Radio Samoa: Faafeiloai atu i le agaga faaaloalo i lau afioga i le Palemia, lau susuga Tuilaepa Sailele Malielegaoi. Malo le soifua manuia!
Palemia: I lenei itula afiafi i le valaau mai. Atonu foi o loo faafogafoga le mamalu o le tatou atunuu i talanoaga faifai pea ma outou i le leitio. Faamalo le tauatai. Faafetai foi le agaga tauatia‘e pea i le faaauau o le outou galuega o le faasalalau i le mamalu o le atunuu, i tulaga foi e pei ona lagalagā mai lea taimi i lea taimi.
Radio Samoa: O le ta mataupu, o lea na māua sa asiasi atu le Minisita o le Va i Fafo o Niu Sila, Murray McCully. O le ā le autū o lea asiasiga, faamolemole saunoa i ai lau afioga i le Palemia?
Palemia: O le faaauauina lea o feiloaiga faaminisita i le va o lo tatou malo ma le malo Niu Sila. E tele a mataupu sa faatalanoaina, aemaise a le tulaga o le aofai o o tatou tagata e faimalaga atu i Niu Sila ma nofomau ai.
I le tulaga faigata ona faatinoina le atoatoa o le aofai o tagata e tatau ona faimalaga atu i tausaga taitasi i lenei foi vaitau ona o le faigata i le tulaga o galuega e tatau ona faamaonia ma faatumauina mo le faafaigaluegaina ai o o tatou tagata. Tele a mataupu sa talanoaina, e aofia ai ma le tulaga o o tatou tagata o loo malaga atu e tau apu, ma galulue i isi faatoaga i Niu Sila.
O le mataupu tonu lea sa matou talanoa ai. Sa mafai foi ona malaga mai ma le susuga ia Su‘a Viliamu, e auai i le Itu agai, ma aumai foi sona sao i tulaga o le faatinoga o ia foi aiaiga i le va o Niu Sila ma Samoa.
O le feiloaiga la lenei e masani ona faia tai lua tausaga ma faatino e lagalaga ai mataupu e lē gata o Niu Sila ia tatou, ae faapea foi tatou ia Niu Sila. O le isi la itu tāua, o tapenaga ia mo le agai atu i le tausaga fou, i le sami ai o le 50 tausaga o le tatou Malo Tutoatasi ma le feagaiga o fefaauoaiga ma le Malo Niu Sila, e atoa ai foi le 50 tausaga i le tausaga fou. O itu tāua la ia sa matou talatalanoa i ai, e aofia ai foi ma le faamamaluina o vaega ia o le tatou feumiaiga o le va o Samoa ma Niu Sila.
Radio Samoa: O lea ua māua foi, o le tatou fale eletise lea faapea ua fausia i se pitonuu o Samoa poo Aleisa, e tusa lona talu ma le 100 miliona. Ou te talitonu ua avea foi lea ma faafiafiaga foi lea mo tagata soifua o le afioaga o Tanugamanono mo le latou soifua maloloina, aemaise foi le pa‘ō lea mo i latou. E lē o mautinoa lelei e matou le pitonuu lea e faatu ai le fale lea, faamolemole.
Palemia: O loo faatuina le fale lea i uta i Fiaga i Aleisa. E fai a si maouta mai le alatele. O le faamoemoe la ona o nei foi masini e fai si pa‘ō pe a oo i le taimi e vili ai mo le eletise.
O le isi itu tāua i le atina‘e lenei, o lea e faaaogā ai afi o le a lē toe faaaogā ai suauu kiso mamā, ae mafai ona faaaogā ai suauu kiso ia e faaaogā e vaa, e taugofie mamao atu lena nai lo le kiso mamā lea e faaaogā ai. O le tulaga tāua la lena, e lē gata i le taofia ai o le pa‘ō ae o le taofia ai foi o le soona faaaogā o kiso taugata, ae o lea e mafai ona faaaogā ai le kiso taugofie.
E lelei foi ona silafia, o le tatou 100 miliona tala Amerika le tau, o loo faatupeina e se vaega tupe mai Iapani faapea foi ma Ausetalia, ma le nonoga tupe māmā tuutuuga ma aiaiga o le toe totogiina mai le faletupe o Asia. O vaega tetele la na e tolu na sau ai le 100 miliona tala Amerika mo lenei atina‘e tele, ma le faamoemoe e faigofie ai ona foia le faafitauli na tulai mai, o le lē lava o le eletise.
Radio Samoa: O le mitamitaga lava o agaga ma finagalo o le tatou atunuu, o lea foi ua māua ua tatala foi se tasi o falemai, aemaise foi le matagaluega o le ofisa o le soifua maloloina iinā i Motootua. Ae avatu foi le faafetai ma le faamalo i le kamupani Shanghai Construction foi lele mai Saina, o le latou faatupeina foi o lea tulaga, aemaise o lena foi ua toe sauni atu mo le isi fausaga o se isi falemai fou, auā lava le alu i luma o i o tatou atunuu, e tusa lona tau ma le 66 miliona tala Samoa.
Ae o le maota lea ua tuu i lalo, e pei o le maota lea ua tusa ma le 100 tausaga pe ā, o le taimi lea o loo pulea tatou e Siamani. Aemaise foi le tau o loo faapena ona silafia atu e le atunuu, e tusa ma le 30 miliona. Se‘i aunoa i ai lau afioga Tuilaepa?
Palemia: O le tulaga lena e pei ona e aumaia. O le fale tuai lea e tatau ona aveese, ona o le tulaga tonu lea o le falemai fou, e lilifa i le itu o a‘oa‘oga ma o i foi le nofoaga o le tatou iunivesite ua faapitoa mo le a‘oa‘oina o fomai, ua tatau la ona aveese.
Peitai e iai nisi o alii Palagi ua talosaga mai, pe mafai ona tuu atu se avanoa ia latou, latou te saili tupe ai mo le puipuia o le fale lea, ona ua tau leai ni fale tuai o fausaga i aso o Siamani. O le tulaga foi lele i le toe tepa i tua ma faatāua nisi o mea sa faaaogā i na taimi i le faiga malo a Siamani. Ua ave la le avanoa ia i latou nei e tuu e o ai e saili seleni.
A maua i totonu o le masina fou, ia ua lelei, ona tala faalelei lea o vaega o le fale, ma sii loa i le isi itu auala, faafeagai ma le fale lenei i le isi itu auala, o loo iai pea avanoa e mafai ona faatu ai mo i latou ia o loo faatāua e latou le puipuia pea o fale tuai. Ae a leai , o le tulaga foi la lena e tatau loa ona faaalu masini e tuu ai lalo le fale, ae amata loa le galuega ua leva ona taupoina.
Radio Samoa: O lea ua māua mai le falepuipui i Vaiaata i le motu tele i Salavai. O lea ua toe faaleleia uma lava ia tulaga uma. O le ā se finagalo o lau afioga i le Palemia? Ua lē avea lea ma mea o le a fiafia ai i latou, a mae‘a a ona tuli le faasalaga, ia o i tua toe o mai, pei a o la e nonofo i le faletalimalo. Ae pei sa sili a ona tuu ai pea ia lagona e i latou le agaga o le salamō. Se‘i saunoa i ai lau afioga i le Palemia?
Palemia: Ia ona o nei aso foi o loo tele foi tusitusiga, aemaise a Amerika e agai tonu mai e faitioina ai a tatou falepuipui. Ia ua lē mafai ona aveese ai le agaga, e lelei ia ona tali atu loa ia Amerika i le tele o le nofo faitio mai, ae aveese loa le mea lea e masani ona faitio mai ai. Lona uiga faaleleia atoa fale, e ui lava o latou o pagota, ia ae iai foi le latou mitamitaga i o latou tagata, o latou foi o isi tagata soifua, na fausia i le faatusa o lo tatou Matai sili.
O le tali puupuu atu lena, ae sa oo a foi i ai la‘u tautalaga i le taeao na faamamalu ai, i le puipuia o itu ia, e avea ai se pagota ma tagata foi lea, ua fiafia e nofomau i totonu o le falepuipui, ona alu atu ai lea i tua ma toe fai foi isi solitulafono ina ia vave ai ona toe sau i totonu.
Radio Samoa: O lea e māua pei o le lua vaiaso talu ai sa usuai ai foi le fono tele e pei ona talatalanoaina i fonotaga a minisita o tupe o le Forum e pei ona usuia ai i Apia. Pe mafai ona faalautele mai e lau afioga i le Palemia lea tulaga faamolemole?
Palemia: E fai si tele o fono sa usuia i Apia i Samoa nei i le la vaiaso. O le fono lea sa e ta‘ua o minisita o atinae ma mea tau tupe, o le faalapotopotoga o Malo Tutoatasi i totonu o le Pasefika, se‘i vagana ai Fiti. O se itu tāua lava fonotaga nei e talatalanoa ai i le aoao tele o loo iai le tamaoaiga o o lea malo ma lea malo, aemaise foi fuafuaga mamao e tatau ona faataotooto mo le faatelevaveina o le atina‘e o atunuu uma o le Pasefika. I le tele lava la o faatalanoaga e peiseai o le itu a lea e faatāuaina ina ia televave ai le atinae o le taumafai lea o taitai e faatino mea o faiga faavae e foliga e faigata ae tatau ona latou aua ne‘i fefe taitai e faatino, aiaiga ia ma faiga faavae e ola ai le tamaoaiga.
O fesili la i le aoao tetele, o ā isi taitaiga tāua e faatino ai itu ia? O le tali, o mea o tulafono e afua ai le faaupuga o good governance poo pulega a malo lelei. Ma e lua a itu tetele o aiaiga tāua o good governance, ia aua ne‘i toe iai ni mea faanunununu a ia faamanino mea uma, ma aua ne‘i toe maua ni avanoa e tulai mai ai ni faiga faaalatua. Ma le vaega lona lua, ia faafaigofie ona faataoto taiala e iloagofie ai lea tagata ma le faatinoga o a latou galuegafai.
I le faatinoga la o ia foi faiga tetele, o le mafuaaga foi lea e ala ai ona tauaofo galuega uma a le tatou Malo, aua ne‘i toe tuusa‘oa ae tauofo, ona tauva mai lea i iai o pisinisi eseese ua agavaa e faatino. O i la e maua ai le tau taugofie ma faafaigofie ai foi galuegafai nai lo le taoto i se faiga faalēiloga, o inā tonu a e saofagā ai faiga piopio.
Mo sina faataitaiga e faigofie a ona e alu aumai au uo, e faatinoina le galuega, pe afai e lē faamalosia le tulaga lea o le faasalalau o galuega a le Malo e faatauofo. O le isi la itu tāua i le faatinoga o aiaiga tetele nei, o le tapenaina lea o lipoti. O lipoti e tatau ona tuuina atu i le Palemene e iloa ai le mea ua taunuu i ai galuega a lea faalapotopotoga ma lea faalapotopotoga, faapea foi ma matagaluega. O itu lavelave ia sa faatalanoaina ma o le mea moni a, o aiaiga tetele na o lea foi e faatino ai a tatou foi pulega malo.
Radio Samoa: O ni lipoti mai foi Samoa i le atunuu o loo ta’ua ai le toatele o nai alo ma fanau aoga mai le iunivesite ua toe faamaamulu ua lē mafai ona faaauauina aoga, ona o le faigata tele le tulaga ua oo i ai mataupu, aemaise lava le mataupu o le numera.
Ma e foliga o le pogai ma le autū ona o le a‘oa‘oina o le gagana i le gagana peretania. Faamata o iai se finagalo ma se fuafuaga a le matagaluega ae a pe a faaaogāina le gagana Samoa? Faamolemole lau afioga i le Palemia?
Palemia: Manatua foi o le tele a o nei mea, e oo a i le gagana Peretania e lē faapea o toe lē malamalama ai tatou. Masalo e sili atu ona malamalama lea tupulaga lea ua iai nei i le gagana Peretania nai lo nisi a tupulaga i aso ua tuanai. O se manatu vaivai tele la lea manatu e lē mafai ona malamalama i le gagana Peretania. Ma o le gagana Peretania lea o loo faatino ai faaupuga o le tele o matata o loo faatinoina nei. E faatusa a i o tatou foi ia taimi a o tatou aooga, e matuā masau tele a nanu ia e nanu ai le taimi nei. O le tele a o taimi e faalogo atu, o la e faaperetania uma a talanoaga a tamaiti aoga, e lē o toe faa-Samoa se isi. O le ala lena o lea ou te faapea atu ai, o se manatu vaivai tele lea manatu faapea o le gagana lea e faigata ai aoaoga a tamafanau.
Radio Samoa: O lea foi na māua faapea na asiasi atu le failautusi o Malo a le Taupulega, le susuga ia Camnish Shamar? O le ā le autū o lea faigamalaga?
Palemia: Ua leva ona fia asiasi mai lenei alii. Sa taumafai i le tausaga lea na tea nei e sau e fia feiloai mai ia te au, ona ou fai atu lea i ai, ou te lē o avanoa. E leai foi se mea e te tau sau ai, o lea foi e lē o toe umi ona fai lea o le fonotaga foi a malo o le Pasefika le Forum, ona maua ai lea o le avanoa ta te talanoa ai. Peitai ane e lei mafai ona oo atu lea alii, la la faatoa mafai ona oo mai le tausaga nei, ma fai a ma talanoaga foi i nisi o mataupu. Aemaise lava i le tulaga o fesoasoani, e auala e mafai ai ona fesoasoani mai Malo o le Taupulega ia Samoa. O tatou foi o loo totogi a tatou seleni o le sao i tupe faavae a le Faalapotopotoga, ma o Samoa le isi atunuu o loo tumau pea le vave totogi o ana saofaga. O le mea la lena na oo mai ai le alii failautusi aoao ma te feiloai, aemaise foi le tapenaga mo le fonota tele lea, e faia i Ausetalia i le masina o Oketopa. O le masina o Setema e faatino ai le fonotaga mai le aso 6 i le aso 9 i Niu Sila a taitai o Malo, ae o Oketopa e faatino ai le fonotaga a taitai o Malo o le Taupulega e faia lea i le aai tele o Perth i le itu i Sisifo o le malo Ausetalia.
Radio Samoa: O lea ua māua ua tatala i le masina talu ai se tasi o ofisa o leoleo i le aifoaga o Afega. Pe a o le a faaitiitia ai soligatulafono ina ua faatuina foi se tasi o ofisa o leoleo i le afioaga o Afega?
Palemia: O le uiga a ia o fuafuaga o atinae a le tatou ofisa o leoleo. E iai foi la le ofisa o leoleo lea e iai e tusa ma le 200 iata mai le mea o loo o‘u iai i uta i le malae taalo foi lea i Faleata. Talu ona tulai mai le ofisa o leoleo iinā, ua lē o toe faalogo i ni faaumu o nisi foi o onanā e omai inu nofonofo pogisa a latou pia iinā i le nofoaga la o taaloga. Ma o le tele lava foi o faafitauli ma faalavelave e tulai mai le matou pitonuu ma lenei laueleele tele, ua faigofie a na ona valaau atu a, e lē umi ae tu le taavale a leoleo. E faigata tele le toe oso mai mamao mai tai, ae o le agaga lena, ia faatele ni ofisa tu tu solo, e faigofie ai ona faatino la latou galuega.
Radio Samoa: E momoli le faafetai tele ia Ausetala ma Niu Sila, vaeane le faafofoga a le mamalu o le atunuu aemaise foi lau afioga i le Palemia, ona ua faapena ona ofoina ni taifau se lua. O le tulaga ua leva ona tatau ona iai, aemaise foi o le asiasi atu a i latou o feaveaiina le maruana ma fualaau faasāina. Ae talitonu lau afioga i le Palemia, e lē o lava taifau ia e lua. O iai se faamoemoe e saili nisi e toe a‘oa‘oina nisi taifau ina ia faalava auā foi uafu faavaomalo mo le saogalemu o le feaveaiga o fualaau faasāina?
Palemia: O loo iai isi taifau e tolu o loo fuafua e toe auina mai. O le itu pito sili ona tāua, o lea e fautuaina ai foi le matagaluega o leoleo, aua foi le tuua le tulituliloa o le faatalanoa o Ausetalia pe lē mafai ona taatia ai le tulaga o le tiute o le a‘oa‘oina o taifau nei, e faatino a latou galuega, e faatino i Samoa nei ia foi ituaiga o a‘oa‘oga. O la ua lafo atu lava se‘i faatalatalanoa e le tatou vaega ma Ausetalia. E lē o se mea faigofie lea tulaga. Ae o loo faagasolo pea galuega faaleoleo. O le aogā o taifau nei, e lē toe tau tigaina ai leoleo e tau sueni ni atopa‘u mo tagata asiasi maimoa. E faigofie a ona alu atu le taifau ma sosogi solo atu i fafo. Ia a tu loa le taifau i le ato, o inā e iloa ai o totonu o le ato lena o loo iai ni maruana. O le tulaga tāua lena o lenei polokalame. Ia ou te manatu ua vela foi le fala i le tele o fesili ua tuuina mai, ma le faamoemoe ua faafaigofie ona faamanino atu, i nisi foi o mataupu e pei ona lagā ma silafia ai e le tatou atunuu gaioiga talafeagai o loo fai e lo tatou malo. Ae i lenei taimi, ia faasoifuaina lava le mamalu o lo tatou atunuu ma le tapuaiga. Soifua ia ma ia manuia.
