Palemia: O le tatou maota gasegase o la e lelei. Ou te lē iloa pe na tou faalogo i le mea lea na tupu i Amerika ina ua agi le afā, ua fiu falemai i le taimi foi lea o Katrina, ua fiu falemai e faatalitali ni fomai, e leai ni fomai, a o Amerika le atunuu pito telē. E oo foi la iinā i Niu Sila ma Ausetalia, o le tele ia o tagata na e faatalitali taotoga.
Ae pei o le mea lea e tupu, e alu atu loa sina faamatalaga iinei, oso tu i lugā tatou iinā, ae lelei foi ona fai ma o ane ma mātau mea na e tutupu iinā i Niu Sila. O le tulaga lea e iai tatou falemai iinei, o lea a e lelei a tatou falemai.
O lea foi e matuā toatele a tatou fomai ia e fai a latou practise, a latou pisinisi i tua. Ae iai le mea lea e tupu ia tatou ma‘i iinei, o tatou lea ua lavea i ituaiga o ma‘i ia e ta‘ua o ma‘i lē pipisi, e mafua mai taumafa lē fetaui ona ua tele meaai lelei e maua i aso nei. O faamai na e maua i atunuu ua maoa‘e le tamaoaiga. Lea la ua mama‘i ai tatou, ma‘i fatu, toto maualuga, o le ma‘i suka.
O ma‘i fasioti tagata ma‘i na. O lea la e taumafai tatou i togafitiga o a tatou gasegase iinei, ae a oo a ina oo i se tulaga faigata, ua auina atu loa iinā.
O le ala la lea ua faataoto ai nei le polokalame a le malo lenei, ina ia uma ane le lima tausaga lenei, ua leai se ma‘i e toe avatua iinā, ae taoto uma iinei ma togafiti uma iinei ma‘i.
O lea foi ua fai a tatou aoga faafomai, e a‘oa‘o ai fomai ina ia toatele ni a tatou a fomai e atamamai ma togafiti ai a tatou ma‘i iinei. O le tali atu lena i le tulaga lena e lagā mai.
Radio Samoa: O le a ta see atu i Iapani. O le 13 o students ia lea ua aumai i Iapani lea ua toe foi atu i Samoa. O le ā se tulaga o tagatagai i ai, pe toe faaauauina a latou suesuega i Samoa, pe o le a toe auina atu i nisi atunuu e toe faaauau a latou suesuega?
Palemia: E lē mafai ona faaauauina seiloga e kilia mai e Iapani ua saogalemu le ea, ona o mea ia o le pefu o meatau matautia e salalau i luga o le ea, ona feula lea e le matagi, ona salalau ai pea lea ma alu ifo pa‘ūū i luga o vai. Ona aafia ai foi lea ma tagata e taumamafa i le vai. E pa‘ūū i luga o faatoaga kapisi, mama‘i ai ma tagata.
E lē sina ma‘i e ma‘i ona uma lea, a o le ma‘i lea e lavea loa oti. O le tulaga la i ai, e leai se avanoa e toe tuua e a‘u o le taitai o le malo, e tatau loa ona tuu uma i luga o le vaalele ma faafelelei mai iinei i le mea o iai le parataiso, o loo manino le ea.
E leai se mea e popole ai, o lea a e fai ma ave le ea e fua i uta i le tatou fale suesue. O lea foi e ave ma le tatou vai e fai ma sue, pe lei oo mai a ni pefu atomita iinei i Samoa, ae o lea a e manaia le mea e lē o afaina.
Radio Samoa: O le a toe faaauauina la iinā i le iunivesite a Samoa a‘oa‘oga a le toa 13 o students ia ua toe foi atu ia tatou?
Palemia: E leai, e lē mafai ona faaauauina, se‘i omai e mālōlō lelei. E lē mafai ona soosoo atu iinei a latou mea na a‘oa‘o i Iapani. Afai loa e kilia mai e Iapani, ona toe faalele a lea i Iapani e toe faaauau ai a latou aoga.
Sa iai foi le mea na tupu faapena ina ua osofai e Speight lo latou malo, na faalele uma mai a tatou tamafanau mai Fiti ma aumai faanonofo iinei.
Atoa ai le tausaga atoa o faatali se‘i toe amata le isi tausaga ina ua saogalemu le malo o Fiti. E toe maua pea taimi e aoga ai, ae lē maua le ola. E tasi a le ola, a faaletonu loa le ola ua feoti, ia o mea na sa logo manino ai mātua.
Radio Samoa: Faaiuina le ta talanoaga, i le tulai mai o le Tautua Party. O le ā sou finagalo, ua atoa lou fiafia ua iai se party e agaia le malo, ma le agaga faaaloalo?
Palemia: Ioe, la ua uma ona ou fautua foi i ai, e fai sa latou shadow cabinet. O le kapeneta lea faaleoleo e totofi i ai ni minisita. A oo i le taimi e fai ai fono a le Kapeneta, ona tu mai a lea o le minisita faaolioli o le falemai, talanoa mai i mea tau falemai, e malamalama lelei i mea tau faafomai, faafitauli o tutupu ai, ona tali atu foi lea o le minisita ii. Nai lo le mea lea tupu nei, e tui le loli, tui le sea.
E tulai mai a le isi e telē le malamalama, ae tu mai ai ma isi na o le tele o le vevesi e tulai mai ai, auā e lē mafai ona matou nofonofo pe a matou faalogo atu ua amata ona sau le otaota. Ia e tatau loa ona matou tutulai atu ma faasa‘osa‘o mataupu faapenei i lalo o le aiā tatau e faasa‘o ai se mea faaletonu i le fetufaaiga o finagalo i totonu o le Maota. Ae o le itu la lena ua matuā fiafia tele ina ua tulai mai se Itu Agai.
O le faamoemoe lava o le tumau pea, ina ne‘i te‘i foi ua faifai toe pisa. Ae o lenei taimi e momoli atu le faamalo i le tulaga o le valaau mai pea e tatou talatalanoa. Ae māta‘itu foi tala eseese e alu atu, e faavae ai fesili e tuuina mai ia tatou polokalame i Aso Lulu uma, ona e tāua tele la outou tautua mo le faalauiloa atu o faamatalaga o mea tutupu i le tatou malo.
A o lenei taimi, ia faasoifuaina le mamalu o le atunuu o loo faafogafoga mai i le tatou faasoa i lenei itula afiafi, Soifua ma ia manuia.
