Radio Samoa: Lau afioga le Palemia Tuilaepa, faafetai tele lava mo lenei foi avanoa matagofie ua toe faaauau ai pea la tatou talanoaga masani.
E talitonu o lea ua toe taliu atu le faigamalaga, ia e pei ona toesea ai i si o tatou atunuu, ma misi ai foi a tatou faatalanoaga i nisi foi o taimi. Ia ae malo lava le malaga manuia i lau afioga i le Palemia.
Ae o le a tuu atu ia lenei avanoa lau Afioga Tuilaepa, poo le ā foi se isi vaega tāua e mafai ona tatai i ai le ta talanoaga, ia pe manaia foi le ta amata mai, e pei ona iai nai mataupu tāua foi sa mafai ona talanoaina i le tou fonotaga, e pei ona sa e auai atu i ai, ma le faaaloalo, Tuilaepa?
Palemia: Faafetai. O le fonotaga lea sa auai, o le fonotaga lona lua a Malo Tauatia‘e, e ta‘i sefulu tausaga ma fai.
E faataoto ai polokalame mo le atiina a‘e o atunuu tauatia‘e, poo atunuu ia LPCs, matitiva, ina ia fuafua i totonu o le isi sefulu tausaga o loo lumanai nei, ona faasee ese mai lea mai le lisi o atunuu pito matitiva o le lalolagi. Manatua la o tatou lea ua alu ese ai.
O le e faato‘ā amata faamamalu tatou i le 2014. Sa pasia ina ia faamamalu i le 2010, le tausaga lea na tea nei. Peitai ane ua feagai tatou ma le tele foi o faatamaiaga e le sunami na oso, o le ala lena na toe tolo atu ai i tua le faatinoina loa o le tatou avea ma malo ua lē o toe ta‘ua o se malo mativa.
O le tulaga la lena o le fonotaga lea sa faia, e agai sa‘o lava i le taumafai lea i atunuu matitiva ina ia faataoto a latou taiala mo le faaleleia o le soifua o tagata lautele, ina ia siitia atili ai le tulaga o le atunuu atoa, ma lē toe ta‘ua ai lena atunuu o se atunuu mativa.
O le tulaga la lena o lea sa faatalanoaina, e aofia ai foi ma le tu‘itu‘i pea i atunuu e malolosi lo latou tamaoaiga, aua ne‘i taofia fesoasoani e ave i atunuu e leaga tele lo latou tamaoaiga, ina ia fesoasoani atili ai i atina‘e tetele e faatino. O le tali atu lena e tusa ai ma le fesili.
Radio Samoa: Tuilaepa, o afea tonu lava la lea ua taoto ai le tulaga lea, e faapena ona aveese ai i tatou mai atunuu matitiva, faamolemole.
Palemia: O le aso muamua o Ianuari i le 2014.
Radio Samoa: Ta see mai le tulaga e pei ona iai lenei foi vaiaso i tusitusiga faapea, ua siisii le ola mativa o lo tatou atunuu o Samoa i le 4%. E mafai ona e tau faalautele faamolemole Tuilaepa lea vaega?
Palemia: E iai lava le fua e faaaogā e mea nei o malo tetele. O le tulaga lena o le mativa, e lē o le mativa foi lea fia‘ai, a o le mativa lena e faaaogā, pei o le mativa e fia tele ni tupe.
Ae lē o manino foi la le faatinoina o le fuataga lena, ona o le faatinoga o nei suesuega, e faatino foi lea e tagata e o e fesili i aiga, ia ona fausia ai lea o mea faapena e faigata tele ona talitonuina.
Auā e te alu ma pepa, auā o fesili ia e fai i le tagata, ‘Se‘i tusitusi mai ā poo le ā le tupe sa maua e le tou aiga i le la vaiaso? O fea sa maua mai ai le seleni? E faapefea ona faaalu?
O lona uiga o le toatele a o tatou e lē tusitusia ni tupe e faaalu. Ia a e tusi a la i lalo, aemaise a o ituaiga o tali faapenei e aumai e aiga taitasi, ona faavae ai lea o ni faamatalaga, ia a alu atu a e musu le loomatua e ta‘u mai ia te oe le sa‘o, pe tau mate uma a mea uma, o le faalavelave lena o lea e tupu nei i le tele o nei suesuega e fai.
E faigata tele ona faamaonia ni mea faapena, auā o lea a e iloa lelei, e leai ni tagata feoti i le fia aai, na o tagata mama‘i i le tele o meaai, aemaise o gasegase ia e avatu nei o tatou tagata i fafo e togafiti ai, o gasegase o atunuu maoae le tamaoaiga, e pei o le gasegase o le fatu, o le toto maualuga, o le puputa o tagata, o tulaga faapena foi lea e masani ona lavevea ai tatou, aemaise o le ma‘i suka, ona o le tele o taumafa lelei o loo tausami e o tatou tagata.
O le tulaga la lena e faigata tele ona talitonuina nei mea o fai nei, ia manatu ona o lipoti e faavae i luga o lou alu foi lea fesilisili i aiga poo ā latou meaai sa ‘ai i le vaiaso atoa, ae fia le tupe na alu ai, o ā tupe sa faaalu i le taulaga, o ā tupe sa faaalu i le alofa, ia ma isi a mau fesili e tele.
Radio Samoa: Lelei, ae o le tulaga la o loo iai lo tatou atunuu o Samoa, o loo tumau pea lona tamaoaiga i se tulaga lelei, aemaise foi o ona atina‘e?
Palemia: O le anoano ia o nei mea e fai nei, ma le anoano o mau meaai, na o le mama‘i o tagata ma tala‘u atu iinā e mama‘i i le tele o meaai.
Radio Samoa: O le a ta see mai i le suiga o aso o le ta atunuu o Samoa, ia lea foi o loo faapena ona lagalagā ai foi finagalo o nisi o le tatou atunuu, e fiafia i ai, a o nisi e lē fiafia i ai.
Le suiga foi lea faapea o le a tutusa ai tatou ma Niu Sila nei, ma Ausetalia ma lo tatou atunuu o Samoa. Fai mai a nisi, aisea lava ua fai ai lenei suiga, Tuilaepa?
Palemia: O le tāua o le suiga lena, ia aua ai ne‘i toe fesuisuiai ma feteenai le faitauga o aso. O le mea lena sa tatou iai muamua.
O lona uiga, afai a e Aso Sa tatou, Aso Sa faatasi ma Niu Sila ma Ausetalia. Pau o le mea o le eseese o itula, afai o lea e ta le 7 iinei, ae o lena faato‘ā ta le 6 iinā. Na pau la lena o le taimi e eseese ai, ae ia tutusa pea aso e pei ona sa iai e tau mai le 1892, na sui ai lea iinā e le tagata faipisinisi na sau mai Tutuila i le tatou aso, ae la e tatau a ona tumau pea tatou i le mea sa iai.
Radio Samoa: O lona uiga la o lea o le a eseese tatou ma Amerika Samoa?
Palemia: Eseese tatou ma Amerika Samoa. A o le itu pito sili ona tāua, o le itu foi lea e ta‘u mai i le aiga iinei i le Aso Sa, o le Aso Lulu lena e fai ai le oti iinā, e tatau ona o atu tagata i le oti.
Lona uiga la, e ta‘u mai i le Aso Sa, a o lea e tanu i le Aso Lulu, e tatau la ona faapea, e tasi le aso lena ua puupuu ai le taimi. Ua lusi le aso e tasi, auā o le Aso Gafua iinā, a o lea ua Aso Sa iinei.
O lona uiga la, e tatau ona alu atu i le Aso Gafua, o le Aso Lua lena iinā, auā a tuai loa ona alu atu, ua leai se avanoa.
O le faigata o le mea, o le tau sue o le avanoa i le vaalele, tau sue le visa e alu atu ai, tau sue le tupe e pasese atu ai, tau sue le ietoga e alu atu ma avatu, ua e maua mai? tau sue ma le avanoa e alu atu i le vaalele.
E lē toe tupu la se mea telē faapena, pe a faapea o le a tasi a le aso e tutusa tatou ma inā.
Radio Samoa: E maitau atu o lea e pei e lagolago e Faleomavaega o Amerika Samoa le suiga, e ui ua leva ona tutusa tatou ma Amerika Samoa ma Amerika, peitai o lea pei e maitau atu e lagolago e Faleomavaega o Amerika le suiga lea o aso i le tatou atunuu, Tuilaepa?
Palemia: O la e iloa e latou, e valea tele lea mea o le fesuisuiai o aso a o Tonga la e i le itu i Saute o tatou, ia o lena e tutusa lelei a le mea e iai Samoa ma Tonga, ae o lea e Aso Gafua Tonga ae Aso Sa tatou. E lē fetaui.
Radio Samoa: Se‘i o ta toe see mai lava lau afioga Tuilaepa i le tulaga lea o le faigamalaga. Ina ua taliu atu le faigamalaga foi a lau afioga i le Palemia, sa faapena foi ona lāgā ai se mataupu e faatatau ia Bainimarama, poo le ā sou finagalo i lea vaega? Sa faaalia ai sou finagalo faalauaitele i le mataupu ua oia ai le lotoifale o upufai o malo i le va o Tonga ma Fiti ona o se tasi o taitai o le aufitafita a Fiti na sola ese?
Palemia: O le ā le mea lena sa tou maua iinā?
Radio Samoa: E faapena i nai au saunoaga sa lua talatalanoa ai ma Bainimarama, ia ma ta‘ua ai le globing warming poo vaega faapena. Pe mafai ona e tau faalautele lea vaega, ma le faaaloalo?
Palemia: O le mea lea e tupu i Fiti ma Tonga, o lena e ta‘u mai e le Palemia o Tonga, sa maua e latou se faasilasilaga, o loo faaletonu le saogalemu o le alii o Mara, ai sa alu e fagota, ae fetaui tonu lava ma le iai o le latou vaa iinā, o lena la sa alu ane ma laveai, ma ave ai i o i Tonga.
Ae toatamai ai le alii o Bainimarama, ma faapea ane, ua solitulafono Tonga ona ua laasia ona ogasami, e aunoa ma se faatagaga.
E avane la faatasi ai ma le aveina faamalosi o Mara, ae o lea e iai faamasinoga e tatau ona faatino. O le faamatalaga la a Tonga, o le latou a vaa sa alu e fai ana gaioiga o le leoina o le sami, ae te‘i ua tau atu ai o tupu le faalavelave o moomia ai e le Fiti lea se fesoasoani.
O lona uiga la i tulaga faapea, e lē o se mea la e tatau ai ona pisa. E lē tatau la ona tulai mai se tulaga e pisa ai.
O le mea e tatau ona fai, o le tuu ai pea le tamaloa ia, o la foi ua ave e Tonga, ia ona ua pau a.
O le tele foi o mea o le fesuiaiga o le tau i nei aso, e lē o se mea e fou le mea lea o le alu e tagata e fagota ae tutupu ai faalavelave, o le mea tuai a.
O le mea la e tatau ona fai e Bainimarama, afai e fia maua sina avanoa e talanoa ai ma Mara, ia ua tatau foi ona alu ia e fagota, a alu atu foi lavelavea ai i le sami, ia piki ai e le vaa o Tonga, ona avane lea talatalanoa ai laua i o, ma maua ai le tonu sa‘o, nai lo le pisa foi lea pei ni mea a tamaiti ia e faatiga fofoga i le matamata atu a papalagi. Ia o le tulaga lena.
Radio Samoa: Lea sa e saunoa, e tatau ia Bainimarama ona vave faafoi upufai a lona malo i pulega faatemokarasi?
Palemia: Ioe, e lelei le alu i o e talatalanoa ma le Tupu Tonga ma lana taitaiau lena, e lelei e foi mai ai ua atamai, ma malamalama atili ai i le tulaga o pulega a malo faatemokalasi.
Ae o le mea lea ua tupu, o lena ua toe fetauai ia tama autū. Latou uma a na sa auaufau faatasi, ia lena ua amata ona toe liliu ane Bainimarama ma toe taloka uma.
Radio Samoa: Faafetai Tuilaepa. Se‘i o ta talanoa lava a o faafofoga le tatou atunuu, i lenei foi mataupu ua lē o toe po se lilo i le faafofogaaga a le tatou atunuu, ia ae ua mafai lava ona aumai i lenei afiafi, poo le ā lava se manino i le faafofogaaga a le tatou atunuu, i le va lea o lau afioga i le Palemia, aemaise foi le alii tusitala mai Niu Sila, le susuga ia John Campbell, e pei ona māua foi ia tatou tala i le asō, e pei ona faaupu faapea, ‘Ua lagona e le Malo Samoa le lē fiafia ma le faanoanoa, i le faaiuga a le Pulega o Faasalalauga a Niu Sila, e pei ona lē talia ai le faaseā foi a le tatou atunuu e faasaga ia John Campbell?
Palemia: E lē o tali mai le BSA i mataupu ia laga atu e le Loia Sili. E lē o tali mai la iai. Ma e iai a le manatu lena, e lē o lelei ona fai le latou galuega.
E lē mafai ona tuumāmāina ona o le tele o faaupuga ia sa fai, o ni faaupuga faavalevalea, e atagia ai, e sa‘o ia ae sese Niu Sila ma Ausetalia ma le Malo lea e faasilasila atu, o lea o loo faatino lelei a galuega a le tatou malo. Aemaise o la e tutū fale na fausia, lale ua taoto auala na fausia, la ua tutū pou molī sa toso ai le eletise.
A lea fai mai e leai ni mea na faia, o lea e maumau tupe na aumai. Ia na o le sefulu ma ona tupu a miliona tala na aumai e Niu Sila. Ae i le taimi lea sa fai ai le lipoti, ua ova mamao i luga i le tolusefulu ma ona tupu miliona tala.
O ala la lena e lē mafai ona tuu filemuina ai e le Malo, o loo tilotilo la i ai le Loia Sili, i le tulaga o le ave loa i luga i le Faamasinoga o Talosaga e toe iloilo ai le mataupu.
O le mafuaaga e tāua tele ai le mea lea, e lē tatau i se tusitala ona sau ona fai lea o ni faamatalaga e foliga e lē sa‘o, ae lē o lava lana suesuega, aemaise o lena e avatu uma faamatalaga i le lipoti na alu atu ma ia.
O lea foi la ua uma ona tauamō atu e sau ma te o e faatilotilo mata i galuega sa fai, ae o lena e musu e sau. Na o le pau a le mea lea na manao ai, o le faatalanoa o a‘u i le pogisa, lea sa ou fai atu, ‘leai ta te lē talanoa, ta te o muamua a e ave oe e faamatamata i galuega ia sa fai.’
O le tulaga la lena o lea e oo mai nei, o lena e musu e sau e faatino le mea lea ou te manao i ai, auā o la na te iloa, e maua iinā le sa‘o ma maua iinā le pepelo o ana lipoti ia sa fai.
O lea foi ua uma ona tautino e le malo o Ausetalia ma Niu Sila, e latou minisita, o latou ia ua lava ma totoe i le latou vaai i galuega ia e fai, ua matuā talitonuina ai i latou i le faaaogāina e le malo o tupe ia na aumai.
O le tulaga la lena e aliali mai, e lē o lelei ona fai le galuega a le itutino lea a le malo, o loo nafa ma le faasa‘osa‘oina o mo mea o tusitala i le fai o a latou lipoti e lē sa‘osa‘o.
O le alii foi lena o lea e tele a ina matuā faitioina e Niu Sila i le tele o ana lipoti sese ia e fai, e lē o se mea e fou nei.
Radio Samoa: O sau saunoaga, i le tulaga lea e pei ona iai le latou saunoaga, i le pulega a le BSA a Niu Sila, fai mai, sa tele lava le avanoa e tuu atu i lau afioga i le Palemia e tatau ona tali ai, aemaise foi ua ioe le latou pulega i le faasalalauga o le lipoti ona mafai ona taitaia……
Palemia: Na ua uma ona avatu uma a ia tali. Na e avatu uma a tali ia latou, ae lē o agai i ai o latou mafaufauga.
Radio Samoa: Se‘i mafai lava ona fai mai sau saunoaga Tuilaepa, e pei ona iai foi nisi o finagalo ae lē gata foi i lea o le Pulega foi i so latou finagalo fai mai, sa tatau lava ona e tali i le aso lea ia Campbell e pei ona agai atu ai?
Palemia: O lena e sese.
O lena e sese auā na avatu lelei a i ai, o lena na tilotilo i ai, i la‘u tusi na avatu i ai, e lē mafai ona ma talanoa i le pogisa. O lena na avatu i ai la‘u tusi, e ta te o muamua a i tuā e matamata i mea uma ia na fai, ona ta o mai loa lea ta talanoa.
O lea mea lena e aliali mai, e e oo foi ia latou e lē malamalama, e lē faia ni mea faalemalo i se pogisa.
Radio Samoa: Lea la ua latou saunoa faapea o le latou mau, e lē mafai ona oo i ai lo latou malosi, e pei ona iai le mau o loo mafai ona faatūtū atu ai poo le tulaga foi o le apili….
Palemia: O le tulaga lena o lea e mafua ai ona toe ave e le Malo i luga i se itutino o le malo e talanoa ai le mataupu lea.
O le isi mea sa tatau ona o mai e sue le sa‘o o mea ia. Sa tatau ona o mai latou e vaai i galuega ia sa ou unaia atu ai pea le alii lena o John Campbell, e o mai ma te o e faatilotilo mata i galuega ia sa fai. Afai la e fia talitonu ai latou, sa tatau ona o mai le komiti lena e vaai.
(E faamalulu atu, o le a lē faalauiloaina le faaiuga o lenei talanoaga.)
