O le tupe lea pe a tuu e le tagata, pe tusa e valu afe.
O le atunuu e tatau ona tumau i lalo o atunuu matitiva, e tusa e luaafe tala le per capita income, tupe maua a le tagata e toatasi, i le vaevaeina lea o le aofaiga o tupe maua a se atunuu, vaevae i le aofai o tagata.
E luaafe la tala le tupe maua a le tagata e toatasi, e te nofonofo ai pea i lalo o le faatulagaga o atunuu ia matitiva.
O le mea la lea ua iai tatou, ua lē lua afe, a ua valu afe, ua leva ona ova tatou i luga, ua toeititi faalimaina le tele, ua ova mamao atu.
Ae ou te faafetai, ona ua toe tuu gofie mai le Malo Aufaatasi, ma toe tuu mai le avanoa, e tuu ia le faamamaluina o le tatou siitia i luga i le tausaga e 2014.
O lona uiga, ua toe tuu mai le tolu tausaga, e mafai ai ona tatou maua pea fesoasoani ia, a maua nonogatupe e i lalo ifo o le tasi pasene, umi e 30 tausaga o totogi, 10 tausaga e leai se mea e totogia.
O mea ia o lea e naunau uma iai atunuu ia latou maua. Ae lē mafai ona e toe maua pe afai ua maualuga tele lou tamaoaiga, e aofia ai ma foai mai atunuu malolosi. Ia o ai se atunuu faavalevalea na te lē fia maua ia mea? Ae o lea la e fai mai lea alii, e leaga tele lena mea.
Ia o lena la e ta‘u mai ai iinā, oka oka e, le matuā vaivai tele o lenei faiaoga, e maua le Phd, ae na te lē o malamalama i le faatulagaga o mea nei, ma le tāua ia Samoa, o le toe kolopa i tua e Malo Aufaatasi o le tolu tausaga lea faato‘ā faamamalu ai.
Auā e faamamalu loa lava, ia uma loa ma mea ia e lē toe au i ai tatou.
O lona uiga la o le mea e tatau ona fai i le tolu tausaga lea, matuā tatou liliu e matuā fai ia tele ni a tatou atina‘e ma nonogatupe, a o maua pea le avanoa lea. Auā ua leva ona tatau ona sii tatou i luga, ae o lea tau te taofiofia lava i lalo, ona o mea o nai faamanuiaga na tatou te maua ai.
E iai le tala na ou faia i le tatou leitio. Sa ou alu i Rusia, i le tausaga e 1995. Ou te lele atu i Peretania i isi foi fonotaga sa iai, ona ou afea lea o Rusia.
Oo i le po ou tilotilo atū ua sau i le TV, CNN, ia faatoaga kapisi i Rusia. Ia manatua la o lea ou te i totonu o Rusia, ae sau le CNN ae sau le tala, ua matuā mativa a Rusia, ua na o le pau a ia o mea ia e ola ai, na o kapisi.
Ae o lea ou te iai i totonu o Rusia, o lea ou te vaai i le matautia o taavale afi feoai solo, a o le mea o le ano o fale tetele, o le atunuu ua alu faafia i le masina. A o lea fai mai e tagi mai i atunuu malolosi, e faamolemole sei alolofa atu, ua toe o kapisi lea e ola ai Rusia.
Ona ou nofonofo a lea ma ou ataata ma ou faapea, ‘oi sole, faapea a e fai i Samoa ia lenei mea, o le tau taofiofi o le fia tagata, ina ia maua ai pea nai seleni. Faapea a‘u e lē o faia i le atunuu, a o le atunuu ua o faafia i le masina.
O le tulaga la lena, o le mea o le faaaogā o le mafaufau. E lē aogā lou fia tagata televave, ae faaaogā lelei mea e mafai ona maua ina ia maua mai ai pea fesoasoani, ia ma tuu tuu atu i tua le tulaga pe afai e mafai, ae atili ai ona maua pea nai fesoasoani e atina‘e ai pea lo tatou atunuu.
