O le tulaga foi faapea ai ua ou lē malie i o latou uiga ia o le fai atu o lea fuafuaga tetee, tetee i le faamoemoe o le Malo e sui le itu e alu ai taavaleafi, fai atu le kasino tetee. Lea foi la ua o mai foi le palagi lea iinei o foi ‘au i le palagi ma fai i ai e sa‘o ia, e leai a ma se tāua ia te au ia na mea. Auā ana faapea e tāua ia te au, ua leva a ona tutuli e le Malo, i le taimi foi na amata mai ai solo tetee ma taulamua ai latou e solo tetee mai i le Malo. Ia ae masalo o le faletua lena o Roina, masalo ua faatāua tele e ia ona ia manatu.
Ou te lei faalogo i ai. O le a faapefea la ona fai se faaiuga ou te lei faalogo i ni ana faasalalauga? Ae o uiga ia o tagata foi e nonofo lava latou ma faatāua o latou lava manatu ona faapea ane ai lea, ai o lena. E leai ou te lei faalogo i ai, vaganā foi isi tagata na faalogo i ai fai mai lea o latou, se e lē pepē ai se imoa i manatu sa faaali. Ia o le tulaga lena. O le ā le isi ta mataupu?
Radio Samoa: Malo faafetai. O lea na e ta‘ua ma saunoa foi i le tulaga o le faipule lea o Levaolepolo Talitonu. O la e iai le faaupuga faapea, aisea na faaaogā ai e le Malo le 2 miliona e sifi ai le Fofoga o le atunuu, poo le Leitio o le atunuu e toe faaleleia ai, ae lē tapa tonu le Malo ia latou tupe ae ua faaaogā mai le tupe o le sunami. Se‘i saunoa i ai faamolemole lau afioga i le Palemia?
Palemia: Sa ou faaalia le vaivai tele o mafaufauga o le alii faipule. E manatu, e leai se sootaga o le galulolo ma le faaaogāina o le 2AP, o le tatou leitio. Ia manatua foi, soo se faalavelave a e tupu faafuasei, e tuai ona alu atu le TV, a o le leitio lava e muamua faasalalauina ia faamatalaga e faatatau i mea o faaletonu e tulai mai mo le silafia lautele e le atunuu, atoa ai ma le fofogaina o le atunuu i tulaga o fesoasoani e moomia.
Lea la na ala ai ona faaaogā le seleni lea e toe faatulaga ai pou ia o le leitio ia mamao ese mai le sami, atoa foi ma le faaleleia o fesootaiga a le SamoaTel, lea e faaaogā ai telefoni feaveai, ina ia faafaigofie ai fesootaiga tau telefoni i taimi o faalavelave, e pei la o mea nei o fesootaiga i sunami ma faalavelave faafuasei faapena.
Manatua foi o le TV e faato‘ā faasalalau lava i le po, a o le leitio e 24 itula. O le tulaga lena, ua fai si televave tele o le alii faipule, ae lē muamua tuutuu loloto lana tofā, i le vaivai tele o lona finagalo sa faaalia. A o mataupu foi nei o mataupu e avatu uma a i tai i le Palemene. Sa tatau la ona iai sona manatu tetee, ae leai se manatu tetee na faaalia.
Radio Samoa: Malo faafetai lea ua manino lea itu. Ta see atu ia i latou foi ia e to‘a 10 lea mai Bangladesh, lea na faapea na faatagaina mai e le afioga i le fofoga fetalai, Tolofuavalelei Falemoe Leiataua. O le tulaga lea e tulituli e tagata, fai mai e lei mautinoa e le Fofoga Fetalai, a o lea ua avatu le toasefulu lea, lea ua uma le ono masina e leai se mea o tupu.
A o lea ua toe foi atu le toavalu, a o fea o iai le toalua, ma le tagata lea ua toe sola mai i Ausetalia? Se‘i saunoa i le tulaga faamolemole lau afioga i le Palemia?
Palemia: Se‘i faamatala auiliili mai a le tulaga lena?
Radio Samoa: Le tulaga o tagata foi ia lea na aumai o i Bangladesh, lea na faapea na ui mai i le afioga i le Fofoga Fetalai, Tolofuaivalelei Falemoe Leiataua. Toasefulu i latou na o atu i Samoa ma le faamoemoe, o le a tatala se fale pisinisi, ia maua ai foi ni galuega.
Peitai ane, sa nonofo foi lea i le afioga a le Fofoga Fetalai, ma sa mautotogi ai ina i fale o le Fofoga Fetalai. Uma le ono masina, leai se mea ua tupu mai. Ona faapea loa lea o le finagalo o le Fofoga Fetalai, ua sili ona toe faafoi auā e leai se mea o maua mai ai.
Ua foi le toavalu, a o lena e ina le toalua. Sola le toatasi lea na autū mai ai le malaga, lea ua sola nofo i Ausetalia. Se‘i saunoa i ai poo manino i ai lau afioga le Palemia.
Palemia: O le tulaga lena, i mea o tagata faipisinisi, e lē o se mea e faaletonu lena mea. E tele a taimi e o mai ai tagata e manao e faatū ni a latou pisinisi, ia ma toe talosaga se‘i tuu atu se avanoa, aemaise a le mea o le sailiga o mea o eleele e faatu ai a latou pisinisi.
E lē o se mea fou la le mea lena o le o mai foi o tagata talosaga, ae uma ane le taimi e lei faatinoa, ia ona fai a lea i ai o le iuga e masani ona fai, o le toe auina i fafo. E leai a la se mea e fou i lalo o le lā i tulaga faapena.
E tupu foi iina i Niu Sila, i tagata foi e o atu e manao e faatū ni a latou pisinisi, ona tuu taimi lea o le latou nonofo. O le ala lena e tuu taimi ai, soo se atunuu a, e tuu taimi a le nofo, a uma ane loa lava e lei faatuina ni a latou pisinisi, ia ona fai foi lea o le faiga e masani ai, ona faatulai loa i fafo ma toe faafoi.
O ina la i Niu Sila, e iai tupe e tatau ona faaalia, pe a ova i le luaselau afe tala e tatau ona faagaoioi i totonu o le atunuu. Lea la lea sa tuuaia ai foi le toatele ua lē talafeagai le faiga, ia ona toe fetuunai ai lea, ona e iai tagata, aemaise a tagata Saina, e o ane e faaalu le luaselau. Ia e faigofie tele ona o mai faatau le fale.
Ia ona uma lea ona faatau le fale, faafou, ia ave lea i ai le sitiseni o le tulafono lena a Niu Sila. Ave lea i ai o le sitiseni ma le passport ae sue atu, ua nofo ma toe foi i fafo, ae o la ua sitiseni i Niu Sila. E leai la se tatou faiga faapena, ae tofu uma a Malo ma a latou faiga foi ina ia faatosina ai tagata ina ia o atu e teu faafaigaluega a latou seleni, ma maua ai galuega a tagata o se atunuu.
Radio Samoa: Malo faafetai. O le saunoaga a lau afioga a le Palemia, o lea ua tatala soo se atunuu e o atu i totonu o si o tatou Malo e faatu ai a latou pisinisi?
