O le ala foi lena o lea e avatu ai a‘u faamatalaga i le gagana tuusa‘o, o le gagana e malamalama gofie ai mataupu. Pau a lena o le auala e malamalama gofie ai mataupu, o le avatu i le gagana tuusa‘o. Ai foi o le tulaga lea, a lauga mai foi faifeau i luga, e faaaogā foi e latou le gagana tuusa‘o. Ia ona tiga ai a lea o le loto o le isi pe a tuusa‘o tele le lauga a le faifeau ma tuusa‘o mai ai a i le aulotu ma tiga ai loto o isi, ae la e sa‘o le faifeau, i mataupu la foi e faamatala mai e ia i le gagana tuusa‘o, ia ona taunuu ai lea o le upu foi lele, e ala ona tiga, ona e tiga le mea sa‘o. Pei la o le itu la lena ona o uiga a o mea nei o talanoaga, e usu mai oe, tali atu a‘u.
O le tulaga la lena, ou te lē o usu, a o le polokalame lena e usu, ona ou tali atu lea, ma ou te tali tonu atu a i le mataupu o loo laga mai, ina ia vave ona malamalama ia ē faafogafoga i le tatou talanoaga.
O le ala foi lena o lea ou te taumafai ai, ina ia sosolo tatou i luga o talanoaga e pei ona faatino ai e tou TV iinā. A outou faalogologo lelei i le faatinoga o talanoaga a papalagi, auā o nei mea tatou te faia o mea a papalagi, na ona sau a o le fesili tuusa‘o alu atu le tali tuusa‘o.
Ae lē o le fai o le mea foi lele, e muamua ona faatulou. A alu loa le mea lena, o le faatulou, tulou, tulou, ua tupu le faalavelave, e vivini moa na o le tolu mataupu o loo talanoa ai.
Pei la o le tulaga o lena o lea ou te taumafai ina ia agai i ai talanoaga ia e fai atu, ina ia faafaigofie ai ona malamalama mataupu o loo lāgā mai e oe ae tali atu a‘u. Ia ae o lenei itula, ia faasoifuaina le mamalu o lo tatou atunuu o loo faafogafoga mai. Soifua ma ia Manuia.
Radio Samoa: O le afioga i le Palemia o le tatou malo, Tuilaepa, Aiono, Naioti, Fatialofa, Lupesoliai, Sailele, Malielegaoi, ma se faaopoopoga o le tatou polokalame, o le Faatalanoaga ma le Palemia, seia toe maua se faaopoopoga i le vaiaso fou.
