Talanoaga ma le Palemia – 25 Nov, 2010

O Samoa la, lea ua tatou i le masina o Novema, o lana tausaga faaletupe e faato‘ā faauma ia Iuni, o le tausaga fou. Lona uiga la, e toe 7 masina ia e totoe. Seiloga a la e uma le 12 masina ona faato‘ā sue lea o tusi o galuega uma a e faatino e le tatou malo.

Ae lē taofia ai le malo mai le saunia o lipoti ma faasalalau, aemaise o le lipoti lea na tapena i le aso 29 o Setema, e atoa i ai le tausaga talu ona tupu le sunami ma o loo faagasolo ai galuega. Ma o le avanoa lea e avatu ai foi ma le faafetai a le tatou malo, i malo uma a na fesoasoani mai ma tagata uma ma faalapotopotoga.

Sa faaalia ai i le lipoti lea le agaga faafetai o a‘u nei e fai ai a‘u ma sui o le Ao Mamalu o le tatou malo ma tagatānuu uma o Samoa, i ona tupu ma ona e‘e o le aufaigaluega paia a le Atua, ia i latou uma sa mafai ona fesoasoani mai talu ai le galulolo.

Ia ona agai loa lea o le lipoti e faataoto atu mo mea o galuega na faatino, vaega tupe e alu i galuega taitasi, i lea galuega ma lea galuega, o eletise, o aoga, o taligalu, o auala, o telefoni, o fale, mea uma a o lea e alu atu uma a i totonu i le lipoti, lea e tau fesili le alii lea poo fea o agai i ai. Lona uiga o la e iai uma a i totonu o le lipoti ia tali uma o ona mafaufauga ia sa faaali.

O le faalavelave o le alii lenei, e sau iinei o loo iai lona agaga e faaleaga le tatou malo. O le tulaga la lena o lea sa ou taumafai e faamaino atu, e lē taofia le malo mai le saunia o lipoti ma faasalalau, i le faatinoga o ana galuega, ae faatoa sue a tusi uma a ina ua uma le tausaga faaletupe, o aiaiga ia o le tulafono.

O tulafono a le Malo, a uma loa le tausaga faaletupe, tāpena loa le tala o le tupe ma ave loa e sue; a mae‘a ona faato‘ā avatu loa lea i tai i le Palemene, o mea la na e ave i le Palemene. O le tulaga foi la lena o lea sa ou faasa‘oina ai le saunoaga faavalevalea a le faipule lea o Levaopolo, lea e iai i totonu o le komiti o tupe.

E aliali mai ai mea o faipule, e lē gata o lea e i totonu o le komiti o tupe sa tatau ona malamalama i galuega la e fai, ae o lea foi e aliali mai ai, e lē o malamalama foi i le tala o le tupe na pasia e le Palemene, ma tele le taimi o le Minisita o le Tupe e faamalamalama ai ia le tala o le tupe, ma ua galo ai i le alii faipule, seiloga a e uma le tausaga ma sue tusi ona faato‘ā avatu lea i tai i le Palemene.

Tasi lena mea ua nunu atoa ai le to‘au, ona e lē gata ina faavasivasi le alii lea sa sau iinei ma ana lipoti na tapena atu iinei, ae faapea foi ma le faavasivasi o faipule ia na osovale i le mataupu lenei. Ia o le tulaga la lena o lea sa ou talanoa ai foi i la‘u tusi na avatu, e lē masani ona umi a‘u tusi e tusi, a o le faalavelave, a ou iloa loa e faaletonu tagata ia matou te fetaliai, ona umi loa lea o a‘u tusitusiga, e tau faamanino ia mataupu o le Malo, ona ou te talitonu, e fai a sina faaletonu tele o mafaufau o tagata nei matou te fetusiai.

Ia o le tala atoa lena o le mataupu lea ia John Campbell, lea la ua ou toe tuu atu i ai le avanoa, o lea foi la na ou maua mai ananafi le tusi mai iina, e lē o ina John Campbell, o la i lalo i le faalavelave lea ua maliliu ai foi le to‘a 29 o nai uso foi, tamā ma nisi foi talavou sa galulue i totonu o le mine i Niu Sila, ia ma o loo iai la le susuga ia John Campbell o loo ia lipotia foi tala e faatatau i lena foi faalavelave matuia i totonu o Niu Sila.

Ma o le a tali mai la i se taimi, ae o lea foi ua toe fesili mai ia te au, pe mafai ona avatu ia faamatalaga o mea uma ou te fealuai ai i Niu Sila. O lea foi la o le a ou tusi atu i ai taeao, o ituaiga o mea na e lē mafai ona soona tatala ia mea uma e asiasi i ai soo se taitai a o se atunuu e malaga, e lē mafai ona soona tatala i tua ia faamatalaga.

O le tulaga la lena o lea e taoto ai nei le mataupu, o lena ua ou toe tuu atu i ai le avanoa.  O lona uiga, o le a tolu ai lea o a latou talosaga mai ma ou tuu avanoa atu i ai. Ma ua avatu foi ma la‘u faaiuga, e toe pau lea o le taimi ou te toe tuu avanoa atu ai. Ia o le faaiuga lena o le tatou mataupu e pei ona e fesiligia mai ai a‘u.

Radio Samoa: Malo faafetai le talanoa i lau afioga i le Palemia. O lea e tulituli matāgau mai lava e le mamalu o le atunuu, e lē tau faamatatao i lau talanoa poo lau saunoaga. O le tulaga lea e fai mai ai le atunuu, pe aisea o isi palemia e faaaloalo, a o lau susuga e lau le vālea o tagata, ia ma le taimi lea na e tapunia mai ai le faitotoa. Pei o tulaga na a o loo sisila le lalolagi.

Palemia: O lea o le a ou tali atu i lena. Afai na amata mea John Campbell i le alu atu ma soona saunoa faalemafaufau iina i tulaga o loo iai atina‘e o Samoa, ua tatau loa ona ou ta‘ua i ai upu e talafeagai. O le tali puupuu atu lena, ae faagasolo le ta talanoaga.

Radio Samoa: O le tulaga i le SUNGO poo le faamalu o faalapotopootoga tumaoti i le atunuu. Na māua i se vaega o lau tusi na tusi atu ai i lea faalapotopotoga faapea, ‘Ua outou lapopoa tele, ua tele a tou tupe, ae sili le tou o loa e faatau se tou fale.’

Fai mai le saunoga a le faletua ia Vaasilifiti Moelagi Jackson, ona talu ai o se lafoga a le Ofisa Sili ia poo le susuga ia Roina Faatauvaa, e uiga i le lua va ma John Campbell, i le feaveaiga o tupe, e pei o le tulaga lena ua faagaulemalie ai lau afioga i le Palemia, lea o le a fāoa ai le fale o le Malo. Se‘i saunoa i le tulaga lea e faamanino faamolemole.

Palemia: Ua uma ona ou faasilasilaina le mataupu lena. Sa talanoa mai ia te au, ua fia fau se latou fale tele, ma e masalo pe faalua pe faatolu ona matou feiloai. Ia sa tuu foi i ai le fale lea o le Malo ona sa avea o se faalapotopotoga vaivai. Lea la ua manao e fau se fale tele, ma e lē o se agaga o le Malo e manao foi e faatau motu le fanua lea o le Malo, e lē o iai foi se naunautaiga i le Malo e faatau ona eleele. Ia lea la ua uma ona ou logoina i ai, e lelei ona latou o e faatau, e tele a mau fanua ia e faatau, e fau lelei ai so latou lava fale, ma e fesoasoani atu foi le Malo, e avatu foi se seleni e faatino ai lo latou faamoemoe.

Ae faavagavaga le ofisa lea, mo isi foi sui auai, o members o faalapotopotoga vaivai, o lea sa tatalo mai i le Malo mo ni o latou ofisa. Ia manatua la, ua lē o toe talafeagai le fale lea ma le SUNGO. O le tulaga la lena o lea sa ou talanoa i ai, o le isi mea e latou te lē o vaai i ai i le taimi lenei, ona uiga a ia o le SUNGO, e manao a e tutoatasi a latou ma fai le mea e manao i ai, ia o la‘u faasilasilaga foi ia latou, e sili atu ona malu a latou fuafuaga, pe a pulea e latou o latou fanua.