Palemia: O le mea muamua, o Hong Kong a ia, e 100 afe le mea e maua mai ai, pe a manumalo i le Ipu. Auā o lea a lava le avanoa, e lē o mamao tele foi tatou i tua. E ui a ina tu fā, ae o le mea mo‘i a o la e tu lua tatou.
Auā o le sili ma le tu lua, e tutusa a ‘ai; o le tu tolu ma le tu fā e tutusa foi ‘ai, lona uiga o la e tu lua tatou.
O le mea lea e tupu, o le sili e tutusa ‘ai ma le vaega e lua lea e iai tatou ma Fiti, e tutusa foi tatou ‘ai. Lona uiga la e o la e tu lua tatou, ae o la e lava le taimi e toe faalelei ai le latou taalo. O le mea moni o lea faato‘ā atoa nei le ‘au ina ua sau Uale, le ‘au lea sa siamupini.
O lea la e iai tupe e maua, ae o lea a e iai pea tupe a le Malo e maua, e lē faapea ua aveesea, o lea a e iai a le faatosina lea a le tatou Malo, ae o taimi uma a e lē maua ai le ipu, e leai foi se tupe e maua.
O le mafuaaga lena o lea e ala ai ona fua i le tulaga o le Ipu, faato‘ā maua se mea, auā a faapea e totogi a i taimi uma poo le maua o se Ipu pe leai, ia e leai la se mea e tauva ma tausinio ai ina ia maua le manumalo.
O le iuga lena o le faatulagaga seiloga a e maua le Ipu faato‘ā maua se tupe, e fai ma mea e sogasogā ai ina ia ausia tulaga pito silisili, ona faato‘ā maua lea o le taui.
O lea a la e iai a tatou seleni mo latou, e avea pea ma luitau mo latou. Ma o le mea foi lena sa ou faatupu manatu ai a o iai i Niu Sila.
Na manaia a la le latou toe taumafai mai, ae te‘i ua iai le faaletonu, ia ona uiga a foi o a tatou tama, e iai a taimi taalo, taalo ai foi, ua lē lavavā ona taofiofi le loto ita, ia ma tulai mai ai nai faaletonu, o le mea foi la lena o lea e faaletonu ai le kapeteni.
O le tasi lena o galuega tele e tatau ona fai, o le faamanatu ia tatou tama, o aso nei ua lē toe aogā le faaali o le fia lotoa i totonu. Tasi a le mea e faaali ai le lotoa, o le taalo o le taaloga ia lelei, ae lē o le fai ma manao e faamisa i totonu, e lē o se mea lelei.
Radio Samoa: Talitonu la e tāua tele lava vae o le taamilosaga lea o loo totoe nei, ina ia mafai ona saili ai le siamupini o le tatou taitoafitu o lenei foi tausaga.
Ae o le a ta see mai le vaega lea Tuilaepa faamolemole lava. O finagalo fa‘ifa‘i lava o le tatou atunuu, ua faatuputupu fesili ai le ta polokalame i lenei afiafi.
O le fesili faapea, Pe aisea lava ua faafaigofie ai ona talia ai e Samoa lea faiga o le susunu o tino maliu o tagata. O lo tatou atunuu o se atunuu Kerisiano, aemaise e lē o se tu lea sa sau ai o tatou augatuaa ua fai i lagi le folauga?
Palemia: Masalo o loo gugu pea to‘au i ē o loo lagalaga pea lea mataupu. O loo manino a, o le iai o le tautua i le taimi e moomia. E pei foi o Niu Sila. Se‘i e ta‘u mai ā, o se atunuu Kerisiano Niu Sila?
Radio Samoa: Ia e Kerisiano isi, ae lē Kerisiano isi.
Palemia: Ia o lena e faulai iinā mea na e te fai mai ai. O le matuā Kerisiano o Niu Sila, ae o le matuā tumu ai o mea na e te lagā mai.
O le mea lea na tupu i le sunami, o le tele ia o tagata mai fafo ia na lavevea, na matuā moomia ai a se fale faapea, e faaliu efuefu. E oo mai nei foi la, e iai a ekalesia i le latou a faiga faavae, e matuā tapu ai a le faaliu efuefu. Ae lē o tapu i le tele o ekalesia.
