Palemia: O lea sa faasalalau atu i le nusipepa, e to‘a 10 o matou sui mautinoa a o lei faia le faiga palota. E faavae lea i itumalo foi nei e na o matou a sui la e tamomoe ai. Lona uiga la o lea mea, poo le ā lava le malolosi o sui, ae iu ane a, o le sui a o le HRPP la e sau ai.
O le isi tulaga, o sui malolosi o matou ia e tamomoe, ae matuā iloa patino a, e vaivai tele le sui o le Tautua la e tamoe ai. Manatua foi, o le mea lea sa fai e le Tautua, o le taumafai e o faamalolosi tagata e o ane e tamomo‘e ina ia iai a se tagata e ta‘u ai o le tagata lea a le Tautua.
O lona uiga o isi sui, e matuā vaivai a, ae o la lava e tamomo‘e ona o le uunaiga a le Tautua, mo mea o le tulaga foi lele faapea atonu lava e iai se tulaga e sao mai ai. A o totonu a ia o faiganuu, e iai a matai e te iloa lelei e lē taitai talafeagai.
Manatua foi o totonu o nuu, e iai a tapaau ma ponaoo, a oo loa ina fai filifiliga faapea, e agai i ai le tele o mafaufauga o totonu o afioaga.
Ae iai foi la nuu o lea ua tasi le moemoe le tofa ma le faautaga, o ia lea o le a alu e tauavea le mamalu o le itumalo, ona o se taitai iloga mai totonu o le nuu o loo auai pea i fonotaga; o ia o le isi o le aufaitonu, ma e logosaia lona leo i tonufai o le nuu.
Lea la o le ua tasi moemoe o le a alu, ae faalogo mai, e iai le matai lea e tafaovale i Apia, e leai se monotaga o fai, e lei vaaia a i tuā i lenei lima tausaga ua tuanai, ae faalogo mai, ua oso i luga o le tulaga o le aiā tatau.
O le aiā tatau a lea e tausisi. E iloa lelei a iinā, e na ona faamaumau fua o le taimi, ae o le iuga e oo i ai, e faatino a le temokalasi i le mea o loo fulisia i ai le itumalo.
O le uiga la lena o le upu lea ou te avatua, e iloa lelei ai a iinā, e tusa la e 10 a matou sui ua mautinoa, a o lea e lei pa le fana, e lei amatā le faiga palota.
O le tulaga la lena, e manatua foi, i le tulaga a ia o le faatemokalasi, o le uiga tonu o le upu o le temokalasi, o pulega a malo e fulisia i le mea o iai le toatele o tagata e lagolagoina.
A sue la le auala faatemokalasi e sue i le temokalasi faa-Samoa, o le eseesega, o le temokalasi faa-Samoa, e faaali i luma finagalo i le fono a le nuu ma le itumalo.
A tou feiloai ona talanoa lea, ‘o le ā le tulaga, o iai se sui o le tatou itumalo e fia alu, o le ā le tulaga o le tou nuu?’ Ia ona aumai foi lea, ‘se o le tama lea e tu lelei i o, o loo galue o loo faauluulu i ai le matagaluega a le Malo. Sa sikolasipi i fafo, o le tama lea e lelei, o lea foi e auai mai i meafai a le tatou nuu.’
Ina faapea loa lea, ‘ia o le tatou tonu la o le a fai, ave le tama lena mo tatou.’ Ia o lea la ua tasi moemoe le itumalo. Ia manatua la, o le faa-Samoa, o le mea a e iai le finagalo o le toeaina, e iai foi ma le loomatua, e iai foi ma le fanau.
Ae tei la ua faalogo mai, e iai le tulafale a le isi aiga, o mea o matai tautua, na uma a ona fai a latou faiga saofai i le fa tausaga talu ai, ia ona o mai ai a lea e lei toe vaaia i totonu o le nuu, ae faalogo mai o lea ua oso. Ia o le temokalasi la faapapalagi, e faaali lou finagalo i le tusi faalilolilo i lau palota i le fasi laupepa, na ave lea tuu i totonu o le atigipusa.
Ae o le mea la e tupu, e sau a, o le iuga a na faaali i le temokalasi faa-Samoa e faasilasila aloaia i upu i luga, ona sau a lea o palota faalilolilo, e sau a o le mea a e tasi.
E laitiiti a nai sui e ono ese ai se faaiuga, ae fulisia a le toatele i le faaiuga o le temokalasi faa-Samoa, o le finagalo faaalia i luma i upu ma saunoaga ma fetalaiga a le itumalo, ae sau foi le faaiuga o le palota e ala i le temokalasi faaperetania, o le palota faalilolilo, e sau a o le mea e tasi. O le tulaga la lena o le faamaninoga o itu ia sa e fesili mai ai.
