Radio Samoa: E tāua tele lenei talanoaga lau afioga i le Palemia, ae ua toe tasi ai le aso ona tatou taunuu lea i le faiga palota a lo tatou atunuu.
O le ā tonu le aso lea ua atofaina mo le faatautoina o sui faipule fou o le Palemene, ae o le ā foi se aso e usuia ai lana fonotaga muamua.
Ma le vaega tāua lava lea Tuilaepa faamolemole lava, i le faiga palota la lea o loo sauni atu ai lo tatou atunuu mo le isi tausaga poo le isi lima tausaga? Pe mafai ona e toe faamanino mai lava le tulaga lea o sui tauva o i latou e fia ofi i totonu o le faiga palota i le isi lima tausaga, e aofia ai le tolu tausaga foi lea e tatau ona nofo ai i Samoa, ma avea ma suafa matai, ma fai le monotaga. Ia ae pei o le isi tulaga lea o loo lagalagā ai lava finagalo o le tatou atunuu, o le ā tonu le uiga o le monotaga?
Palemia: Ia lea ua maua atu. E faigofie a le mea o le matai ia e fai nuu. O le fono a le nuu, o le a fai le tonu a le nuu, o le a fai le tatou faleaoga. Ina ona alu lea o le saofaga a matai.
O le mea lena e igoa o le monotaga. A fai mea a le nuu, o saofaga e fai faatasi, ona fai lea. A oo foi i monotaga faaletonu, manatua la e sili atu ona telē le monotaga faalelotu, auā e fai a i vaiaso uma.
O lau taulaga ma lou alofa i le faifeau, o mea uma a na o lea e lavea i totonu o le monotaga. O monotaga faalelotu, o monotaga faalenuu. E lē aofia ai la au mea e fai i lou a aiga. Auā pe te matai pe te lē matai, ae a oo a i le taimi e tupu mai ai se faalavelave i totonu o le aiga, e tapā uma a le aiga.
E lē o se monotaga lena mea. O le monotaga i meafai a le nuu, poo le alu atu o se malaga i totonu o le nuu ona fai lea o le laulautasi.
O le laulautasi, o le moa ma le taisi, poo talo e fia ma luau e fia ma le laui‘a. Ia na sau loa lea ma saofaga, fai le galuega foi ua o atu ni aufaigaluega a le malo ona tala api lea.
Ona faapea lea, ia o le a saosao tatou auā le tulaga o le fafagaina o le aufaigaluega lea ua o atu e fai se atina‘e tele ma tala api i totonu o le nuu.
O mea uma na, e malamalama lelei a i ai matai fai nuu, ae matuā lē malamalama ai a le matai e na ona alu atu a tapa lana ipu, fai le saofai, sau ai a e leai ma se mea e toe faia.
O le tulaga la lena, e manino a ma maioio lelei le monotaga. Manatua la, tasi lena mea o lea e tāua ai le sao o le faamaoniga a le Pulenuu, auā o ia tonu lena o lea e nafa ma le tele o tautua nei, ma monotaga e faatino i totonu o le nuu.
O isi nuu e nofo lelei a le Pulenuu ma lana api e faamaumau ai. A oo loa la ina fai faamasinoga ae fesili, ona avatu loa lea o le api lena.
E faigofie a, na ona avatu a faaali, o mea uma a ia na fai i le lima tausaga, ae leai a se mea a le alii lea o tusia ai ii.
Radio Samoa: Tuilaepa, sau saunoaga mulimuli lau afioga i le Palemia. O lau afioga ua leva ona tulai mai ma avea ma Palemia o le tatou atunuu o Samoa, na te tauaveina lo tatou malo, ia ae tainane foi le tapuaiga ma le nofo tatalo atu a lou atunuu, a o e alofaiva lau afioga i le Palemia i le tautuaina o lo tatou atunuu, e pele i o tatou loto o Samoa, ua tutoatasi ma ua tatou aeae ma sapi ai nei, ma lou faaaloalo lava Tuilaepa.
Palemia: Ia e auala atu i le leitio, se upu e faafeiloai i le mamalu o le tatou atunuu o loo faafogafoga mai i le ta talanoaga. O mea ia ta te talanoa ai, e lē o ni mea fou. O le tele a o mataupu ia ta te talanoa ai, sa lāgā foi i isi talanoaga muamua. Pau a le mea lea, ou te faamoemoe e leai ni tou faasoa o faia ai.
O le mafuaaga e ala ai ona ou tapatapa atu pea i le taofia o tou faasoa e faia ai, leaga foi tasi lena mea e tau lavea ai tatou iina i le toto maualuga, o le faasoa atu o le isi tagata i le isi tagata ae tatau ona iai se tali, a o le tali e tatau ona avatu e a‘u.
A fai la le tou faasoa iinā ae leai se isi e tali malamalama i le mataupu ma toe faalautele atu, ona fai ai a lea o le pisapisaō i luga o le tou leitio, ona tatou oo atu loa lea i le mea matautia o le taitai e le isi tauaso o le isi tauaso.
Ia ona tele ai lea o le tata o le fatu ma le agai i luga o le toto maualuga, i ē e soona lafo manatu, ma tiga atu ai ma loto o isi e tau mai ia te au poo le malo foi, o loo faafoea mataupu ia i le taimi nei.
O le ala la lena o lea ou te tapa tapa atu ai pea, a uma le tatou talanoaga, faitalia le tagata ia ma faavasega e ia mea ia ou te avatua, ma se avanoa e toe musumusu ane ai ia oe mo se isi faamaninoga, i le isi polokalame o lumanai ai. …E pei o le mea lena o lea ou te fesoasoani atu ai i le tou leitio, ona o le faautaga mamao e faaaogā ai le tou alaleo e faaalu atu ai nisi o mataupu o loo naunau le mamalu o le tatou atunuu e fia malamalama ai.
