Radio Samoa: Ua maua foi le fesootaiga ma le afioga i le Palemia o Samoa, le afioga ia Tuilaepa Sailele Malielegaoi. Faatalofa atu i lau afioga i le Palemia. Talitonu o lea ua maua lo latou avanoa, faafetai tele lava.
E iai nisi o toe teuteuga iloga o le a faia i luma o le Palemene, i le tulafono tumau o fanua ma suafa. O se tasi o na teuteuga, e aofia ai le lē toe mafai ona agavaa se tasi e lei atoa le 25 tausaga e toe tauaveina ai se suafa matai. Pe mafai ona e toe faalauaitele mai le tulaga lea faamolemole lau afioga Tuilaepa?
Palemia: O teuteuga na e afua i fautuaga mai le tatou matagaluega i tai, e tatau ona toe teuteu ina ia tuutuu i luga le avanoa faato‘ā mafai ai ona matai se isi, i le 25 tausaga.
Ona o le tele lava foi o taimi, o le 25 tausaga o la e laitiiti le tagata e lei taitai ona matua le mafaufau. Ae o la lava e iai le avanoa e mafai ai ona talosaga i se tulaga faafaamasinoga se faasa‘osa‘o o loo foufou se isi e faamatai i ni mafuaaga tatau, e atagia ai o le tagata ua agai i ai le faamoemoe, ua tele foi ni auala e atagia ai ua matua, ua tatau ona tauavea le suafa o le aiga, ma ua gafataulimaina foi ona tausia le aiga. O lona uiga la, o loo iai lava le avanoa.
Radio Samoa: Ae talu ai na faailoa foi se atugaluga o se tasi o faipule, e pei le afioga ia Levaopolo Talatonu, i le toe teuteuga lea, e ono aapa atu ai le afioaga poo Lesitala foi o faamasinoga ma faia ni faaiuga i se matai pe afai o iai se faafitauli.
O le manatu o Levao, e iai nisi mea e patino lava i le aiga latou, e tatau ona soalaupule e latou aemaise foi o le afioaaga. E mafai ona faalautele e lau afioga lea tulaga?
Palemia: O le manatu lena sa faaalia i le itu lava lea o le faamāmā avega. Ua fai ma amio a nisi foi o matai le mea lea o le o atu i tai i le faamasinoga, ma taumafai e seu i tua le faamasinoga, ma tele ai mea e alu a le aiga.
O le finagalo la lena sa faaalia, pe lē tatau ona o se mea e tatau ona faasā. Ia o le tulaga a ia e maumau le taofi, o le ala foi lena e lei faamaimaua tele se taimi e tali ai i na manatu vaivai, auā o itu a ia, o mea a na e pa‘ū i le afioaga latou.
Faigofie a i le afioaga a tulai i se faamasinoga a le aiga, e leai se mea e taofia ai le faafono o le nuu. Fono le nuu ona talanoa ai lea i le tulaga foi lea e faamalie ai itu e lua. Ae lē o le nofonofo nofonofo o faasa‘osa‘o o ē faia upu o le nuu, e leai se galuega e fai, ae oo i le taeao o le faamasinoga ae faato‘ā o atu i tai taumafai e seu mai i tua. Ona seu seu mai foi lea i tua, faapea e talia, ona o mai la ea nofonofo ae lē faia a latou galuega.
O se mea valea tele lena mea. Ma e tupu soo a i mea o matai faitonu o nuu, le nofonofo e leai se galuega e fai, ae oo ane ua tauaofia le faamasinoga ae o atu toe tutū o latou tootoo, ia ma iu ai ina faamamafa avega i le aiga le toe fai o o latou lafo ma lē oo ai le faamasinoga.
O le tele a la o mea o seumalo i aso nei, ua lē toe talia e ni aiga, talu ai le mea lena, o le seu seu seu, ona o mai lea i tua ua faatamalii ona fai iuga o aiga, ona omai lea nofonofo e leai se latou galuega o fai.
O uiga vaivai ia o faatumutumuga o nisi nuu e leai ni tofa o iai. O mea la na lea sa laga e Lavaopolo, ia o le tali sa‘o a o na mea, e lē oo i ai le faamasinoga, o mea na e tatau a ona tagofia e faauluuluga o nuu ma latou e faitonu o nuu, o alii ma faipule o nuu, a latou mea na e tatau ona fai, e lē tatau ona avatua fua i luma o faamasinoga.
O le isi itu e faaeteete i ai mea faapenei o le soona laa i ai le tulafono, ona o itu a ia, e mafai foi ona faaaogā le pulega a alii ma faipule e faamalosia ai se mataupu, ona uma ane lea ua āfaina ai le aiā tatau a aiga o lea e fia saili se fofō, ona agai lea aemaise a i se matai faitonu, e manao ina ia faatino le mea pio, ma taofia ai le aiā tatau a le aiga e faasa‘osa‘o ai ni matai faimea piopio, a o lea e faakegikegi foi lea ma ē tonu e faia upu a le nuu. O itu a ia e lē faapea e faaitutasi, e iai foi itu faalē lelei o mea faapena.
O le tulaga a la ia o mea faapea, e tatau foi ona tuu pea le avanoa i le pulega mamalu a alii ma faipule e soalaupule ai mataupu faapenei, ina ia faaaogā le tofa mamao e taumafai e soalaupule ai mataupu, i le tulaga o le avatū aumai, ma faatino ai le isi agaga e masani ai tatou, ‘ia fofō alamea mataupu i tua i le ava fatafata ma tulaga masani o le avatū aumai i le feiloai ma le talanoa pea o mataupu i totonu o le nuu ma le va o aiga, ina ia faaaogā le aganuu e fofō ai mataupu, nai lo le televave mai tai i le faamasinoga, ona uma lea ua fai e tagata ese le iuga, ae lē faia i le tofa mamao i ē pulea mataupu faapena i suafa.
O le ala lena e ala ai ona toe tigaina isi ma faitio i le iuga a le faamasinoga, ona ua lē faaaogā le latou faautaga tatau, e soalaupule ai mataupu i tua. Ia ona o loa lea fetauai i luma o le faamasinoga, ae manatua o luma o le faamasinoga o tagata ia e faia iuga, o tagata e lē malamalama i le mataupu a aiga.
Ia ona o atu loa lea o le isi itu la‘u atu pepelo i o, omai le isi itu la‘u a‘e pepelo i o, ia ona tau faatulaga lea e le faamasinoga nei mau faulaiga pepelo ua avatu i luma, ona faavae ai lea o se iuga e sau ua taufai āfaina ai itu e lua, talu ai le lē faaaogā tatau o le latou faautautaga tatau e faatino ai ma fofō ai le mataupu i tua, a o lea ua o ave i tagata ese e latou te faia mai le faaiuga o le mataupu sa tatau lava ona faatonutonu e latou i le tofa mamao ma le faautautaga tatau.
Radio Samoa: Malo faafetai o lea ua manino lava lea itu. Lau afioga a le Palemia, ua māua ua fausia se maota telē lava o le Tausi Soifua a le atunuu, tusa loa tau ma le 66 miliona tala.
O loo māua o le a telē lava ni tāua e tulai mai ai. Mafai ona faalautele le tulaga lea?
Palemia: E lē lilifa le falemai lea o le a fausia nei i le tulaga foi lea o le a‘oa‘oina o fomai.
O i o le a faatino ai le tele o polokalame a le iunivesite foi lea a tatou mo le a‘oa‘oina o fomai. Ma o le tulaga tāua tele o le falemai lenei, e uma ona faatino lesona a i latou nei o loo a‘oa‘o faafomai, ona o loa lea faatino mea sa a‘oa‘o i mea o le vaaiga o ma‘i, faamatamata i togafitiga e fai ona vave ai lea ona atamai le tama aoga, nai lo le mea lea e masani ai iunivesite, na o le tusitusi lava i lalo o mea ma faitau tusi, ae lē o vaai faatasi i le tulaga o le faagaioiga o togafitiga o gasegase. O le mea lena e ese ai le tatou falemai, o le mea foi lena e ala ai ona faaigoa o le Teaching Hospital, poo le Falemai e lualuagia i le a‘oa‘oina o fomai. O le tulaga ese lena o le tatou falemai lea o le a fausia nei.
Radio Samoa: Faapefea le tulaga o a tatou medicine foi lea. Pe o le a faatu ai se tulaga e a‘oa‘oina ai mea ia?
Palemia: E leai lava se mea o le a ese ai mai se isi lava falemai. E iai uma a mea uma. Ma e ogatasi foi la le mea lea, ma le tulaga foi lea o loo faatino nei e le tatou malo, ia oo atu o le faaiuga o le lima tausaga lenei, ua lē toe avatua se ma‘i iinā. O le a taoto uma iinei gasegase uma. O le taimi nei, e 12 miliona le tupe lea e alu iinā i le totogiina o ma‘i na e avatu iinā.
O le eseesega la lena, o lea o le a iai a fomai, ma faaaogā ai foi le falemai lenei e a‘oa‘oina ai isi fomai ia e lei lava a‘oa‘oina i le tulaga o gasegase uma. Afai foi o iai ni mai o loo moomia ai le poto faapitoa, e lua auala e faatino ai.
O le matuā aumai o fomai iinei e faatino ai taotoga, poo le faaaogā loa o le internet e faatino ai le taotoga iinei, ae faatonutonu mamao mai e le fomai tomai poo fea a o le lalolagi la e iai, i se taotoga faigata e faatino i Samoa nei.
Radio Samoa: E talitonu le loto vaeane le faafofoga a le atunuu aemaise lau afioga i le palemia, e lē o po se silafia i lau afioga i le Palemia, le tulaga o loo iai le faiga malo a Niu Sila o loo matou nonofo ai, John Key ma lana vaega aemaise le tamaoaiga.
O le upu ua faaaogāina fai mai, ua tau mai luma tau mai tua. Ia talu ai o lea foi ua amata ona latou faatauina atu aseta a Niu Sila, ona ua lē mafai ona totogi le aitalafu.
Ae momoli atu le faafetai lava tele i lau afioga i le Palemia mo le taitaiga o le tatou malo, talu ai o galuega tetele nei ua faataunuuina i lenei vaitaimi ae o loo faapena ona maulalo le tamaoaiga, aemaise foi o lena ua fausia buildings tetele ma maota ua māua atu foi. Pe o se fuafuaga mamao i lau afioga i le Palemia, ua tulaga fetaui lea tulaga mo le tamaoaiga o si o tatou atunuu?
Palemia: Ioe, ua matuā talafeagai lelei a. E iai le tulaga faigata lena e feagai ai ma le malo Niu Sila.
O le tulaga faigata, o mea ia na tutupu i Kalaiesetete ma le telē o le galuega toe fausia o auala ma fale, e lē laitiiti. O inā la lea sa faasalalau e le malo, pe ova ea ma le 300 miliona i le vaiaso e moomia e le malo e fai ai galuega i Kalaiesetete.
O lena la lea e vevesi ai Niu Sila, i le tulaga o nonoga tupe e tatau ona fai. Ae o le itu a ia i le tamaoaiga, ia ona o le vevesi vale a.
Ae o lena e iai tagata atamamai o le malo, e lei soona fai foi na fuafuaga, e latou te iloa ai a le mea e gafatia ma le mea e lē gafatia. Ia manatua foi, e leai ni tagata pito sili ona atamamai i mea tau tupe, e pei o faalapotopotoga tetele ia e nonō ai le Malo Niu Sila, o la e faulai ai tagata atamamai e latou te iloa ai le tulaga moni o loo iai le tamaoaiga o Niu Sila. Ma o se tulaga malosi la e iai Niu Sila.
O Niu Sila la e i luga o le vaega foi lea o le lalolagi, o le Top 20 o lena e iai ma Niu Sila i le tulaga malosi o lona tamaoaiga. Ae o uiga a ia o tagata lautele o le popole vale. E oo foi ia tatou iinei, o le matuā popole vale, ae o lea a e fuafua tatau mea e tatau ona fai ma mea e lē tatau ona faia. Na o le tasi a le atunuu o le lalolagi pito tele lea ua pa‘ū ai le pituli, na o Amerika. Lea e vevesi ai nei ona ua pa‘ū ifo le tulaga maualuga ma le faatuatuaina i le tulaga tau tupe sa iai Amerika, sa tolu A, ae o lea la ua kolosi ese le isi A ae toe lua A. Manatua foi la a faatulaga atunuu o le lalolagi poo le maualuga o le tulaga lelei, pe maualuluga foi ou maka i se suega, e te fesili poo le ā le tulaga lea e iai. A ta‘u mai o le A, a faaletonu o le Ab, ia poo le sosoo ifo ma le B, sosoo ifo ma le Bc, sosoo ifo ma le C. E faapena ona faatulaga, a lē faatulaga faamataitusi faapena, ua faatulaga faanumera i le 1, 2, 3, 4, 5. Sau mai luga i le 5 pe ā, tai pei o faletalimalo, e iai faletalimalo e faaupu faapea o le 5 Fetu, 5 Star Hotel, 4 Star Hotel, 3 Star Hotel. Lona uiga la, a 5 au fetu, o lona uiga ua aliali mai o le matuā faletalimalo matautia, e maua uma ai a mea e te manao ai. O Amerika la, sa tolu A a o lea ua toe lua, ae mafua i le tele o le nofo aitalafu ona o le galuega valea lea e fai nei e Amerika o le alai fua i mea tutupu a isi malo, ona o le faapea ane o Amerika o le leoleo o le lalolagi, latou te o e vaavaai lea mea o faaletonu ona o lea e faasa‘osa‘o. O le ala foi la lena e ala ai ona alai i o i mataupu faa-Arapi, alai ane i mataupu faa-Parkistan, alai mai ia tatou falepuipui ma toilet i falepuipui e lē o lelei.
O le mea foi lea o le alai solo ae lē o e fai latou pa‘upa‘u o la e telē le faaletonu, tele le mau tagata fasioti tagata i totonu o Amerika, ma tagata e maumau solo e leai ni aiga e nonofo ai, e nonofo i lalo o auala laupapa ma le tele o tagata aisi solo ma gaoi i luga o auala tele. O mea na e tatau ona o Amerika e faaalu lelei ai a latou tupe, ae lē o le o solo e tau taua a isi atunuu. O le mea la lena o lea ua (omit…) atoa ai le tamaoaiga o Amerika, ua lē toe tolu a latou A ae ua lua.
Lea la ua ula i ai le malo Saina, ma faatonu e Saina, sili loa ona toe foi outou Amerika, o e fai lelei tou pa‘upa‘u ae soia le o fua e tau taua a Pakistan ma taua a Iraq. Ia lena la ua faatonu le tou tamaoaiga. Ae o le atunuu lea e nofo aitalafu ai Amerika, o Saina. Ua e maua mai la le malapagā lea ua iai nei, o lea e aitalafu Amerika ia Saina. O Saina lea e fai mai le toatele o tatou, soia le o i Saina ae o e aumai Amerika. Ia o le a aumai nei papalagi e pūpū taga, ae tatou te lē o i Saina, la e oo a ia Amerika o loo nofo aitalafu ia Saina?
Radio Samoa: O le tulaga i le pā foi lea ua lē faataunuuina, lea faapea e sio ai le Maota Fono foi o si o tatou atunuu. O se finagalo ua tāua lea, e aua ne‘i faatuina le pa lea? O le ā tonu a le uiga ua lē talia ai?
Palemia: O le itu i Sasae o le auala lea e alu i uta i ofisa, lea e tu ai le maota o faipule. La la ua faatonu atu e le Kapeneta, ua lava lena e fai ai le pa. Ae o lumafale tonu a o le maota lea o le Palemene lea e fai ai savali, ma faapotopoto ai tagata, tatala pea le mea, a fai loa le pa iinā ua feomiai ai tagata i totonu. E lē tatau ona faia se pa iinā.
O le pa lea e lē o ni pa e pa ai tagata, ae na o le pa e faamanaia ma faateuteu, e lē mafai ona taofia ai tagata, e oso a tagata i totonu i le ituaiga o pa lea, e mafai a ona e tu ma puna i totonu, e leai a la se aogā e fai ai le pa. O le tagata ia e gaoi e tele a mau auala e mafai ona ova ai luga o le pa lena.
O lea la e manaia a le pa e teuteu ane ai mo le maota lea o faipule, ae faataalaelae pea le malae lea e fai ai le savali, a oo i taimi, aemaise a o lea e agai atu i le faamanatuina o le 50 tausaga, o le a matuā lē ofi le mea i aoga e o atu e fai a latou folegi faaaloalo i luma o le Ao Mamalu o le Malo ma mamalu o malo eseese, ia aua ne‘i faia se pa e feomiai ai tagata i totonu.
Ae ia faataalaelae pea e pei ona sau ai aso ua tuanai, ia ona papatutu‘i atu a lea i luga o le auala e tau atu i le isi itu, o la e telē le avanoa, e oo foi i le tulaga o le fale lea e iai iinā, le fale fono tuai. O lena ua foi ua fai i ai le iuga a le Kapeneta, a leai loa se isi mea e faaaogā i ai, tuu loa i lalo, aua le tuu ai pea iinā ae tuu i lalo ina ia faataalaelae le malae ina ia ofi uma le atunuu i mea e fai ai iinā i Tiafau.
Radio Samoa: O le tulaga lea e tulai mai pea i le vevesi o Kolisi ia e iai. O tausaga uma lava o lea e vevesi pea. E iai se vaifofo e mafai ai ona foia lea faafitauli?
Palemia: Ioe, e telē a le vaifofo faigofie. Pau a le mea, o le vaai loa o tamaiti o tupu ai mea ma tutuli ese mai le aoga. O le tele a o nei tamaiti e o mai mai nuu i tua, ae o la ua iai kolisi i tua e aoga ai, soia le toe omai i le taulaga ma tafafao vale solo ai, ae lelei le nofo i tua ma vaavaai lelei ai e mātua. E faigofie a le mataupu.
E ala ona tupu pea mea faapea, ona o le lē faia o tiute o faiaoga, e tupu ai mea nei, o le vaai poo ai o tutupu ai, tutuli ese loa ma le aoga, aua ne‘i toe faaoogaina. E mafua foi ona lē tutuliesea i isi taimi, ona o la e iloa e faiaoga, o tamaiti ia o tamaiti e lelei tele i mea o taaloga, e ave ai i luga le igoa o le aoga, tasi lena mataupu e ala ai ona faigata i faiaoga, ae o la ua uma ona avatu i ai la‘u faatonuga, vaai o tamaiti uma lava e tutupu ai mea, kilia mai le aoga, tutuli ese. A o ese loa la, o mea na o le po‘u e tupu ai le papala, a ini ese ona uma a lea.
Radio Samoa: O lea ua matou maitau atu, o lea ua pasia tauaofiaga a le Palemene, o le a faasalalau i le tv ma ua manumalo ai le South Seas Pictures, ae manatua o nisi taimi i le gagana e faaaogāina, vaeane le paia ma le mamalu o le Palemene, e lē matagofie i le silasila atu ma le maimoa a le mamalu o le atunuu. Ae sa manaia lava le tulaga lea sa iai, omiomi ia faaniualiali foi, ae lē o silasila ma tagai i ai le atunuu.
Palemia: O lena e matuā telē le sese o na manatu. O gagana ia e faaaogā nei e lē taitai ona oo atu i le taimi faasolo mai lea i lo‘u atu i totonu o le Palemene ma tua atu. O gagana aemaise a pe a oo ina vevela felafolafoaiga i le va foi o le matou taitai ia Tofilau ma Tupua. E maua ai iinā gagana pito sili ona maoa‘e le maai ma le lē fia faalogologo i ai o tagata. O le taimi la lenei i gagana ia e faaaogā nei, e lē taitai ona maua, a ou ta‘ua atu nei upu nei sa faasalalau, e lē fia faalogo i ai tagata.
Ae o le faalavelave lena, i aso nei, a alu atu le gagana foi ia tuusa‘o ae fai mai o le lē mafaufau, e lē taitai i ai gagana i le taimi lenei. Ae ua masani ai a tagata. Manatua e lē o se mea fou lea mea o le TV ma le leitio, sa faasalalau a felafolafoaiga mai le Palemene i totonu o le leitio, e lē o se mea fou la. Masalo o tagata na e faia na mafaufauga, o tagata e lei faalogologo muamua i felafolafoaiga a le Palemene, i tamā ua fai i lagi le folauga. E lē sa‘o la le mafaufauga lena e aumai. O le tulaga foi i le TV, leai o mea ia e faasilasila i le TV, o mea o faamaumauga lava a le Palemene e lē o faasalalauina, ae o lea e faasalalau felafolafoaiga a le Palemene i le taimi lava e fai ai.
O lea faatoa foi atu nei le sāvali a faipule mai Ausetalia, sa faalogologo i le matou fonotaga. Fai mai le faipule Ausetalia ia te au, ‘E ese alii le tamalii o le tou felafolafoaiga’ auā sa auai le Aso Lua na tatala ai le fono. Ona ou fai atu lea poo le ā le tamalii, ae fai mai, a fua ia matou fono ia e fai i fafo i Ausetalia, e matuā maoae a matou upu e lafo i o. O upu ia e fai e outou, e matuā tamalii tele.
Ua e faafogafoga mai la i mea ia. Masalo a tou faalogologo ane foi outou i felafolafoaiga i totonu a le Palemene a Niu Sila, e matuā maoa‘e foi upu na e felafoai ai. Ma o le gagana e fai e matou, e lē milia faauu upu i totonu o le Palemene, i le mea e lipoi ai ia upufai o le atunuu. Faapena i Palemene uma a, a oo loa ina vevela le toto, e amata ona tulai mai se faipule amata ona faifai mai le Malo, e lē o se mea matagofie le faafogafoga mai a le atunuu, o e alu atu foi lele e te tamalii atu, ae o la ua sau i le atoa le isi e tala‘u mai upu. E pau a la le mea e tatau ona fai, o le tali loa le upu i le upu.
E lē faapea o le a aumai ona nofonofo lea o le Malo. O le ala foi lea na amata mai ai le matou faavae lea e alu ai nei, e sasi loa le Itu Agai, faasa‘o ai loa a i le taimi lena. Lea sa masani ai ona faitio ai matou faapea e iai le matou taimi matou te tali ai. O le faalavelave o le mea lena, afai e tulai mai se faipule o le Itu Agai ma lau lau sa‘u Minisita ua maua o gaoi tupe a le malo, ae lē tali i le taimi lena ma faasa‘o, se‘i uma saunoaga faalauaitele ona faato‘ā tali lea i le isi aso, e eseese tagata e faalogologo mai i felafolafoaiga.
E faalogo mai loa Lafai ua alu atu upu ae lē tali, ona alu loa lea o Lafai i o poo fea le nuu lea e iai ma fai, ‘Na ou faalogo i le mea lea na saunoa mai ai Levaopolo ma taufaifai ai i le gaoi o le minisita lea,’ ia ona alu ai a lea o le tala ae leai a ma se tali a le Malo. O le mea la lena e faitio soo ai le Itu Agai ma ou faasa‘oa, leai, o le upu e ave i le uamea, o le taimi e faasa‘o ai le uamea, o le taimi o la e vevela. E lē faatali se‘i maalili. E maalili loa le uamea, e te fiu e toe ta faasa‘o ua faigata.
