP o loo aloaia ai ma Fiti, e tatau a la ona iai ma Fiti.
O le fono foi la lenei a le 14 o atunuu o le Forum, o atunuu ia i le faalapotopotoga lenei tuufaatasi o atumotu o le Pasefika, o le 14 o atunuu o la e iai i totonu o le lio lea a le ACP faatasi ai ma Europa, e lē o aafia ai Niu Sila ma Ausetalia.
O le taofi la e faapea, e leai se mea o le a auai ai fua Niu Sila ma Ausetalia, i mataupu tau ACP, e tatau la ona fai pea se fono a le ACP lea e tamua ai le matou fono, e tatau a ona o atu Fiti e auai.
O le iuga la na oo i ai matou, na teena foi lena tulaga e lē tatau ona ofi atu fua Fiti, ona o lea e faamaopoopo e le Forum le fono lenei, ma o le fono foi, o le fono a Taitai o malo o le Forum, faatatau i mataupu tau ACP ma fesoasoani o loo maua mai e atunuu uma o le ACP.
O le tulaga la lena na iu i ai, o le toe teena foi o Fiti, ia aua lava ne‘i i se fono foi a le ACP, ona o fono uma lava e aafia ai le Forum, ua matuā sā a ona toe talia i ai Fiti, seiloga lava e toe faafoi Fiti i le tulaga o le iai o sona Palemene e filifilia i sana faiga palota saoloto, ma toe foi lelei a Bainimarama ma ana fitafita e toe foi i o i le latou pa e nonofo ai i o latou fale o loo iai le Army e fai ai latou foleni ma a‘oa‘o ai le amoti o fana, o mea na na aooga ai, e lei aooga i le omai e pulea se malo. O le tulaga lena na taunuu i ai le matou fonotaga.
Ae ina ia malamalama le tatou atunuu, o le fesili, o le ā ea lenei mea o le ACP? O le ā ea le faalapotopotoga lea? O le faalapotopotoga lenei a Aferika, Karepeane ma le Pasefika, na faatuina ina ia mafai ona faafeagai ma atunuu malolosi uma o Europa, e tusa ua 25 pe a le aofai o atunuu o iai, e aofia uma ai le vaega paoa lea e iai Siamani, Farani ma Peretania, ma isi atunuu e iai Potukale ma Sepania, o atunuu uma na o loo iai i le faalapotopotoga lenei, o loo iai i Peleseuma le latou ofisa tutotonu.
O se faalapotopotoga malosi lenei i le lalolagi, i le tulaga o a latou tamaoaiga ma tonu e fai faatasi. E tasi le latou tupe, o fea lava e te fealuai ai, e tasi lava le latou tupe, e faaigoa o le Euro Dollar, e faaaogā.
E oo foi i le latou fefaatauaiga, e leai ni tiute, e tusa a ua tasi le atunuu, e na ona ese a o upufai a malo, ae oo loa lava i le femalagaiga a tagata, ua saoloto e lē toe iai ni visa e faia, e leai ni tiute e faia.
O lona uiga ua faigofie, e oo foi i taavale afi, e na ona e pasi lava e leai se mea e te toe popole ai. Lona uiga la, o le mafutaga lenei a atunuu o Europa ma atunuu nei o le Pasefika, Karepeane ma Aferika, o se faalapotopotoga e faavae i luga o fefaatauaiga o latou oloa, faapena foi ona faamāmā pe matuā aveese le tiute e ofigofie atu i Europa a latou oloa, e faapena foi ona ofigofie mai a latou oloa i o tatou maketi.
O le feagaiga muamua a la na sainia, o le feagaiga lea ina ia aloaia ai mafutaga vavalalata ia o faiga paaga, na sainia i le tausaga e 1975 sa avea ai le alii o Sam Saili, o le minisita o tupe ma sui o Samoa, na ma malaga ai a o o‘u galue i le ofisa o tupe. Sa ma malaga i le masina o Mati e suia le malo o Samoa, ma sa sainia i le laumua o le malo o Toko, o Lome la le igoa o le atunuu lenei e pulea faafitafita le latou malo.
