Talanoaga ma le Palemia – 18 July 2011

Radio Samoa: Lea foi ua maua le fesootaiga ma le taitai o le atunuu, le afioga i le Palemia, le susuga ia Tuilaepa Sailele Malielegaoi. I le agaga faaaloalo e avea ai lo’u leo faatauvaa e fai ma fofoga taumomoli o le atunuu, e faafeiloai atu i lau afioga le Palemia, lau susuga Tuilaepa, malo le soifua manuia! Faafetai ona o le manatu mai, ma le avanoa foi ua tuuina mai i lenei afiafi ua maua ai le tatou feiloaiga i luga o peau ma galu o le ea. Malo lava le papale ma le onosai mai!

Palemia: Ia e faamalo atu i le valaau mai. O lea ou te matauina ua 15 minute talu ona valaau mai, ia ae o lea foi sa iai malo. E faamalo a le onosai.
O le mea sili o lea ua maua fesootaiga, ia ae lelei loa ona taoto atu e amatamea mai oe. Ua vaeseuga foi e lei toe faia se ta talanoaga, ia ae o lea o loo lava le taimi, ae amatamea mai loa oe i le ta polokalame.

Radio Samoa: Ta talanoa ia i le mataupu o le nonu. O se mitamitaga lava i finagalo ma loto o si tatou atunuu, aemaise o lea ua māua foi ua agai mai foi le atunuu o Saina ma nisi o le atunuu, taumafai foi ona galulue i le nonu. Aemaise foi le 50 eka lena ua ofoina mai e Sasina aemaise ua faasuafaina ai foi le tamā o Mr Chen.
O le ā se silasila mamao a lau afioga i le Palemia i le tulaga lea? O se tulaga matagofie mo si o tatou atunuu, aemaise o lea foi e maitau atu e moomia ai ni tagata faigaluega e 40 poo le 50, ma le agaga faaaloalo lau afioga Tuilaepa?

Palemia: Se tele lava le mau avanoa e maua ai le seleni e tausi ai aiga. O lea foi ua maua sia avanoa ona o le vai e gaosi mai le nonu.
O le isi lea vai o loo alumia tele i atunuu i fafo. O le taulia la o a tatou vai i le malo Saina, o le isi lea faamanuiaga tele. Manatua foi o lea sa ou auai i le latou faaaliga tele lea sa fai i Shanghai.
O le nonu la lea sa maketi ai iinā ma faalauiloa. Ia lea la ua fanau mai amio a le nonu. Ua tele le manao mai ai a le malo o tagata Saina, ae amatamea ai le alii lea o Chen, o le faipisinisi, lea e taitaifono i le fono faapitoa a le aufai pisinisi i Saina, iina i Nii Sila. Ia ma o le latou kamupani lea ua faatauina le tele o faatoaga manu papalagi e tatau ai le suasusu, i le faamoemoe e latou te matuā galueaina ma sapalai ai le maketi o Saina i le susu mai Niu Sila.
O latou la ia o lea e unaia le pisinisi lea o le faatau o nonu, ia ma e uma nonu tatou te sapalaia, e lē taitai faamalieina le maketi o le tasi le piliona faselu i le limaselu miliona tagata Saina le toatele.
O le tulaga manuia la lena o lea foi ua aliali mai lenei vaitaimi. Ia ae tau mai le taimi lenei, na o nonu a na ola a‘e a latou i le laueleele i galuega foi o loo fai e manufelelei o le ‘ai o le nonu ma faasalalau solo ia fua, ia ma ola a’e ai a nonu i luga o le fogaeleele ma fua ai a latou.
O le ala foi la lena o lea e tele ai le nonu ua tau faasoloatoa e tagata, o fea ā le mea o tu ai le nonu, e toatele e latou te lē o totōina. Ae o se galuega tele faatupu manatu le afioaga o Sasina, i lo latou naunau e totō foi lenei laau, e atili lilifa atu foi i ai ia Sasina faamanuiaga e maua mai le maketiina o le nonu, i le tulaga a lea mo mea o le gaosiga o vailaau faatupu toto o le tino, ia ma maua ai le malosi.
O le agaga faafetai lena, ia ae o le tali foi la lea i tagata foi nei, tatou lea e malosi i le faailogalanu. Lea e tomumu i Saina ma a latou pisinisi.
E iai a nai Saina e omai fai ni nai a latou tamai faleoloa, ina ua nonofo ma tamaitai poo alii Samoa foi. Ae o lea foi ua omai ia Saina, e lē o agaga i ni mea faapena, ae o lea e agaga e liligi mai le manuia e ave ai oloa a tatou i fafo, e lē o gafatia ona faia e a tatou foi faipisinisi. E faapena la le tulaga i nei ona aso.

E tatou te vaavaai, e lē o le vaavaai i mata o tagata, poo le ā le lanu o mata, poo le ā le lapopoa a o le ā le uumi, ae tatou te vaavaai i le aogā e sasaa mai e tagata o loo fia fai ni a latou atina‘e ae maua ai tupe a o tatou tagata, aemaise faamanuiaga e masaa atu i tua i afioaga i tua. Ia o le faamatalaga lena atonu ua malamalama ai foi lea tulaga.

Radio Samoa: Faafetai o lea ua manino lea itu. O lea ua toe manatunatu le atunuu ma talanoa pea i le suiga o aso o le a iai. O le 29 o Tesema lea e faamoemoe i ai. Lona uiga pei ā ua leai se 31 iinā. Manatua o lea na taumafai lau afioga, faafetai tele lava i le tofa mamao aemaise foi le tofa saili, lea foi na taumafai e suia auala, sa gugulu foi le atunuu. Ia o le upu lava a le atunuu, ‘e tele lava timuga, ae tua i le ‘o‘o.’ Ae o lea foi o le a toe suia foi la le aso, ia o loo iai foi le gugulu fai mai, ‘ia o le ā foi se mea o le a maua ai.’ Ae o lea e vaavaai atu, lona uiga a suia loa, ua tutusa i tatou ma atunuu e iai Niu Sila, Ausetalia ma Amerika.
O lona uiga ua lē o toe iai, pe sa‘o la‘u mate Tuilaepa, pe tolu, fā aso ia ua short ai tatou. Se‘i saunoa i lea tulaga faamolemole e faamanino i le atunuu, ma le agaga faaaloalo.

Palemia: E pau ā le mea ia malamalama, e mafua ona fai suiga ona e iai aogā. E lē te‘ite‘i ona fai lea o ni suiga. Manatua o le isi suiga tele a sa ou unaia ma o lea ua leai a se leo e agai i ai, o le tafi ese lea mo mea o lalaga foi lele ‘ai‘aiga ma tele ina ‘ai e imoa, ona aumai lea afifi ona ave lea ta‘i sefulu ae tatala atu lalaga e lē atoa se sefulu e na o le ta‘i fitu isi faaputuga lalaga. Ia lea na iu ina aumai le iuga ma lē toe iai nei ni lalaga, ae na o ie lelei, ie tetele.
O lea foi la ua iai le fuafuaga a le Malo, o le a toe fau se isi tulafono, e lafo e teuteu ai le tulafono i pulega a alii ma faipule, e taofia ai mo ie tetele foi ia, e tetele vale, lea e pei ni fala papa poo ni fala lilii le lalagaina, ae faaaogā loa ie o le iniini pei o ie anamua, lea e na o le fai ai o faaaliga fuataga i le faaiuga o tausaga, ma ave tanu i lalo o le moega. E seāseā aliali mai se ie sae poo se ie ninii memea i luga i faalavelave fai.
O le fautuaga la poo le tuualalo a falelalaga i talanoaga ma le auasiasi, o lea e fautuaina mai e tina, o le faalavelave o lea e faaaogā tele, e agai a mafaufauga o tamā o le atunuu, e faaaogā ie pakuvalu ia e tasisi i luga i lou, e matagā.
Ae a faapea e mafai ona faatulafono e le malo le taofia loa o na ie, ona tatau loa lea ona faaaogā loa lea o ie mananaia ia e pei ni ie anamua, lea ua leva, masalo pe lē i lalo ifo o le 30 afe ie ia talu ona fai polokalame lea a tatou. Tasi la lena suiga e ono fai i se taimi lata mai.
O suiga uma ia tai pei foi o suiga o pusaapa tetele, ua sā taputapu ona toe aumai se pusaapa tele e 48 apa, a o lea ua sau le 24.
A alualu foi e leai a se mea e taofia ai le toe tipi i lalo na o pusaapa e 12 e mafai ona taga e aumai, ina ia tuu itiitia ai ma faamāmā avega i faalavelave fai, o mea na e pule ai tatou i lalo nei, e lē o faia i tafatafa o le Atua. Lea foi la ua oo mai i le suiga o taavale afi, ma suiga o le taimi, ma le laina lea ina ia tatou laina tutusa ai ma Niu Sila.
Mo mea o suiga nei ou te faaigoaina mo mea o suiga laiti ia, e fai e le Malo. Ae iai la suiga lea e lagalaga mai ai faipule o le Itu agai, e sui ma le fu‘a. Ia lea la ua uma ona ou faaalialia, o a‘u nei ma le faiga malo lenei, e matuā inoino tele i nei mea o le fesuisuiai o mea.
E faato‘ā sui a ina ua ou iloa, o le sui e tāua, ae lē faapea o le tafao tafao a o lea faipule sau fai mai lana suiga, ona sui loa lea.
O le isi la suiga lea na aumai e latou, o se suiga e pito sili ona faavalevalea e lē tatau ona faia, o le suiga o le fu‘a. O le tulaga o le fu‘a lea e iai nei, a oo ina faatulaga le tatou fu‘a ma le anoano o fu‘a a le lalolagi, e pito i tulaga ese a le aulelei o le tatou fu‘a, Fu‘a o le Saolotoga.
A o lē na tusia le fu‘a, o Malietoa Tanumafili II, o le isi lea polofesa o mea tau tusiata, e faalēlauiloa tele e tagata. Na nofonofo i le taimi foi o loo talanoa le fu‘a, nofo a ma tusitusi le fu‘a ae valivali i lipstick a si loomatua o Tunu, ae faalanumoana i le penitala.
O lea la ua iai uma ii ia tulaga foi o mea tāua e pito sili ona tāua i le tatou fu‘a. O le lanu paepae o fetu o le koluse o le tatou Alii e tu i le itu i Saute o le tatou ekueta, o inā tonu lea e iloa ai le tulaga tonu lea e iai Samoa.
O le lanu moana o le tulaga foi lea o le saolotoga o Samoa, ma le lanu mūmū o le ola o le atunuu i le tutufaatasi ma le felagolagomai. O lea la ua iai uma ii mafaufauga loloto e atoa ai le saolotoga o Samoa, lea e faaata mai e le fu‘a. Ae manatua foi o le tatou vii, o lea e usuina o le Vii o le Saolotoga, e ogatasi a ma le fu‘a o le saolotoga.
O lona uiga, o le tagata la e fai mai e sui le fu‘a, e tatau foi la ona sui ma le vii. O le vii foi la o tatou, a ta le tatou vii faatasi ma nisi vii, e tulaga ese foi a le ola ma le manaia o le tatou vii. Ua ala ona ou ta‘ua mea ia, ona o lea ou te mātau atu i vaega i lau saunoaga foi, e iai tagata e lē fiafia i ia mea o suiga.
O a‘u le isi tagata e pito sili ona inoino i nei mea o suiga, se‘i vaganā nai tamai suiga laiti ia e tai pei o pusaapa, o toga, faapena foi ma mea o suiga o aso, ma suiga o taavale, ou te faaigoaina la suiga na, mo mea o nai minti minti suiga, e lē o ni suiga lapopoa.
A o suiga tetele la ia e tai pei o le fu‘a, tai pei o le suiga o le vii o le saolotoga lea e fai mai le vaega lea e tatau ona sui le fu‘a, o mea tetele faapena, e lē o ni mea e tatau ona vavevave ai se isi.
O le suiga la lea i le foi mai i le mataupu lenei, o le suiga o le aso, o le mea telē pito i sili ona faigata tele, o le logo mai o le aiga iinei i le Aso Toonai a Samoa, e o atu o lea ua oti le toeaina, poo se uso poo se tuafafine, e teu i le Aso Lulu.
E manatua la, o le mea e tatau ona iai, tatau ona iai se visa e alu atu ai. Lona uiga o le pemita lea e mafai ona alu atu ai i Niu Sila. E tatau ona iai le avanoa e lele atu ai i le vaalele. Lona uiga e tatau foi ona talanoa i le vaalele poo iai se avanoa. O le tele a oti iinā i aso nei, e na ona logo mai o aiga e o atu, ae leai se tupe e totogi ai le pasese. Lona uiga e tau sue foi ma le tupe e alu atu ma le tagata lenei e totogi ai le pasese. Lona fā, e tatau foi ona alu atu ma avatu ni toga e fesoasoani i le faalavelave.
E fā mea tetele ia e tatau ona saili. Ae talu ai o le tou Aso Lulu iinā o le Aso Lua lea iinei, a oo la i le asō, a o lele ua omai i le Aso Toonai, ua matuā lē aogā atoa le gaioiga e fai e saili ai se visa, lē aogā le Aso Sa, ae faato‘ā mafai ona gaioi le tagata iinei i le Aso Gafua o tatou i Samoa nei, ae tatala le ofisa o Niu Sila i le ta o le 10am, ae toe tapuni i le ta o le 2pm. Lona uiga, o le 10, 11, 12, lua itula, ma le 1pm i le 2pm auā e mālōlō, na o le tolu itula e tope uma ai mea uma nei, mea ia fā tetele ia e fai, talu ai a le tulaga lea e iai nei, o le eseese o aso.
O le mea la o lea e taumafai i ai i le suiga o le aso lea, e mafai ai ona maua le aso atoa, ma le tolu itula lea, e gaioi uma ai mea nei. Afai o le a sui le tatou aso, o le telē ia o le fesoasoani i le tulaga faaleaganuu, o le a telē le aso atoa ma itula e tolu, o le a gaioi uma ai mea nei, o le taumafai e saili le visa, taumafai e talanoa ia maua le avanoa e lele atu ai i le vaalele, taumafai e sue le pasese, taumafai e saili ni toga e alu atu ma ia i le faalavelave. O le tulaga la lena tau faalavelave, a o le tulaga ia tau pisinisi, o le matuā telē o le faaletonu i le taimi lenei, aemaise a le mea lenei o femalagaina.
O femalagaina, ua na o le tuputupu o le mea lea, talu ai ona o le nunumi i le tele o taimi e fai mai ai le ticket a le tagata iinā ma ta‘u mai, e fai ma galo e eseese aso. Ona ta‘u mai la ea o le Aso Toonai e alu atu ai, ae o la e manatu le teine iinā o le Aso Toonai iinā. A o le Aso Toonai lea e ta‘u mai e malaga atu ai le tagata lea na fai iinā le pepa, o le Aso Toonai a inei.
Ona alu atu loa lea i le Aso Toonai a inei, e alu atu ae fai mai le vaalele iinei, se leai na alu le vaa lena anapo, ona o le Aso Toonai lena e ta‘u nai iinā, o le Aso Toonai a Niu Sila.
Ua sese ona tusi i lalo le ticket e malaga ai. O le ā la le mea lea e ta‘u mai ii? A oo loa tatou i le sui o le aso, ona faato‘ā soloia ese uma lea o mea ia e tupu ai ai le vevesi ma le telē o le faaletonu.
O pisinisi uma a i Samoa, e leai ma se pisinisi o teena le mea lea. O le matuā apoapo e lagolago le fuafuaga lea ua iai le fuafuaga a le tatou Malo. Vaganā la i le va o tatou ma Tutuila.
O Tutuila la o le a eseese ai aso, ia e lē āfaina lena, e telē le aogā mo tatou iinei, auā e lē faapea o se atunuu e faigata ona lele i ai i o, e faigofie auala o vaalele. A o le tulaga la mo tatou, o le matuā telē o le aogā mo tatou, e lē gata i le tulaga o faalavelave faaleaiga, ae faapea foi i tulaga faapisinisi.
E leai se isi faamalamalamaga i tua atu o le faamalamalamaga lena. Ae o latou foi o tetee, ia faitalia ia latou ma latou tetee e fai.
O le uiga a lena o le lalolagi lea e iai, o lea e iai le manatu o le isi tagata e faapea, ‘o le lalolagi lenei tatou te iai, e tumu a i ituaiga tagata. Vaega muamua, o si vaega toaitiiti a lea latou te faia suiga aogā o le soifua. Tasi lena ituaiga o tagata, le vaega toaititi lea latou te nafa ma suiga e aogā mo le soifua.
O le isi ituaiga tagata, lea e iai le vaega toatele, le anoano, e na o le nofonofo a ma matamata i suiga, leai ma se sao e tasi e fai ai ni suiga aogā, na o le nofonofo a ma matamata; o le isi lena ituaiga tagata. Ma le ituaiga tagata lona tolu, le e anoano foi o loo iai i le lalolagi lenei, e matuā leiloa o lea ua fai suiga, i le soifua e aogā mo latou. O ituaiga tagata la lena o lea e iai i le lalolagi. O tagata toaitiiti e faia suiga e aogā mo le soifua, ma le lalolagi tēlē e na o le nofonofo ma matamata ma maimoa, ma le isi lalolagi tēlē e sili atu, e matuā leiloa a o lea ua fai suiga mo le soifua lelei o tagata auiluma. Tagata la ia e matuā lē fia malamalama foi. E lē gata ina lē fia malamalama, ae matuā lē malamalama a i suiga tāua ia o loo tutupu nei. Ia o le tali puupuu atu lena, atonu ua aogā foi le toe lagalaga mai o lenei mataupu, ua toe faamatala atu ai i ē logonoa. O iai nisi mataupu? … Toe tasi a le mea lea ou te toe faamamafa atu. O le Malo lenei, e lē o se Malo e nofonofo a tasui ni mea. E faato‘ā tasui a ni mea ina ua iloa e aogā mo le atunuu.
Ae ou te matuā inoino i se ituaiga suiga e fai ai ni suiga i ni mea o lea a e aogā mo le atunuu, e telē le aogā. E faaiu atu ai leaga e iai a tagata e faapea, a manatu a le malo lenei e sui lea mea, ua sui. E leai e lē faapena le malo lenei. E faato‘ā sui a ina ua matuā talitonu e telē le aogā mo o tatou tagata.

Radio Samoa: O le upu, ‘o le lago mate e tasi, e faaleagaina atoa ai a le suauu.’ E talitonu o le tele o taumafaiga lelei ma atina‘e a le malo, o loo unaia ai lona tamaoaiga e ala i turisi e asiasi atu. Ae pagā lea, o le tele o vesiga ma misa a le tupulaga o loo latalata atu i le taulaga, e pei o i lea e agai i ai se manatu lau afioga a le Palemia. O le ā se silasila mamao aemaise foi le malo i se tulaga e foia ai lea faafitauli? Fai mai le lipoti talu ai, ua fiu leoleo, ana lē vave atu le autinemu, e lē foia lea misa e pei ona tupu i le taulaga?

Palemia: Manatua o le vaega lea a le tineimu o le vaega foi a leoleo. Manatua o lea sa i lalo o leoleo, ona tuu eseese lea, ae lē o aveesea a le galulue o latou e pei ona iai muamua. O le vaega uma a ia sa i lalo o leoleo. Ua ona ou ta‘ua lea mea, ona o lena e iai a le agaga foi lele e pei e tau saili masei.
O le po a lea na loka ai le toafā. Ae o le taeao, talu ai le toafā lea na loka, na toe iloa toatele ai le isi vaega na auai. Tusa la e 29 le aofai atoa o i latou ia na loka mai le po faatasi ai ma le taeao o le Aso Sa.
E aumai a isi o la e lolotu, o atu a leoleo aumai totonu o latou falesa. Foi lele e ese a le uiga na faaalia i le po, ae oo i le taeao ua pei ni agelu, e maua atu a o la e pepese mai totonu o le falesā i Matautu. O lea la e faatali le faamasinoga.
O le Aso Gafua i le ta o le 12pm na feiloai ai leoleo ma faifeau o nuu uma ia, ma Alii ma Faipule. Ma ua tasi moemoe ai le finagalo o Alii ma Faipule o Apia ma Matautu, o le a tafi ese uma a tagata ia e ana fanau ia na tutupu ai le mea ia, ona o le toatele o ē fai mai, mai tua o lea e nonofo ai totonu ii. Faapea la o le Aso Toonai nei, o le a usu ai loa le fono ma fai ai le iuga lea, ma ua uma foi ona aumai le faalalolaloga a afioaga nei a Alii ma Faipule, i le Malo ma le Atunuu, e tusa ai o mea valea ia sa fai e fanau nei.
O le toatele o isi tamaiti na o le 13, 14, 15 tausaga le matutua. Ae na maua ai a ma nai tina e toafā, sa latou faia le galuega foi lele o le o e ao mai atomaa ma aumai e faaputuputu mai ma tuu mai i tamaiti nei e faatino ai le latou tau‘aiga maa.
O lea foi la ua loka uma le toafā lena e fai i ai se a‘oa‘oga lelei mo latou, o tina ua matutua ua tatau ona manatu faatina, ae ua lē tina a‘i.
O le tulaga la lena, ina ua valaauina a‘u mo so‘u foi taofi, ona ou ta‘ua lea o tulaga lena, o le mea lena e tāua tele ai le aganuu a Samoa. E lē gata o le aganuu, a o le tulaga foi o le lagolago mai o le aufaigaluega.
Ae o lea la e pei ona maua mai, e maua atu isi o la e pepese mai le aufaipese i Matautu. Ona o mai a lea ave sa‘o loa i le faleaoga i Tafaigata e a‘oa‘o lelei ai le mafaufau. O uiga ia tāua ua ese ai Samoa. Ma ou te lagona e tāua tele le faatāuaina foi o pulega mamalu o Alii ma Faipule. Ia na uma mai a lena po, ona te‘i a lea ua leai atu a ma se mea o toe tupu.
O lea la ua toe taotoga i lago tonu le tulaga, ua matuā leai a ma se mea o toe gasē, ae la ua faatino le galuega a leoleo latou. Sa ou ta‘ua ai foi ina ua fesiliga a‘u, e iai le mea faapena na tupu a o o‘u aoga i Felela i le tausaga e 1955.
O lea e valaau atu, manatua foi o le taimi lena, e fai le foleni a Felela. Ae ta le tagipalau ma tatu‘i mai ma le tagipalau tele a lena sa lauiloa ai foi le aoga i lena taimi, na o Felela a e matuā fai lelei le foleni ma march i le taeao.
O lea la e laina matou i le laina i le taeao, auā e laina ona usu lea o le pese lotu, ia tatagi mai loa ma tagipalau ae fai le foleni faataamilo i Mulivai, ma e alu atu ai a i lou potu.
O lea la e lei faia le lotu, ae tulai mai loa le Pule ia Kesimia i le taimi lena ma ta‘u mai, e iai se misa na aafia ai tama e lipoti mai e aooga i Felela, e toaono latou, ma e oti poo uma o latou ulu, ma e totolua.
Ma o lea la na lipoti mai sa latou faia ni tau‘aiga maa ma taei ai le fale o Tolopeni. Ua uma foi la ona faafesootai e ia mātua, ia ma faapea mai mātua ia Kesimia, ‘fai lau galuega e faatupu ai le manatu lelei ia matou fanau, ua faigata ia matou amio a tama.
Ona faapea mai loa lea o le Felela, ua uma foi la ona fesootai i leoleo i le taimi lena, e pulea tatou e Niu Sila, sa iai le siusiufai e faaaogā e leoleo, e avatu loa lea tamaitiiti, e muamua sausau ma sasa e leoleo i le siusiufai lea ia aua ai ne‘i toe ulavale.
Ona fai mai loa lea e Kesimia, ua uma foi la ona felogonai ma leoleo, ia ma le latou upu, o le a lafo mai i le alii pule le faasalaga. Ia ma o le faasalaga ua taunuu i ai, e ta‘i 40 ta.
Ae o le mea sili o lea a e tutū mai outou na e toaono ma tou ulupoo, o outou uma foi lea e tutusa lelei a ma lipoti. Ia savalivali maia i luma se‘i fai le galuega lelei mo outou e a‘oa‘oina ai lo tou mafaufau talavou. Ia ona o atu loa lea o le vaega ua laina, i le taimi o le talavou e Kesimia, na uma lelei le ta‘i 40. Ua fiu e auoi ma auē, e uma a tolotolo mai lea e i le laina ua lē mafai ona tū i luga; uma tolotolo mai lea i le laina.
O tua ia i mea foi ia e mafiafia ai le pa‘u, ua matuā lē mafai ua matuā gāoi uma i le taalo a Kesimia i lena taeao. O tausaga na mulimuli ane ai, na avea ai tama nei e pei ni agelu. O isi na o e faifeau. A o le isi lea o taimi uma a ou te usu atu ai i e faafeagai ma le tatou maketi, o tūtū mai ai, o loo pule i le faletaavale tele a lena o loo faatau a latou taavale secondhand mai fafo.
O lo‘u pasi atu a i luma o‘u tilotilo atu i le alii lea ma ou ‘ata, ma ou faapea, tasi lea agelu, ana leai le siusiufai na sasa ai, e lē agelu amio. Na ala na ou ta‘ua le mea lena ii, o le toe faamanatu i le tatou atunuu, le tāua o pulega mamalu a Alii ma Faipule.
O le mea lea o le tau‘ai maa, e lē o se mea fou nei, o le mea a na iai i la aso i le 1955 ma tua atu, seia tau ma a i le taimi lenei, ma e faigofie a ona toe tupu se faalavelave, pe a tuufau e mātua aemaise i po foi ia e o ai mātua ae o tamaiti e tafafao, pe o mātua e bingo e pei foi o inā e o e fai housie, ae tia‘i tamaiti i le fale e leai se isi e vaaia.
Mea la na e ono tupu i taimi faapea. Tutū atu loa le isi tamaitiiti, alu talanoa i le isi tamaitiiti, ia te‘i ua palauvale mai le isi tamaitiiti ia fai loa fusuaga, ona amata loa lea ona faaopoopo mai uo a isi, ma toe aumai ma uo a isi, ona amata lea i le tasi, ae uma ifō ia ua nuu atoa. Ae o le iuga o na mea uma, e pa‘i atu loa leoleo, ia fai loa ma le iuga, e toe salamō ane, ae ua leai se aogā ua masaa le ipuvai.
O le tali atu lena i le fesili.

Radio Samoa: O le tulaga lea i taaloga afeleti a tatou. O lea e maitau atu, ua tele tausaga ua vaavaai atu foi ma le toto‘a e lē o alu i luma afeleti a tatou, aemaise lava o tagata matutua. Ou te talitonu na o asosi a aoga o loo faapena ona matagofie.
Ou te talitonu e lē faatonuina foi le afioga a le Minisita, le afioga ia Magele Mauiliu Magele, aemaise foi le CEO le afioga ia Galumalemana Petaia, o le ā foi se finagalo o le latou panel pe tālo se latou fono foi lele, se‘i toe faamalosi auā ou te talitonu o loo iai lau faamalosiau mo lea tulaga, faamolemole Tuilaepa?

Palemia: Ua lelei. E iai le ‘anava e fai a ma tilotilo i ai soo se malo. O le ‘anava e faapea, e lē tatau ona aiā atu le malo i mea tau taaloga. Tuu pea taaloga i ē o loo faatinoina taaloga. O le tausaga e 1999 sa tapena ai tatou mo le Olimipeka e fai i Ausetalia i le 2000. Ona ou manatu lea i le taimi lena faato‘ā tasi lo‘u tausaga talu ona ou Palemia, o le a ou taumafai ina ia valaau le autaalo, se‘i sui ia le amio, se‘i amata tapenapena mamao.
Ona matou fono loa lea ma ou fautuaina, e lelei ona toaaga e faamalosia ma faamaopoopo lelei taaloga a Samoa. Na o le o atu a i taaloga Olimipeka, e leai a se pineauro o maua mai ai. Ae taumafai ia ia sui le amio.
O le aso na sosoo ai, auā na uma loa le matou fono, ona ou faamanatua lea i ai, e tele a taimi tou te o ai i fafo, ma aumai foi le talosaga i le malo i se seleni e mafai ai ona o; auā a leai tupe ia e avatu i le Malo, e lē mafai ona o, ia e faitau miliona foi seleni e aafia ai. O inā la lea e auala atu ai le malosi o lo‘u leo, o le tupe. Na lelei a la le matou feiloaiga, uma loa ona ta‘ape loa lea.
O le aso na sosoo ai, ae sau le writeup telē a, e faapea, o le ā le pisinisi a le Palemia e alai mai ai fua le polokiki i taaloga? E leai a ma se aiā e aiā mai ai fua. Ia ona ou lē pisa a lea.
Uma loa le masina foi, ua toe tālo auā sa ou fai i ai, o le a tatou fono fono pea a i masina uma, ou te tu‘itu‘i atu ma unai atu outou tou te o e fai ma faamaopoopo ia tou tapenaga ma toleniga ia lava le tou tapenaga.
Uma loa le masina matou feiloai, ia ona ou fautuaina loa lea, ‘e iai tagata o outou ia le autaaalo, lea na tusia le mea lea na sau i le pepa, e faapea e lē tatau ona aafia fua taitaiga a le malo i taaloga, o loo iai a ē popoto i taaloga e latou te faatinoa. Ae lelei ona ou fai atu ia te outou e faapea, o manatu na o papalagi i fafo. E lē o se manatu lena o Samoa.
A outou manatu i le mea tāua lea na tupu i le 1995, na tapena ai tatou e o e taaalo i Tahiti. Na alu atu ai le faatonuga a le Palemia o le iuga lea a le Kapeneta, e sā ona alu se isi o tatou e tauva. O le a faaaogā le taaloga lenei e tetee atu ai i faataitaiga o pomu atomika o loo faia e Falani i totonu o Tahiti.
O le isi foi mea na mafua ai ona fai e tatou le tulaga lea, o le tele o atunuu o le Pasefika e tetee uma a ia Falani ma latou faataitaiga pomu atomika o loo fai i Tahiti, ua aafia ai le toatele o tagata Tahiti e mama‘i i le pefu matautia o niukilia.
Sa iai foi la le lagona o isi malo tai pei o Fiti ma Tonga, o le a aumai le latou lagolago ia Samoa auā e taufai tetee uma a atunuu. Ae uma anē, na o Samoa a lea ua tu matilatila e faasā, ae la e o uma a isi malo. Mafuaaga, ua lē tu Malo i le latou tiute, ae o lea ua fai a le autaaalo latou ua pule a latou.’ Ia ona ou fai loa lea i le matou aufono, o inā e ta‘u atu ai, o le mea a e manatu le Malo e fai o le mea lena e fai. A o outou na o le faalologo a.
A manatu foi le Malo e tou te lē o, e tele a mea e mafai ona fai. E lē avatua se tupe, e sā se isi o outou ona alu i fafo, embargo uma outou i luga o le tulaga, o le taofi atu o tou passports ma faasā ma outou ona tou o e foleni i lalo o le fu‘a a Samoa; o mea uma a na e mafai ona fai e le Malo.
Ae aua ne‘i toe aumaia ni manatu faavalevalea vaivai faapea, e ese a atunuu i fafo ese ia Samoa. Ia o loa i le Olimipeka, tatou taaalo ai, e leai a ma se pa‘upa‘u a tatou na maua.
E iai a la le mea lea e oo mai le taimi lenei, o loo iai pea taaloga o lea a e tele a mea piopio o lea e fai ai. O le ala lena o lea e fai ma laa i ai le Malo.
Laa i totonu le Malo i le Soka. Tele foi le piopio o i latou sa faafoea le Soka, laa atu loa le Malo, fai le gaioiga, tafi ese uma loa le vaega lea na iai, la ua iai tagata i le taimi lenei i le Soka, o tagata atamamai ma le faamaoni ma amiotonu, la ua lelei le Soka i le taimi lenei.
Faapena foi ona fai i le Judo. Lea foi ua uma ona faataoto le taiala, ua tafi ese le vaega piopio lea sa faia le Judo. Lea foi la ua uma ona fai i le au Volipolo. Lea ua tafi ese le vaega lea ua ova i le valu tausaga o faavevesia ma oo ai i le tulaga lē manuia le Volipolo, ua toatele tamaiti e lē toe fia taaalo ai, ona o mea a nei tau pulega.
O le Afeleti la le isi mea lea e telē le pituli lea e tu ai, ona o le telē foi o le faaletonu o i latou o lea o loo faauluulu i ai.
O le ala la lena, o lea ina ua e lagā mai, o lea ua matuā tulai malosi mai lava le Minisita o Aoga ma Taaloga i le taimi lenei, ma le CEO le Pule, o le taimi lenei e faasa‘o ai mea ia.
E na o le tasi a le ituaiga faasa‘oga, kilia ese le vaega lea e i luga, lea e ala ai ona leaga le tulaga o taaloga a Samoa. Ia o le tali atu lena i le mataupu, e lē o se mataupu fou, ae telē a le faafitauli o mea faapenei. Ae tasi a le mafuaaga, o Tupe.
O Tupe ia e mafua ai, pei foi o mea na e tutupu mai iinā, i le tele o a tatou faalapotopotoga. E alu alu a lea faalapotopotoga, pisa; e pisa ane a, o tupe.
E fai mai le tali a le isi tamaloa, o faalapotopotoga a Samoa, a alu alu a se faalapotopotoga ua lelei, poo se kalapu lakapi, poo se kalapu a faalapotopotoga a tama tuai, e te manao loa e talepe, tuu i ai se miliona tala. Na ona tuu a i ai o le miliona tala, ta‘ape loa i le faasoaga mafua i le faasoaga.
O le tulaga la lena, tasi lena mataupu e i tua o mea uma a malepelepe ma mea lē atoatoa. E saili, saili ane lava, ae maua atu lava le fatu atoa, o le ‘aitupe o tagata.

Radio Samoa: Malo, faafetai tele lava mo le avanoa matagofie. Faafofoga lava le mamalu o le atunuu, ia ua e tanoa i mea uma lava. Talitonu ua lava foi nai mataupu o lenei po, ae alofa atu foi e tua foi i faiva ma galuega foi.
Agalelei le Alii, ia maua pea lou malosi mai le Alii, auā le taitaiga o le tatou Atunuu, maua pea sou finagalo mai le Atua, ia maua foi le papale mai le Alii auā lava le taitaiga o le Atunuu, aemaise foi le aiga ia iai le alofa o le Alii.
Ina ne‘i iai se isi mea e te fia saunoa ai, poo iai ni galuega tetele o faatulagaina mo lau faiga malo i lenei taimi, e lē o iai so matou iloa, ma le agaga faaaloalo a o ta lei faamavae?

Palemia: E lelei pe a aua e te faamata‘asi atu fua mea o lea vaiaso. Ae lelei ona ta malolo lelei i lenei po. O i latou foi o loo faafogafoga mai, ia soifua ia ma ia manuia.