Radio Samoa: O lea foi ua maua le fesootaiga ma le taitai o le malo, le afioga i le Palemia, le Susuga Tuilaepa Sailele Malielegaoi.
Avea ia le leo faatauvaa e fai ma fofoga taumomoli o le atunuu i Aotearoa nei. Faafeiloai atu i lau afioga le Palemia. Malo le soifua manuia.
Palemia: Faamalo atu i lau susuga Taito i le valaau mai foi i lenei itula afiafi, i le faaauauina o a tatou talanoaga. Ae lelei ona faagasolo loa le ta polokalame.
Radio Samoa: Ua maua nisi o lipoti o loo iai nisi o kolisi o le a tapunia. E lē o māua foi e matou iinei, e pei o le Kolisi o Samoa. Poo le ā sou finagalo lau afioga i le Palemia i lenei tulaga, faamolemole?
Palemia: O loo toe faaleleia nei le kolisi lena, aemaise o loo toe faafou fale ia sa nofotumau ai tama ma teine. Manatua foi o aoga nei, ou te manatua pe gata i le 50 tausaga talu ai, sa fai ai fale nofo nei, nofotumau, ona o le tulaga tau mamao o Savaii ma Upolu nei, faale lelei foi auala.
A o le taimi la lenei, o lea ua tele ina tele a tatou kolisi. Auā o aso na fai ai fale nei, sa na o le Kolisi o Samoa, Kolisi o Avele, Kolisi o Sagato Iosefo, o le Kolisi a Saint Marys, ia pe na pau na o kolisi, ma le Kolisi o Vaipouli.
A o le taimi nei la, ua silia ma le 20 kolisi ia ua iai nei i nuu i tua, ma ua toatele ua lē o toe omai i Apia nei, la ua iai kolisi i o latou nuu.
O lea foi ua iai le polokalame mo le tosoina atu i ai o internet e faaaogā ai mo mea o metotia faaneionapo i a‘oa‘oga. Lona uiga la, ua telē a le eseesega o aso la ma aso nei.
O le toatele foi o tatou tagata, ua tele eleele ua maua talu ona tulai mai le faiga malo lenei o le HRPP.
O lea foi i le va o le 1990 i le 1997, sa tele ai ina vaevaeloa eleele o le Esetete Tausi i Apia, ma tuuina atu faatau motu i tagata i ni tau e ta‘i 30 ma ona tupu afe i le kuata eka.
O le toatele la o tatou mai Savaii ma nuu i tua i Upolu, o lea ua nofomau i Apia, ua maua faigofie le tele o mau eleele. Muamua atu sa toaitiiti a i latou foi, o le toatele a foi o le vaega o le au faipisinisi i Apia e maua tupe, ae o le mea la lea ua iai, o le matuā toatele a o tagata o tatou tagata mai tuā ua iai o latou fanua umia saoloto, i gauta i Faleata, Tulaele, o Vailoa, Siusega, Ululoloa, Vaitele-uta, agai atu i Tafaigata, faapena foi le agai atu i luga i Tiavi, ua matuā toatele a o tatou tagata mai tua, lea ua iai o latou eleele e umia saoloto.
O lona uiga la, ua ese mamao a le tulaga sa iai i le 50 i le 60 tausaga talu ai, ma le taimi lenei, ua lē o toe moomia ai ni fale nofotumau, ae peitai ane, o lea e faaauau pea.
Ae o lea la sa tapuni e pei ona logo mai ai le Kapeneta e le Matagaluega o Aoga, o loo faafou fale nei, ona ua fai si leva talu ona fausia, ma o le ala foi la lena o lea ua aooga savali ai nisi o fanau sa masani ona nofotumau ai i fale nei. Ia o le tali puupuu atu lena e tusa ai o le faafesili.
Radio Samoa: Matamata atu i nisi o tusitusiga lau afioga, o loo aumai ai polokalame o faaaliga o ofisa o faatoaga ma faigafaiva. Po ua iai se fuafuaga a le Malo, o le a toe faaolaola nei faaaliga e pei ona iai i aso ia ua mavae, i taumafaiga lelei e toe unaia tagata i nei atinae?
Palemia: E fai a faaaliga, e lē o tuua faaaliga na, e ui a o lea ua fai ma eseese igoa, e tai pei o le Talo Mua. E lē o taofia la, pau a le eseesega, muamua atu sa na o Apia na fai ai.
Ae o le eseesega lea ua iai i le taimi lenei i le faasologa maia o le paeaiga lea faato‘ā uma atu nei i le lima tausaga, sa amatalia ai e le afioga i le alii minisita, le fetalaiga ia Tauā, sa ave i nuu i tua, iinei i Upolu ma Savaii, ma sui ai le igoa i le Talo Mua, e toe unaia ai le totōina o faatoaga.
Manatua foi e tele a faafitauli sa faafeagai ma i tatou, i le tulaga o le lega. Ma e silia ma le 30 ituaiga o talo eseese sa taumafai o tatou saienisi i nuu, e faatupu ma taumafai e sāili mai ai le talo e tau lalata i le tatou talo Niue. Lea la ua maua ituaiga e tolu, o le Samoa 1, Samoa 2, ma le Samoa 3.
E iloga gofie i le tiapula e uliuli, le tiapula mūmū, ma le tiapula lanu meamata. O le tulaga la lena, o talo ia e tolu o lea ua maua mai ai le talo e matuā lelei a atoatoa.
Lea la ua matuā unaia lava i le toatele o faifaatoaga i tua, ma o le suiga la o polokalame ia sa faagasolo i le tausaga talu ai, ma le polokalame fou lea na fai nei i le vaiaso lea na tea nei, ona e faaautū le faaaliga lea i le faatoaga faataitai (demonstration farm) a alii Saina.
O le isi lea polokalame e eseese a, e aofia ai talo, faapea foi le ituaiga metotia eseese e faaaogā e Saina, e totō ai ola lauusiusi le tele o laau‘aina, faapea foi ma le manioka.
E lē gata la i lea, o le latou faaaogāina se‘i tulou, o le atina‘e lea o meatuaoloa, e ao mai ai le otaota o puaa se‘i tulou, ona faasee atu lea i se tamai pu laititi e faapala ai, ma maua mai ai le kasa, lea la e ta‘i mai i faaga‘au ma ola malosi ai e lē gata e mumū ai molī, ae faapea foi ma le ola ai o ogaumu, ona o le kasa lena e sau ai i totonu, o le methane gas, lea la sa matuā tupu ai le fia iloa ma le naunau o le au faifaatoaga.
Na matuā tumutumu, masalo pe ova i le luaafe tagata, ma le anoano o mau taavale na vaaia ai. O se faaaliga pito sili lea ona tele talu ona fai nei mea o faaaliga.
Ma ou te manatu lava, o le atina‘e lea o le kasa, e ola ai molī ma ola ai ogaumu, masalo o le mea maoae lea sa matuā faatumulia ai le faaaliga i lea aso, atoa ai ma le mataituina o le ola o mea totō, ae lē toatele a le au Saina, o latou faia lea ituaiga o faatoaga, ona o le eseesega lea tatou te mautinoa, o le Saina a faatū mai a e galue ai a i le aso atoa, e lē pei o tatou e alu atu faatopelau foi i le 30 minute se galuega ma afuafu tetele ai ae lē masani le tino, ia uma loa sau loa ua tiga le papatua, sau loa taotooto.
A o le faifaatoaga Saina, ia e faatū mai a ma gaioi mai a i le taeao i le faato‘ā oso a‘e o le lā, seia oo lava ina goto le lā.
O le tulaga maoae la lena o lea sa moomia ai e le Minisita fou o le Ofisa o Faatoaga, le afioga ia Le Mamea, e moomia ai le valaauina o le mamalu o le tatou atunuu, i le au faifaatoaga, e omai se‘i mataitu nei foi ituaiga metotia e fai e le aufaifaatoaga Saina, ina ia tatou o foi tatou e faataitai i ai.
O le tulaga la lena e pei e ese ai le faaaliga lea, ae lē o faapea o se mea fou le fai o nei faaaliga, pau a le eseesega, ona o faaaliga ia sa fai, e lē o ni faaaliga a tau faifaatoaga, ae o faaaliga a faifaatoaga Saina, e faatilotilo i ai o tatou tagata i fua o a latou faaeleelega.
Radio Samoa: E iai si mataupu lea e faaletonu ai o matou manatu, pe mafai ona faalautele mai faamolemole lau afioga i le Palemia, e uiga i polokalame lea sa tatala aloaia i le vaiaso talu ai, o ni a‘oa‘oga tau le saogalemu i vai ma le sami. Se‘i iai sau saunoaga faamolemole Tuilaepa?
Palemia: O le polokalame lea o loo fesoasoani mai i ai Ausetalia, Life Savers.
Manatua foi le tele o mea nei o faletalimalo tumatafaga, faapea foi matafaga e taeele ai tagata, e lē gata i Niu Sila a o Ausetalia, e iai a faalapotopotoga ia, e galulue ai tagata ua ofofua lo latou taimi, e latou te faafoea ai polokalame i le tulaga foi lea o le faatumutumulia loa tagata e o atu e ‘au‘au i le sami, ona o atu loa lea o latou ma o latou laei aau ma o latou vaa, e feofeoai ai ma nofo sauniuni i soo se taimi, aemaise lava tulaga po ua osofaia e se i‘a feai poo malie, poo le tafea atu o le tagata i le malosi o le āu, ia poo le malemo o se isi e lē iloa aau, o le latou tiute la lea.
E leai la ni a tatou faalapotopotoga faapena o iai i Samoa nei, ae matuā tele faalapotopotoga faapena i Niu Sila ma Ausetalia. Ma o nofoaga a nei e masani ona vaaia ai latou, o nofoaga tumatafaga.
O le tāua la ua apo ai polokalame nei e le tatou faalapotopotoga o tagata asiasi maimoa mai, ona o le mea lea e mautinoa, o le tele a o a tatou matafaga e manaia i le feausi ‘au‘au ai o turisi, e iai a le tatafe, e faalēiloa e le toatele, ae tatafe a, aemaise pe a oo ina pe le tai ma gau atu le tai i tai, ona tatafe loa lea o le āu agai i vaiagia poo le ava.
Ua iai tagata ua maliliu i matafata i le matafaga i Lalomanu, ua iai tagata ua maliliu i matafaga i Vavau, ma isi foi vaega o le atunuu, ae leai a ni a tatou tapenaga ua fai, e leai ni faalapotopotoga ua iai i matafaga nei, e faatatau mo le laveaina e tagata aau o i latou ua tafefea pe malelemo.
O le tulaga la lena o le polokalame lea, ma o loo fesoasoani mai i ai le malo Ausetalia, aemaise e iai le faalapotopotoga lena o tagata talavou, o Youth Ambassadors mai Ausetalia, e ta‘i tausaga, ta‘i lua tausaga o inei i Samoa, o le latou a lea galuega.
O le toatele a, e 20 tausaga agai i le 25 o alii ma tamaitai talavou a, mai Ausetalia ua aumai e le Malo e faia polokalame faapenei.
O le ala la na fai ai le polokalame lea i le fale aau, ona manatua foi o i lea e faigofie ona fai ai aoga i le tatou fale aau, ia ae o se tulaga aogā foi lea, auā a mae‘a polokalame ia, ona faasolosolo lea i nuu, auā o le mea moni a, e leai a ni aoga feausi i totonu o nuu.
A lē tupu a‘e a le tamaitiiti ia alu tau malemo, tau malemo a i le sami, te‘i a ua iloa ai aau, e leai ni a tatou aoga taualoa e a‘oa‘o ai le aau, o iai i nuu i tua. Lona uiga la o le isi lea tapenaga tāua tele, mo le taumafai ina ia a‘oa‘o a tatou tama fanau i le taleni o le aau.
Radio Samoa: E iai se tasi o lipoti na taunuu mai i Niu Sila nei, fai mai o se tasi na faamalolo ese talu ai nei e le PSA mai sona tofiga maualuga na iai i le Matagaluega o le Soifua Maloloina, ona o nisi o tuua‘iga, ae o lea ua faafuasei ona toe tofia i se tofiga sooupu i lau matagaluega, le ofisa o le Palemia. Faamata o iai se feteenaiga i le va lea, faamolemole lau afioga i le Palemia, aemaise foi fai mai, e lei faasilasilaina le avanoa faigaluega, ma le agaga faaaloalo lau afioga i le Palemia?
Palemia: Manatua foi, soo se atunuu a, e lua a ituaiga o auala e faafaigaluega ai tagata e faigamalo, o le tofia i tulaga taualoa faa Public Servants, i lalo o tulafono faaauaunaga i le Malo, ma le vaega lona lua, o tofiga foi lea e faalupe, o Political Appointees. Lona uiga o le malosi lea faaupufai e tofia ai tagata o loo iai a latou taleni e mafai ai ona faaaogā pea e lo tatou Malo, e lē faaaogā ai la tulafono ia, mo mea o auaunaga faapitoa, ae faaaogā ai le malosi faaupufai o Malo.
E tele tofiga faapea i atunuu tai pei o Amerika. A o atu a le Malo latou i totonu, o atu foi ma tagata e lagolagoa le faigamalo, ona faafaigaluega ai lea i tulaga faapea. O lea foi la sa pei e tetei ai, ae ai ua galo foi i le au fainusipepa, o le tulaga a lena e masani ai Malo. O le itu la o avanoa faapena, e lē tau faasalalauina. A vaai a le Malo ia i le tagata o le vaega e tatau ai i lea tofiga, ia ona tofi loa lea.
Radio Samoa: Malo faafetai, lea ua manino lea tulaga. Ia talitonu o lea foi ua oo mai i si‘ui, toe tasi le matou mataupu, ma le agaga faaaloalo.
O le tausaga lenei, e lē o toe auaoa i le silafia i le mamalu o le atunuu, lau afioga a le Palemia, le World Cup foi lea poo Setema, ae o lea ua matou maua, o loo moomia e le Manu Samoa, le 4.5 miliona se tupe, auā ana tapenapenaga. E talitonu foi o lea e taimatalii ai foi lau afioga i le kalapu lakapi foi a si o tatou atunuu. O le ā se tulaga e faigofie ai ona saili lenei 4.5 miliona o moomia e le Manu Samoa, mo lana tapenapenaga mo le World Cup, a o alo atu i ai, faamolemole lau afioga i le Palemia?
Palemia: Lelei, o le mea sili o lea lava ua faalauiloa atu lava foi e le iuni lakapi i le mamalu o le tatou atunuu. O le mea tonu lava lea sa ou faasilasilaina, e lē taugofie le auai o le tatou atunuu i taaloga nei faavaomalo i le taimi lenei. Ae o lea a e taumafai lo tatou Malo i ituaiga o auala eseese e pei foi la ona tupu ai le vevesi i le faatuina o le casino, e ui a e oo mai le taimi lenei, o lea a e lei mae‘a tapenaga, ona e iai auala e tatau ona uia.
Ae o le tupe atoa lenei, e iai le vaega a le Malo. Ma o le mea moni a, o le telē a o le faalagolagomaga o le iuni, o le Malo. E iai faalapotopotoga a le Malo, e tai pei o le SIFA, o lona uiga o faalapotopotoga ia tuma‘oti a le Malo e alu atu ai se isi vaega tupe.
Ae o loo iai foi isi faalapotopotoga ia sa faamatuu i ai e le Malo laisene, tai pei o le Digicel ma le SamoaTel, e ono iai foi ni sao o ia foi faalapotopotoga. Ae lē o taofia ai sailiga tupe masani o leitiofoni a le tatou iuni lakapi e masani ona fai i le tatou atunuu, ia i latou e fia maua foi se avanoa e sao ai tuusa‘o.
O lena foi la ua uma ona fesootai atu le tatou iuni lakapi i nisi foi o tamalii i Niu Sila. Tai pei o nisi foi o tamalii, e pei o le afioga ia Toalepai ma latou o galulue faatasi ma Toalepai Lui iinā i Aukilani, o ia latou na e tapatapa atu foi i ai le tatou iuni lakapi iinei. Faapea ma le susuga ia Roache, i latou na o lea o loo fesootai i taimi uma, e fai ai foi ni nai sailiga seleni iinā.
O le avanoa lena i o tatou tagata e fai ai foi so latou sao, o i latou o loo naunau e fesoasoani i le Manu Samoa. E iai foi taumafaiga faapena e fai i Ausetalia, faapea foi ma Amerika Samoa. Ia a tuufaatasi, e ono oo atu a i ai, ua ono maua se malosi, e faatatau i le faamoemoega ua tolaulau ma faasalalau e le tatou iuni lakapi.
E iai foi ma ni nai fesoasoani laiti e lē tele, e maua mai a tatou sponsors i fafo ma le IRB, ia atonu a e uma ane, ia ua tau lalata i ai. Ae o le itu tāua lava i le tatou iuni lakapi i faiaoga ma i latou foi e pulea, o le vaavaai lea i le tulaga ia matuā tapena lelei le tatou ‘au. Aua ne‘i iai se faaletonu, ia tatou taumafai ia oo i le Quarter Final. Auā a oo atu loa i le Quarter Final, ia ua telē foi le avanoa e oo ai tatou i le Semi Final.
Ae a oo i le Semi Final, ia o le mea la lena, o le misikelio. Auā e leiloa la, o le mea foi lenei o le lakapi, e te‘i a ua otitu le isi ‘au, tai pei foi o le taaloga o le taitoafitu lea sa fai i le vaiaso talu ai, ia lea ua oo i laufanua o Egelani, sa tatau ona malo Egelani, ae te‘i ua lē oo i le Quarter Final, a o le mea moni, o lea ua oo i laufanua o Egelani, e telē lo latou avanoa e manumalo ai.
Ae te‘i foi ua oti faaletonu atu ma le All Blacks latou ia Fiti, lea na te‘i a lea ua oo ai ma Fiti i o, ae o le mea moni, ana lē faaletonu le laufaliina o le tatou taaloga, ma te‘i a ua faasala ai le tatou tama, e oo mai nei e lē o malamalama se isi i ai, ana leai lena mea valea, e leiloa poo tatou e ona le ipu lea faato‘ā uma atu nei.
Tele a mau mea faaletonu e tutupu, ona o le malolosi tele o le tatou ‘au. Masalo o le tatou ‘au le isi ‘au e maka uma le au faiaoga ona o le taalo malosi, ae iai le mea foi lea, e lē ‘asa a ma le masalosalo i uiga amiotonu o nei laufalī, e tele a mea piopio i le tele o taimi tatou te taaalo ai. Pei la o le tulaga la lena ua fesili, e iai a le faanaunautaiga o le tiute lea o le iuni lakapi o le faasalalau o le seleni moomia, ia o lea a e tele le taimi lea e totoe e sāili ai.
Radio Samoa: O le isi mea e fia momoli atu ai le faafetai i lau afioga, o lau faamalosiau foi ia i alo ma tamafanau o Samoa, lea na fai i ai e o e a‘oa‘o le laufalī. Ia lena ua tali mai, o lea ua filifili foi se tasi o alo o le atunuu mo le laufalīina o taaloga faavaomalo. Pe sa‘o lea, lau afioga i le Palemia?
Palemia: Ioe, ae iai la ma le tupe sa folafola e ave i ai. Na o le pau a la le mea na faatali ai, e piki loa na te laufalīina se taaloga, foi mai loa i Samoa, tuu loa i ai lana seleni lena, lea sa mailei ai se tama e vave ona alu e laufalī.
Auā o le isi lena mea, o le tuai ona tatou oo i ai i totonu, e saga faifaimea leaga ai foi isi laufalī ia tatou. Ae o le iai o a tatou laufalī, ia o inā e mafai a ona e omiomia ai a i totonu e taga faalaufalī e fai totonu o potu o laufalī, a o mao ai foi se taumatau o se isi o tatou tama i ai i se laufalī, ae o mea a omiomi faaniu aleale i totonu o mea o feumiaiga faalaufalī.
Ae o le tasi lena mea faaletonu sa ou matauina, o le tele o tatou laufalī, na o le pau a le mea e fiafia ai, o le niupia, inupia, inupia, ae lē fia o i fafo e laufalī. Ae ona o le otegia soo, otegia soo, otegia soo, o lena la ua tuu ai le na o le inupia ae tatau ona o e koleni, auā e lē o se tulaga faigofie. E tatau ona soo se mea a e iai le polo, ia e muamua i ai i o a o lei oo atu tama.
O le tulaga la i le laufalī, e tatau ona sili atu lona fit nai lo tama taaalo. Tasi foi la lena mea mo se liutau tele lena ia tatou laufalī, a e alu loa e laufalī, ia o oe la e taunuu i ai le upu foi lea, ‘na e ofo e te alu e tau i se taua, o lou lavā amo le fanafanua.’ O lona uiga, ia sili atu ona e fit, nai lo tama taaalo. Matuā leai ma se aogā o se laufalī, ae alu le polo i o, fai mea valea ai tama, ae la e i tuā e te lei oo i ai, ia ona sao ai loa lea o togafiti a tama taaalo.
Radio Samoa: Toe momoli atu le faafetai tele lava mo le faaavanoaina o lou taimi, ua matagofie ai foi lenei po, i le faafofoga a le mamalu o le atunuu i Aotearoa nei, aemaise le lalolagi atoa. Ia agalelei le Alii, ia maua pea lou malosi i le tino sili le agaga, auā foi tiute ma faiva e taitai ai lo tatou Malo. Faatumu pea le ‘utu, maua lou malosi, ia ae tatalo atu foi, ia maua e le Palemene, aemaise foi le Tautua Samoa, ia maua le tou fealofani mo le tatou Malo. Ae faafetai tele mo lou avanoa i lenei po, lau afioga i le Palemia, Tuilaepa.
Palemia: Faamalo atu foi le valaau mai. E tāua lava la outou sao i le faasalalauina atu o mea foi o loo tutupu i totonu o le tatou Malo, ae o la outou tautua lea, e atili malamalama ai foi nisi o mataupu, e na o matou iinei e malamalama ai. O le mea lea, ia fesoasoani atu foi le agaga o le Atua, ia maua le malosi o le tino ma le mafaufau, auā le faatinoina o lenei foi galuega tāua mo le tatou atunuu. O lenei po, ia manuia tele le faasausauga a Samoa.
