Radio Samoa: Ua faatāua e lo tatou atunuu o Samoa ia Kalaiesetete ma le mafuie e pei ona afatia ai. E 100 afe tala Niu Sila lea ua foai e le tatou atunuu mo Kalaiesetete, o le mafuie e pei ona silafia. Ua tele foi a tatou fesoasoani auā e pei ona matau atu, e faitau 10 afe.
O le fesili i lenei afiafi Tuilaepa, o lea e lei leva atu a tatou foai nisi foi sa afaina i le maina i Niu Sila nei, e lē gata foi i lea o lologa i Brisbane i Ausetalia. Ae sei avatu pea lava le vaega lea o loo laga ai finagalo o nisi.
O loo moomia le fia faaleleia o alavai aemaise foi le maketi i taimi o lologa. Pe lei se‘i tagai muamua ane i ai le Malo e ave i ai le faamuamua e pei ona iai foai tupe tetele ia e foai e lo tatou atunuu?
Palemia: Ia tatou a galuega tetele, e leai a se tulaga foi e fou ai a tatou lava tapenaga e tatau ona fai. Se‘i vaganā ai lava la le piriota lea talu ai nei faato‘ā mae‘a, masalo o se taimi pito sili lea ona mamafa ai timuga i Samoa nei.
O le itu la tāua, soo se tulaga lava e atagia ai le siisii pea i luga o le matuia ma le malosi o le natura, e lē gata i matagi ae faapea foi ma le malosi o le suatimu, ia o mea uma a ia e aogā e saga mafaufau i ai, e toe fetuutuunai i ai a tatou standards.
O lona uiga o le malosi o fausaga o auala, faapena foi le faalauteteleina pea o alavai. I totonu a la o le taulaga, o le isi lea mea faigata tele, ona o Apia a ia o loo tu i luga o le faataufusi, ma o itu pito vailaloa ia o le atunuu.
O ala foi la lena e sau ai mai o i Vaitele i le agai atu i Vaiala, ia o igoa uma lava o nei mau nofoaga e amata a i le Vai. E atagia ai le vailaloa o nei eleele i le talafatai i Apia, faasolo mai a i Vaigaga, Vaitele, Vaiusu, o Vaiola, o Vaimea, Vaitoloa, faasolosolo atu ai a i Vaipuna.
O le tele a o nei eleele e amata a i le Vai, lona uiga, o tuaa lava na soifua mai i aso ua tuanai ma faaigoaina nei eleele, o la ua faaigoa lava e latou i le igoa e atagia ai le vailaloa o ogaeleele ese i totonu o le tatou taulaga i Apia nei.
Ma e soo se taimi a e tupu ai se lologa, o le taimi foi lena e iloa atili ai e a tatou inisinia le mea e tatau ona fai i le tulaga o auala faapea ma talivai, i le tatau ai ona faalautetele ma teuteu pea ina ia mamā ina ia aua ne‘i otaotā, auā o le isi tulaga lena e vave ai ona lolo, ona ua poloka alavai. O le itu la lena e tāua ai le vaega sa e lāgā.
Radio Samoa: O le sui tauva lea o loo tamoe nei faasui tauva, le afioga lea ia Solomona To‘ailoa. E lē o le HRPP, e lē o le itu a le Tautua, ae o se sui tauva tutoatasi, poo le sa‘o tonu lea? Peitai o loo ia lagolago le mau a le vaega faaupufai a le Tautua Samoa Party, ia sui se faiga malo. Poo le ā se malosi o lenei suiga lea ua saunoa i ai le sui tauva?
Palemia: Manatua foi o le sui e faalei iai sona malamalama i tulaga tau upufai. Pei na avane a lona taitaia foi o solo tetee faasaga i le Malo, i le faaulufale mai o taavale e taumatau foeuli, e pei o inā na amata ai ona ali lona naunau e fia alu e tauva i le faiga palota.
O lea la sa lafilafi a i lalo e lei i luga sona igoa, faato‘ā i luga nei ina o le a tapuni, ia faato‘ā tetei ai foi lea o le afioga i Laulii, o loo iai sona agaga e tamoe. Ia o lea sa ou faalogo ai foi i nisi o ona mafaufauga tai pei o le tetee i galuega tetele sa fai nei e le Malo. Pei o lona finagalo, maumau tupe a le Malo e fai ai fale.
