Ia o lea ua oo a ia Rusia o la foi e fia manao ia e faafoliga o se atunuu mativa. Ia o le a faapefea ona mativa, o tele le mau atomic bombs, ma le suauu o loo tafe faasolo atoa i totonu o le atunuu; ma ua o faafia i lugā i le masina ma a latou loketi, a o lea ua fai mai o lea e fia mativa pei o Samoa, e naunau e tatalo mai i atunuu se‘i fesoasoani atu.
E lei leva nei ona taofi le 400 miliona tala Amerika e ave e Iapani e fesoasoani ai i le atina‘e o le malo o Saina, e lei leva ona taofi. O la e tiga ona vaai atu Iapani ua maoae ma maualuga le tamaoaiga o Saina, ae o la e alu a i ai lenei 400 miliona o mea a ua leva ona fai. E faato‘ā taofi talu ai nei a. Ae o le mea lea ua tupu, ua na o le faulai o reserves mai luga o fefaatauaiga, o lea ua ave uma e Saina fefaatauaiga a le lalolagi, ona o le taugofie tele o oloa latou te faia ona o le toatele o tagata e piliona ma piliona, ia ae faalē iai ni galuega o iai.
Radio Samoa: Ua māua atu le lē toe mafai ona matamata o le taamilosaga lakapi lea, Super Rugby 15, e fiafia ai tele lo tatou atunuu, ona o le faaiuga a le televise a Fiti o loo latou taofia aiā tatau o faasalalauga. O le ā se taumafaiga a lau afioga a le taitaifono ina ia mafai ona toe faafoi atu ….
Palemia: O le mea muamua, manatua foi o a tatou a TV ua pule i tua, ua lē o toe iai se aiā a le Malo. O le tulaga foi o le faamatuu i tua o mea nei e tauave e latou, o private sector.
O le tulaga la e iai, e faapena ona oo i lea tausaga ma faasalalau mea nei o rights, o aiā tatau e faaaogā ai mea nei o televise, o alaleo e maua mai ai lakapi. Na ou iloa la ina ua logo mai a‘u, ua manumalo Fiti i le tauvaga.
O le ala la lena na ou tapā ai loa latou, e lelei ona fai se gaioiga ina ia toe maua ai le avanoa i mea nei o taaloga.
O analeila la lea sa ou talanoa ai i le TV, e sili ona fesootai ma le regulator a tatou, ina ia tagofia vave le mea lea. O le ā le fesoasoani e fia maua atu i le Malo i le itu tau tupe, ona logo mai lea o le Malo.
O le tulaga la lena o lea e latou te faafeagai ma le itu lea, ona toe logo mai ai lea o a‘u mo se fesoasoani e avatu mo latou.
A o le itu tāua a lea ua aliali mai, e iai foi le itu tāua o le faaletonu o a tatou faipisinisi, e atamamai ai. Ina ia aua ne‘i toe fai ni a latou petipetiga, ona fai faatamala lea. Next time around, e tatau ona matuā agai ina ia maua e latou le aiā e faasalalau ai mea nei o lakapi.
O lea la na logo mai a‘u analeila e taatia atu, o le a toe faia a latou fesootaiga, ona toe fesootai mai ai lea ia te au i se taimi.
Radio Samoa: A o ta iai pea i le lakapi Tuilaepa, o le taitoafitu o loo lona fā i le faasologa o ‘au i lenei tausaga le tatou Manu Samoa. Peitai o lea ua toe fā vae o le taamilosaga lea o loo totoe, ia ma le taaloga tele lea i Hong Kong i le faaiuga o le masina nei.
O tumau pea le maua o a latou seleni meaalofa foi lea pe a toe siamupini mai Hong Kong? Poo le ā se tulaga ua taatia ai?
