Talanoaga ma le Palemia – 25 Nov, 2010

Palemia: O le faasilasilaga i le mea lena, na tatala mai lava i le taimi o Mataafa, i le tulaga o tagata asiasi maimoa mai. Na tatala mai lava la i le tausaga e 1965 ia tulaga faapena mo le taumafaiga ina ia atiina a‘e pisinisi i totonu o Samoa, faapea foi ma tagata asiasi maimoa mai. E oo mai a la i le taimi lenei, e lē tele a ni tagata foi e o mai ma faatu ni pisinisi tetele, se‘i vaganā a le Yasaki lea e faigaluega ai le toaafe i le taimi nei.

Radio Samoa: Malo faafetai. O le tulaga ua māua foi se tasi foi o faipule sa i totonu o le Palemene muamua, solitulafono ua toe ave i tua le tagi, ae ua mautinoa ua soli le tulafono.

A o lea ua māua e toe tamoe i le tausaga fou mo le palota. E toe faatagaina ituaiga tagata faapea ua molia ae toe faatagaina mo le palota, faamolemole lau afioga i le Palemia?

Palemia: Se‘i toe aumai a lau mataupu?

Radio Samoa: Se tasi o faipule sa faapena ona i totonu o le Palemene i tausaga ua mavae atu. Ua soli le tulafono ua faaoolima foi matagā, vaeane le faafofogaaga a le mamalu o le atunuu i se tasi o tina talavou i Samoa. Ia ua uma ona uia ala foi …

Palemia: E leai se mea faapena o faasalalau iinei. E te iloa le faipule?

Radio Samoa: Leai la e lē o māua mai le suafa o le faipule.

Palemia: Ou te lē iloa la e a‘u lena mea.

Radio Samoa: A soli le tulafono, e mafai ona toe tamoe i le palota?

Palemia:  Ae iai tagata sa faipule ma falepuipui, e lē o taofia. Sa o mai ma tamomoe i faiga palota i aso ua tuanai, ia o le tulaga lena. E iai isi faipule lauiloa a lea a e oo mai le taimi nei e lē o toe faipule, ae sa mafai a ona o e tauva i le palota, e leai se mea e taofia ai.

Radio Samoa: Malo faafetai. Ta toe me‘i lava i le kasino. O loo talatalanoa lava agai i le kasino, lea ua faamautuina o le a tatala le kasino i Samoa. O le mau lea ua aumai, ua sulufai atu taitai o ekalesia i lau susuga.

O le faavae o le Malo o Samoa, e faavae i le Atua. O le ā le tulaga ua oo i ai, ua e lē talia ai foi le auauna a le Atua ua sulufai atu ia te oe mo lea tulaga, faamolemole lau afioga i le Palemia se‘i e toe saunoa i ai la lea tulaga?

Palemia: Ua uma ona matou talanoa ma le Fono a Ekalesia. Ia manatua foi, o le latou mau, o le afaina o o tatou tagata i Samoa nei. Na ou tuua la i ai le tulafono e faitau ai, ona o la e faapea latou e taaalo ai o tatou tagata.

E lē o taaalo ai ni o tatou tagata, na o tagata asiasi maimoa mai fafo. Ia sa faapena foi la ona tusi mai foi le Ekalesia Metotisi i le tulaga lava lena, i le afaina o o tatou tagata i Samoa nei, ia ua uma foi la ona ave i ai faamatalaga, e lē o aafia o tatou tagata auā e lē o taaalo o tatou tagata.

A o loo iai foi le komiti e faafoea, o lea e iai ma le faifeau o le sui o Ekalesia Soofaatasi. Ia sa tusi mai la ia te au le failautusi o le Ekalesia Soofaatasi, faamolemole po ua tofi le latou sui, ona o lea e oo mai nei e lei maua e latou se faamatalaga. Ona ou logoa foi lea, o loo iai le faamoemoe poo le tausaga fou, ia o ai le faiga malo e o mai lena taimi, ia ma faaaloaia ai loa le faatuina o le komiti lea, ia ma tofi loa i ai se sui o le fono a ekalesia.

Ma e iai foi i totonu i, i totonu o le tulafono ma le ofisa o leoleo, ia ma nisi foi o sui o le atunuu. E lei tofia la ni komiti i le taimi nei, o loo taoto uma fuafuaga na mo le tausaga fou.

O le tulaga la lena. A o le mea a ia o le kasino, o lea sa ou faaalia pea le manatu, talu ai e lē o taaalo o tatou tagata, ae na o le Bingo, a o le Bingo lea o loo faasoloatoa ai taaloga a ekalesia, e sili atu ona matautia le Bingo i lo le kasino.

O lona uiga la, a finagalo ekalesia e taofi uma a ituaiga taaloga suetupe, ia ona logo aloaia mai loa lea a o le a liliu le Malo e taofi uma a mea uma; taofi Bingo, taofi lūlū, auā o mea uma a na, o mea o taaloga suetupe. Ia e ia oo mai nei la e leai a se isi o toe fai mai ia te au.

Radio Samoa: Malo faafetai. Lea ua e saunoa i tulaga o turisi foi lele, na o latou e faataga ona taaalo i kasino. E faafefea ona iloa e i latou, o turisi ia ua asiasi atu?

Palemia: Auā foi na o tagata a o turisi e o mai nonofo i le faletalimalo ma o latou tusifolau, e faataga a na o tusifolau o atunuu i fafo. A o le faiga lea e lē se faiga e fou, la e fai uma a foi e isi atumotu o le Pasefika.

E pulea atu a la e lou tusifolau. A e fia taalo ia ona e alu atu lea ma lou tusifolau, o oe o le Niu Sila, o oe o le Iapani, o oe o le Korea, o oe o le Rusia. Ia e te alu atu loa a ma lou tusifolau Samoa, ia tuli loa oe i fafo.