Radio Samoa: Faafetai o lea ua maua mai se avanoa o le afioga i le Palemia o le tatou Malo, Tuilaepa Lupesoliai Sailele Malielegaoi, ia auā lava le tatou faatalanoaga masani, lea ua see mai lenei taimi e pei ona fuafuaina.
Lau afioga i le Palemia, lau susuga Tuilaepa, pei e manaia foi pe a amata poo le ā se tulaga na oo i ai sausaunoaga a faipule taitasi e pei ona sa faatalatalanoa i luga o le televise i Samoa?
Palemia: Faamalo atu o lea ua maua foi le avanoa i lenei ituaso ta te toe talatalanoa ai ma agai tonu mataupu i nisi o vaega e fia talatalanoa ai. O le taimi nei o loo faasolo saunoaga a sui tauva, faatatau i fuafuaga o loo naunau le sui ia e fia faatino pe afai e agai mai ia te ia le faiga palota a le itumalo. O le tulaga la lena, o lea lava o loo faagasolo saunoaga i le atunuu, e ala i le leitio faapea foi ma le TV.
Radio Samoa: Ua toe o se aga ona taunuu lea o le aso ua atofaina mo le faiga filifiliga a le tatou atunuu mo le faiga palota tele i lenei tausaga. Ae matauina pea nisi o faiga palota a le tatou atunuu i le mae‘a ane, ua amata foi ona vesia ai le lotoifale o aiga ma nisi afioaga ma o latou sui faatutu. I le aso tonu lea o le palota Tuilaepa, o le ā se malupuipuia o le saogalemu ma le filemu a o faagasolo le palota a le atunuu?
Palemia: Ua uma ona faasalalauina e le ofisa o leoleo, le tulaga o a latou foi tapenaga mo le filemu. O tulaga masani lava, ua masani foi leoleo i le latou galuega fai.
Radio Samoa: O le taimi lea e mātau atu ai, o le a tapunia ai le faatauina o le ‘ava, mai le itula e 8:00 i le 3:00 i le afiafi, o le aso lea o le faiga palota e faasā ai. Po ua talafeagai le tulaga o le taimi lea ua fuafua mo lea faamoemoe?
Palemia: O le taimi tonu lena o lea e faagasolo ai le faiga palota, e tapuni i le ta o le 3:00. Pei ona silafia, e uma loa le 3pm, ia o le taimi tonu lea e saoloto ai loa tagata, ua uma foi ona laulauina le aofai o palota i nofoaga e fai ai faiga palota. Ma o le tulaga lava ia i aiaiga ua uma ona faataoto, o aiaiga lava mo le filemu o le aso tonu lea, ma le puipuiga e tatau ona fai.
Radio Samoa: O le ā se maitau atu i le faiga palota i afioaga. E lē gata foi i lea o itumalo ma o latou sui faatutu i le aso lea. Auā o lea ua maitau atu, ua faaalia foi a latou faatosina ma le faalauiloaina o a latou sui faatutu i posters, o faailoilo e promote ai a latou sui faatutu. E iai se toafilemu poo vesia foi le lotoifale o lo tatou atunuu i le taimi nei a o faasauni atu i le faiga palota?
Palemia: E leai lava se tulaga o lipotia mai ai ni vesiga. Ae o le mea foi o lea ua agai atu, toe o le tausaga fou atoa le 50 tausaga o le matua o le tutoatasi o Samoa. Ma ua tatou masani ai, lona uiga o le faaiuga lea o le tulaga o se atunuu ua masani i suiga faapenei.
O le itu la i le aoao o le tulaga lautele, ou te lagona e pei a o isi foi faiga palota sa fai muamua.
E mae‘a loa ona tapuni pusa palota, ia ona taumafai foi lea o i latou o ofisa taitasi e agai mai loa i Apia ma ave uma loa pusa palota nei i Mulinuu ma faatino ai le toe faitauga, ia ma tusia loa i luga laupapa i tai i Mulinuu i le Aso Faraile e faatino ai le faiga palota.
O lea la ua uma ona taoto tapena uma e moomia e le tatou ofisa o faiga palota, faatasi ai foi ma le ofisa o leoleo, auā le leoga o pusa palota ina ia aua nei aafia. O le tulaga la lena o tapenaga ua iai nei.
